لسه بحبه

زاد الاردن الاخباري -

بنت عمري 26 سنه , كنت على علاقه مع شب لفترة طويلة جدا , بهدف الزواج. وضعه المادي كان عائق كبير مما ادى الى رفض والدي له.

بعد حوارات مطوله بيني و بين الشب قررنا الانفصال بحب و رضى علما منا بموقف والدي تجاهه .
انفصلنا بعد معاناة كبيره و لكن الحمدلله قدرنا على هاد الشي شوي شوي.

الحمدلله الشب اجاه فرصة عمل خارج البلاد و هاد كتير ساعدنا على البعد.

المشكله:

قعدنا اكتر من سنتين ما حكينا مع بعض, ولا شفنا بعض . انا اتقدملي عريس تاني و خطبت و اقنعت نفسي اني رح احبه مع الايام .

و بيوم شفته حبيبي السابق بالصدفه و هو شافني كمان . ما حكينا مع بعض . لكن انا متل اي بنت حاولت اعرف شو اخباره , و سمعت انه رجع على عمان عشان يخطب.

من وقتها و انا منجنه بعرف انه تفكيري اناني. لاني انا خطبت و قرب عرسي كمان. بس جد لا انا قادره انساه , ولا قادره احب خطيبي متل ما كنت احب حبيبي.

الشب اكتر من رائع و انسحب من حياتي بكل هدوء لما بابا رفضه, و وعدني اني اكون اخت اله و ما رح يتصرف بغباء عشان رفض بابا اله.

و بنفس الوقت خطيبي محترم و اي بنت بتتمناه, بس انا عمبجبر حالي احبه و مش قادره.