فضفضه‎

زاد الاردن الاخباري -

بسم الله الرحمن الرحيم..

أعزائي قراء ومعلقين زاد الأردن العزيز..أكتب لكم اليوم ليس مشكلة بل أكتب لكم فضفضه لأريح قلبي قليلا..

أنا فتاه عمري ثلاثين سنه الحمدلله حياتي روتينيه ممله من العمل للبيت ومن البيت للعمل ولكن هذا عادي بالنسبه لي ..

ما يضايقني هو كثرة تفكيري أفكر كثيرا بما يحدث من حولي وأفكر بما سيحدث ولماذا يحدث ؟..

عندما كنت طفله كنت اتمنى ان اكبر لأشتغل وأمتلك المال وأشتري سيارتي وبيت احلامي ولذلك درست هندسه لأنني كنت أفكر بأن المهندس والدكتور بالأخير بصير غني ولكنني كنت بريئه ولا اعلم أن ما احلم به هو عباره عن أحلام بل أوهام من الصعب أن تتحقق في زمن كهذا الزمن..

كل شئ حولي يكأبني ويحبطني حتى الناس أنفسهم تغيرو وأحوالهم تغيرت وتفكيرهم تغير..

اذا اتصلت بالناس لتطمئن عليهم فإما فلان مريض أو بالمستشفى أو فلانه اتطلقت أو زوجها بده يتجوز عليها أو اجاها سرطان أو سقطت اللي ببطنها أو ابن عم فلان دخل الحبس وعليه شيكات..

معظم أخبار الناس مصائب..

اذا نزلت للشارع وشفت الناس بزيد نكدك والله لما أشوف شبابنا اللي هم رجال المستقبل لابسلي جينز ساحل وبدو يوقع أو جينز مكسم (مثل الجزره) وحاططلي حلق بدانه ومفكر حالو زلمه وقاعد بتعلوك وقتها بحس حالي أزلم منه.. وبحزن ليش وصلنا لهادا المستوى..

بركب بالباص عالواقف و ولا شاب بفكر يقعد بنت وين ايام زمان وين ايام الخشونه..

وطبعا في مناظر بنات بالشوارع بصراحه ما بعرف كيف ابوها بسمحلها تطلع بهالمنظر ((لا حياء ولا خجل ومسخره بالشوارع)) والمشكله بتكون لسه بالمدرسه..

بتطلع من الشباك بشوف ولاد صغار حافيين يا ببيعو علكه يا بلمو علب بيبسي (منظر بخلي الواحد غصبن عنه ينكد)

مناظر بتحبط..بوصل للشغل وبكون المدير ما شاالله معصب طبعا لأنو السوق واقف وما في شغل وببلش يتفشش فينا بالموظفين واحد ورى الثاني ومسبات شي طالع وشي نازل عالشباب وعلى مسامع البنات ((عادي)) .. عشان يكمل سدة النفس ...

ولسه هادا المدير أحسن من المدير اللي بحكيلي (( انتي حجابك كله غلط وماإله داعي)) وبيقعد يتفلسف بالدين وهو ما بعرف شي بالدين...

بروح عالبيت بعد هاد المغص وبحكي تلفون مع صاحبتي بقولها قررت اتعلم سواقه فما بسمع غير استهزاء واحباط (( لويش بدك تتعلمي سواقه ليكون السياره صافه قدام الدار والله انك بتضحكي))..

بقعد عالتلفزيون بلاقي كل الأخبار اشي بسم البدن ولا خبر بفرح ولا بخلي الواحد ينبسط كلها أخبار دبح وقتل وفقر وجوع اشي بفجر..

أو بكون كله مسخره وتشليح وأغاني مستفزه ..

بتيجي مرت اخوي متقاتله وتشكي من زوجها..بتيجي اختي مش طايقه حماتها وعمايلها ..ابن اخوي واقع عن السور ومطبوشه ايده..

تاني يوم بتصحى بتلاقي قزاز سيارة أبوك مكسور ..ولا ولاد الحاره المؤدبين راسمين عليها لوحات فنيه لأنكم عارفين هي سيارة مرسيدس موديل سنتها ((مش كيا موديل التنكه))...

بتروح تدفع فاتورة الكهربا ولا المي بتلاقيها غلط (( يعني ما عرفو يغلطو غير معنا))

بتحاول تغير جو وتطلع على حدائق الحسين اللي ما في غيرها بتوكلك مخالفه بالطريق..

مش عارفه شو اللي بصير حوالينا.. ليش كل شي تغير بطل في بساطه وسلاسه بالعيش

بطلت الناس تتحمل بعض وناس كتير بطلت تخاف ربنا وعايشين كإنهم مخلدين ..

بفكر كتير بالموت وبفكر بعذاب القبر ووحدته وبأول ليله بالقبر وحيده ما معي حدا غير عملي اللي رح يقلب قبري روضه من رياض الجنه أو حفره من حفر النار ..

((اللهم إني أعوذ بك من عذاب النار وعذاب القبر اللهم إني أعوذ بك من فتنة المسيح الدجال وفتنة المحيا والممات))

وبفكر كيف لما الناس تظلم أو تنظلم وبقعد أتخيل كيف ربنا رح يحاسبنا..

بفكر بالأجيال اللي ورانا اذا احنا زمننا بالهاصعوبه كيف بدو يكون زمنهم.... في كتير شباب وبنات هلأ ما بعرفو عن دينهم شي وين الأهل.عنهم وليش ما فكرو يعلموهم امور دينهم ويعلموهم الصح من الغلط...

ليش في ناس صارت تافهه وما بتفكر غير بالكماليات والماديات والفلوس والمظاهر والفشخره وكان هالكماليات رح تشفعلها بقبرها.. ليش الناس ما بتفكر بآخرتها....

ليش بطلنا نحب بعض ..لا صديق بضله مخلص لصديقه وولا صديقه بتكتم سر صديقتها وولا زوج بتحمل مرته وولا زوجه بتتحمل طلبات زوجها..

معظم الناس بتعرف بعض للمصالح صار كتير صعب انك تلاقي حد يحبك ويحترمك ويساعدك بدون ما يكون في مقابل..

أنا بعرف اني احبطتكم وجبتلكم نكد انتم بغنى عنه..وانا بعرف متل مافي ناس عاطله في ناس منيحه..بس صارت الناس العاطله أكتر بكتير من الناس المحترمه المنيحه..

يارب ترحمنا برحمتك دنيا وآخر