تعبت

زاد الاردن الاخباري -

قرّاء زاد الأعزاء...السلام عليكم ورحمة الله وبركاته
أنا فتاة عمري 26 سنه ومتزوجه من خمس شهور.... مشكلتي بإختصار أنه حماتي عايشه معنا كون زوجي هو إبنها الوحيد وأنا لما أرتبطت فيه ما كان عندي أي مشكله أنه أمه تكون موجوده معنا لأني بنت بخاف الله وبعرف شو يعني أم وشو يعنى رضا الوالدين... وهالشي ما كان مسبب لي أي مشكله بس هلأ بعد الزواج كل شي تغير مو قادره أعيش معها بنفس البيت مخنوووووقه كتير ومو قادره أتحمل... طبعاً أحساسي أتجاهها ما تغير من فراغ... كنت أحكي رح أعاملها زي أمي وأكسب رضاها...وأيام الخطبه ما شفت منها أي سوء نية...

 

هلأ كل يوم بتحكي لزوجي طلقها وشو عاجبك فيها هاي بنت حرام لا شكل ولا دين طلقها وأنا مستعده أدفع مؤخرها.... يشهد علي الله ما طلعت مني أي أساءه أتجاهها بس زوجي كان يوقف معي وينصفني في أغلب الأحيان طبعاً هالحكي كششني منها وبطلت أطيقها وبصراحه صرت أكرهها لإنها بتغلط علي كتيييير وعلى أهلي ... واللي زاد الطين بلة إنها لما تزعل بتسب الرب وهالشي خلاني أكرها أكتر والله مو بيدي يا جماعه حتى مو قادره أقعد معها ع سفرة وحده... خلص كرهتها...

 

طبعاً زوجي بحكيلي إنه كل هالتصرفات من غيرتها وإنها ما كانت هيك بس أنا أكتشفت أنه كل عيلة حماتي ما بخافوا الله وخراب البيوت عندهم عادي من خلال القصص اللي كنت أسمعها منهم... هلأ أنا وصلت بيني وبين زوجي للطلاق لإني طلبت أنه أنفصل في بيت لحالي وهاد حقي أنا بنت بدي راحة بالي تعبت من الأهانات والسب والشتم على الطالعه والنازله... حقي أستقر...طبعاً زوجي رفض بحجه أنها أمه ورضاها واجب.. .بس أنا بعرف إنه لا طاعه لمخلوق في معصية الخالق .. أمه على عيني وراسي لكن ما لازم نسكت ع تصرفاتها الغلط ونسايرها في كل شي لأنه هي ما بدها تحل عني إلا ليطلقني وتخرب بيتي وبيت إبنها ...أنا ما بدي يقطع أمه ولا يهملها بدي كل وحده تعيش في بيتها معززه مكرمه وإلها مني أروح كل يوم والتاني أخدمها رغم أنه عندها خمس بنات... يعني هلأ مشكلتي يا الأنفصال عنها يا الطلاق لأني من حالتي النفسيه بلشت أهمل بيتي وزوجي وحتى أهلي حرمتهم من زيارتي بحجه إنها ما بتحب تشوف حدا... وآخر خلاف كان إنها بتتركني لما أطلع ع الشغل وبتدخل هي وجارتها ع غرفتي حتى تستفزني وغير هيك كتير....

 

شو هالحل؟؟؟؟ هل أنا أنانيه وظالمه لما خيّرت زوجي بين الأنفصال في بيت لوحدي أو الطلااااق...أرجوا المساعده وتحكيم ضمائركم ..