شنكح عـــواد

سمعت يا أبو عنـــاد شو سوا أبو صقر...
أبو صقر ترك القريه للمدينه ميشان شغله مهمه ...
و حط عـــواد محله يدير باله عالعشيره طول غيبته....لانو بيثق في مساعده عـــواد كل الثقه...
المهم في غياب أبو صقر. شنكح عـــواد و قعد في صدر ألمظافه...

اجا اثنين ضيوف غرب عن العشيره و نزلو ضيوف عند عـــواد....
عـــواد نادى على مرت الشيخ ام صقر و قلها تحظر اربع خرفان للضيوف....
ام صقر قالتله لويه اربع خرفان مهمو كلهم اثنين....
عـــواد اصر تطبخ اربعه و ام صقر مش راده عليه....
و لعت مع عـــواد و قلها اسمعي و الله اذا ما طبختي الاربعه لاطلقلك....
ظحكت ام صقر و قالتلوه اي روح انصرف....
و هون رمى عليها الطلاق وهيك طلق عـــواد ام صقر مرت معلمه أبو صقر....

رجع الشيخ أبو صقر و سولفوله عاللي صار.....
و ختموها يعني يا أبو صقر بغيابك عـــواد طلق مرتك....
أبو صقر صفن شويه و قال عـــواد بيمون....عـــواد بيطلعلوه....

اللي صفن هسه أبو فتحي و سأل أبو عنـــاد: ....
شو قصدك و الله ما فهمت ايشي منك....
شو هذا اهبل أبو صقر....

و الله يا أبو فتحي الاهبل انته.....
مهيو مختارنا بيعمل نفس الشي....
يعني لازم طلاق المره....
يا زلمه طلق الكهربا من بيوتنا و البنزين من سياراتنا و المصاري من جيوبنا و القمح من دارنا ...
و طلق الشغل بالنيابه عنا. ما انته شايف الشباب كلها قاعده لا شغل و لا مره.....
يعني عـــواد طلق نسوانهم قبل ما يتزوجو.... فهمت هسه...

اخ يا عم أبو عنـــاد....هسه فهمت و في شغلات كثيره طلقها بدالنا بس خايف احكيها لا تقول عني اهبل....
سولف يا أبو فتحي. ما فيش اهبل من هيك....
اللي بياكل حمير العرب لازم يزازي بالقرب...