أرشدوني

زاد الاردن الاخباري -

السلام عليكم ورحمة الله وبركاته جميع معلقين ومتابعين زاد الأردن ، أنا مشكلتي بإختصار شديد كالتالي:-
أنا فتاة عمري 27 سنة وموظفة، قبل يومين تقدم إلي شاب عمرو 32 سنة موظف وعندو بيت ووضعو منيح وأهلي سألوا عنو وكل الناس شًكرت فيه وبأهلو بس أنا إلي تحفظ على حاجتين:

أول حاجة: أنا بعد الزواج راح أسكن بشقة مجاورة لشقة إمو ، علما إنو أبوه وإموه الإتنين مرضى ومقعدين ، يعني مطلوب مني خدمتهم وأنا موظفة وحاسة حالي ماراح أقدر أقوم بهيك عمل على أكمل وجه لضيق الوقت.

تاني حاجة: إلو أخو مش متجوز وعمرو تقريبا بحدود الأربعين وعايش مع أهلو مصاب بمرض الصرع ، أنا ما عندي اعتراض وهاد الشي من رب العالمين بس أنا متخوفة من هاد الشي.

أنا خايفة أظلم حالي أو أظلمه أو أظلم أهله لو وافقت عليه وتممنا الزواج ، علماً إنو أخوي الكبير متشجع للموضوع وأمي متخوفة منو وبتحكيلي أرفضو للعريس.

ياريت تفيدوني بأرائكم لتنورولي طريقي وآخد قرار ما أندم عليه.

والشكر الجزيل لإدارة زاد الأردن وكل القائمين عليها إنها سمحتها أحط مشكلتي وكمان الشكر موصول لكل المعلقين والمتابعين لهاي الجريدة الرائعة.

والسلام عليكم ورحمة الله وبركاته.