كيف اتعامل مع حماتي

زاد الاردن الاخباري -

قصتي هيه انه انا امراه متزوجه من خمس سنوات واعيش مع زوجي بقطر ولا يوجد لدي اطفال .والحمدلله نعيش بسعاده غامره واتعامل مع دار حماي كانهم اهلي واعز كمان . فامي متوفيه فاعامل حماتي والله على ما اقول شهيد انها امي واحسن معاملتها ودائما اقول لها يا امي. الى هنا الكلام ممتاز ومافي شي . قبل كم شهر اتت حماتي عندي اجازه وجلست عنا تقريبا اربع شهور ونص والله عاملتها كاني بنتها واكتر من كل النواحي حتى كل الجيران كانو يفكروها امي وحتى زوجي كان يحكيلي انا ابنها وما بعاملها بنفس حبك وطيبتك مع امي . عندما رجعت هيه الى عمان احسست انه معاملتها معي اختلفت فاصبحت تتجاهلني عندما نتحدث معها بالتلفون او عن الطريق النت .
واللي اكد شكي انها متغيره علي وبطلت تتعامل معي كويس كمان انه
بعد ماهي سافرت بشهر وشوي
انزلت انا على الاردن عشان اعمل معامله كانت نزلتي ثلاث اسابيع
بهاي المده لم تتحدث معي نهائيا
ولما كنت احكي معها واتصل فيها تتعامل معي بجفاء
ومرات ماترد علي
ويتحججو اخوان زوجي انها بتصلي او طالعه ومامعها الموبايل
او انها وانتو بالكرامه بالحمام المهم وكنت اصر واحكي معها
يعني كنت ارن بعدها اكتر من مره بنفس اليوم
ولما كنت بدي اروح عندهم زياره تختلق ميه حجه عشان مااروح
مره عندها ناس ومره مش عارفه شو فحسستني اني غريبه
حتى مره زرتها انا وخواتي وزوات اخواني والله انها عاملتهم
.
احسن مما عاملتني والكل انتبه على هاي المعامله وسالوني انه في بينكم و بينها مشاكل قلت لا بالعكس


المهم رجعت على قطر وحكيت لزوجي اللي صار وبعد ما انا رجعت بيومين اتصلت وعملت مشكله كبيره انه انا ماحترمتها ومارحت غير مرتين عندها المهم زوجي قالها انتي كيف اتعاملتي معها قالت له لحقيقه وانه هيه مابدها تتصل فيني ولاتعبرني عشان تشوف انا بحترمها ولا لا وانها زعلانه مني
وقالت عني طبعا حكي مو صحيح وزوجي عارف ومتاكد انه الحكي مو صحيح وانه هيه كمان منعت اولادها وبناتها وكناينها يحكو يسلمو علي عشان تشوف انه انا بتصل فيهم واسلم عليهم ولا مع العلم انه انا اللي نازله من سفر مو همي

المهم انا بس ارجعت هون طنشت الحكي
وخليت علاقتي فيهم عاديه بس خليت فيها شويه رسميه لانه انا كنت معتبره حالي بنتهم وكنت تقريبا بالاسبوع مرتين او 3 احكي معهم تلفونات وشات و هلا بطلت

المشكله اني حاسه حالي كرهانه حماتي كتير
ومو طايقه اطلع فيها بعد اللي صار وبعد عده اسابيع انا نازله اجازتي السنويه شو اعمل؟ كيف بدي اتعامل معهم ؟ووالله الان لما بحكي معهم بحس حالي مخنوقه كف لما انزل على عمان واتقابل معهم وزيارات مشان الله قولولي شو اعمل

مع العلم انا مو محسسه جوزي هاد الشي يعني هوه بشوفني بحكي معهم طبيعي ومفكرني انه نسيت المشكله شو اعمل بعرف انها حماتي وبعرف انها ام زوجي بس الجرح بقلبي كبير لاني تعاملت كتير منيح معها وبما يرضي الله وهيه ما عاملتني لا بحب ولا باحترام