انا مع الحكومة

دوله الرئيس اعدك اذا قرات مقالتي ان لااقف الى جانب هذا الشعب المفتري
هذا الشعب الظالم والجسم المهتري وساكون مع الحكومة التى لا حول لها ولا قوة لان الحكومة تهمنى اكتر من الشعب الطماع كلنا صرنا معها انا مع الحكومة اللى
لما نصرخ بتسكتنا بوظيفة ....ولا بهدية ....او سفرة مع نوابنا اللي باعونا بغمضة عين وصار الواحد منهم يطلع علينا بنصف عين...من خجله وصرنا نسال من وين ومن وين وشو بدل الحال وشو غير الاحوال نسيونا ونسيوا الاهل والناس و والبوس عالراس والوعود ونسيو الوطن وتضحيات الجدود والفقرا والغلابى ومثل مانسيو حالهم

لكن شو ذنب اللي مش متعلم والفلاح بارضة والطالب ورا مكتبه والصانع ورا كوره والجائع اللي بلف على اجريه على رزقه عياله واجرة البيت وثمن الكهربا
صار الكل جيعان ونفسه مفتوحه على وظيفه يلهف منها ويسدد جعهة وديونه وظيفه عند بعض الكبار يتعلم منهم فن الحرمنه وفن الغش وبقول ماحد راح يلومه لان

الجيعان ياحكومة بركان وقوة وطوفان مش راح تقدروا توقفوا قدامه لو ثار
هم صبرو بقليلهم ورضيوا لكن قليلهم مش راضى بيهم وبيتأمر عليهم وعلى لقمة عيالهم

يادوله الرئيس صدقني انا انا مع الحكومة .....لكن من حبي الها بحذرها بحذرها وبقول حذارى من ثورة الجياع

حذارى من الجيعان لو طلع فى ثورة او مسيرة او سميها شو مابدك ومفيش وراه اللى يخسره.....حتى الجامعه مادخلها والمدرسه تركها ومهنه ماتافيش حذارى يا حكومة حذارى
بقولها لكل وزير او امين لجنة سياسات وبدافعوا وبحافظو على كراسيهم ,وناسيين انه الشعب جيعان وعريان

يادوله الرئيس سمعت مره جار النا عمره فوق الثمانين بقول بقول غصة الجوع اقوى من تعذيبات المعتقلات..... والجوعان ما يفكر لما يجوع لا بالجيش ولا بالشرطة ولا المعتقلات لو جاع الموت ارحم له من انه يعيش جوعان فى بلده واولاده تموت قدامه جوع وقهر ومرض على الاقل عمره ما بجوع بعد الموت .........ساعتها الشرطي والعسكري هم كمان اردنيين مثلنا وجيعانين واهلهم شقيانين زيهم واكتر ومش راح يضربوا اللى حاله من حالهم بالعكس ممكن يستخدمو قوتهم وسلاحهم ضد اللي بودوهم ومش اول مرة بتحصل

صدقوني قلت لهم يادوله الرئيس ياناس والله عيب حكومتنا مشغوله برفع الاسعار والبحث عن بنود جديده للضرائب والبحث عن قروض وهذه هي تستعد لشراء سيارات للاعيان والكهربا والمي والعهاتف ضبطت اسعارها حتى مانتعب مستقبلا لااحنا ولا اولادنا ويريحونا بالعوده للسراج والبير قلت لهم حكومتكم مشغوله بقانون الانتخاب والاحزاب والضمان وقلت لهم المالكين طلع بس استنوا الاعيان توافق قلت لهم وقلت بس ماعاد حد يصدق حد والله لو قلت لهم الشمس بتشرق من مشرق لقالوا لا ....قلت لهم تعدل الدستور دوموازنه بقولوا بدنا تعديل إنساني .........بلد بتموت وشعب فى حالة سكوت ......وكانها لعبة اتارى من كتر الظلم والظلمة بقول ياريت الماضي يرجع تاني
انا مع الحكومة وماعاد حد يصدقني لاني معكو و بقولوا

ياريت بعد ماصرنا نشوف الفاسد يطلع من صالة كبار الزوار وأحنا بنحبس في سجن المطارعلى مخالفة سير ولا دين منسي ونتعرض علي البحث الجنائي وبقولو والقول الهمك صدقني
يابلدي انا اللي من صغري أخترتك سكتي أتريها سكة أحزاني
أنا اللي من صغري أخترتك كلمتي ألاقيكي مقيداني
أه يا بلد نفسي قبل ما أموت الاقي زمانك وزمانى
بلد بتعاني بكل المعاني بكياني وانا أملى أحس بكيانى نفسي أعيش من غير ما أنافق لفلان وفلاني
نفسي أعيش من غير ما أنافق ولا حتي لا بوي اللي رباني بكرة تتحاسبو علي السكوت وعلي العيشة العميانى شيخ جامعنا جامع الحمد باربد الشيخ رامي بيقول المعارضة حرام وانا نفسى أعرف شو هو الحلال فى بلد االالف حرامى

دوله الرئيس عتبان على الصحافة ودولته بطمن الناس على مستقبل اولادهم وواحد من بعيد بقول عيشني اليوم وموتني بكره يادوله الرئيس
يادولة الرئيس بنسمع كلام وبنشوف غير اللي بنسمعه بنشوف تعيينات ومشتريات وسيارات ومكاتب وعمارات وبنشوف البنك الدولي بعده رايح جاي ونصايحه ووصاياه بتكوي كي
دولة الرئيس احنا بنحبك ونفذنا وصاياك بالحرف الواحد وعالعمياني

نفذنا نصايحك ونصايح اللي سبقوك ياسيدنا وشدينا الحزام على وسطنا على امل انها تتعدل زي ماقالو لنا بسنه وثنتين لكن من كتر شد الحزام على بطن ضامربتكسر كل مرة ضلع وضلعين وماظل لاضلوع ولا زوايا ولا حتى اسنان .... فى كل مرة ترتفع فيها الاسعار الحزام اتقطع والسروال سحل وماعندنا ثمن حزام غيره ولاعاد حزام ييجي عالمقاس وماعاد الاردني يطيق حتى العقال عالراس


وبعدكم بتقولو مديونيتنا تضاعفت عشرات المرات وانه صندوق البنك الدولي جاي وبتقولو انه في ضرايب جديدة ومخالفات سير عالغميض وهون رادار وهون كاميرا وهون شرطي سير وغرامات وارتفاع اسعار وجمارك وغيره وغيرات ماهو كل مااجا الله يسلمه بعطينا وصفه جديدة مش قابله للتغييرات ومثل وزارتنا ممنوع التعديلات حتى لو الشعب مات
,وهاي حكومتكم الرشيدة بعد كل اللي سمعناه وقراناه وعرفناه من حاله وضيق طالعه علينا اليوم بدها قرض جديد ربع مليار كانه هالمليارات صارت ملاليم وكانه ما احناذايقين المر

بتقول حكومتنا انها بترشد الانفاق وعامله كنترول عالمؤسسات والاسواق وانها رح ترشد البنزين بسياراتها والكل صدق حكاياتها ياحسرة 25
واليوم شركه غرغور بتقدم الها تسعيره جديدة لسيارات مرسيدس بس السياره بدون جمرك ب40الف يادوله الرئيس جربنا نعمل ترشيد بالبيت جوعنا الاولاد وجربنا نعمل رقابه على الاسواق والاسعار بس بتظل الاسعار نار حتى بالمختار

الرقابه يادوله الرئيس بتنصص مع الصيدليات والمحطات ومع اصحاب المخابزوبدها بطاقه ذكيه واللجان مش عارفه شو تسوي والفلتان بزداد بالاسواق واصوات الجياع بزداد وبكره ولا بعده جاي المطر والبرد وسعر الكاز برتفع وبعد حكومتكم بتهدد نا بجرة الغاز

الجيعان ياحكومة بركان وقوة وطوفان مش راح تقدروا توقفوا قدامه لو ثار
هما صبرو بقليلهم ورضيوا لكن قليلهم مش راضى بيهم وبيتأمر عليهم وعلى لقمة عيالهم

احذري ياحكومة وراجعي حسابتك وشوفي كيف تسدي ديون وكيف تستثمري بعوايد الخصخصة وتطفي الدين و تسدي فم الجائع فالجوع قالو.......... كافر كافرياحكومة
صدقني يادوله الرئيس من وجعي قلت هالاه ......احسبها موال ولا صرخه دخلت وطلعت وماحد سمعها مثل العادة وسامحني
كل مااجا واحد بنقول خير وكلما ودعنا واحد بنقول اياريت بس مبين الحال من بعضه واللي جاي زي الرايح وصدقني مش عارف اجي معاكم ولا اروح معهم ولا ظل استنى بلكي هالزمن حن علينا بحكومة حنونه على شعبها ...........