بدي أعرف ليش ما أثلجت؟

زاد الاردن الاخباري -

بقلم: محمد دعمس

يعني الموضوع اليوم زاد عن حده...الدنيا بدل ما تثلج وتكبس كبس زي ما حكولنا...شمّست وما أحلى نورها..

يعني هيك زادت الأمور عن حدها..مش قالو لنا فيه ثلج...؟؟؟؟

الشعب الأردني اليوم أثبت بكل ما تعنيه الكلمة انه بسمع كلام الحكومة...من كم يوم بنسمع إنذارات بسقوط زخّات من الثلج على المرتفعات.. ومن ثم تمتد لتشمل كافة أنحاء المملكة لتكبس كبسا على راس المواطن المكبوس أصلا...والشعب الأردني الطيب سمع الكلام وحضر حاله.

الإذاعات الأردنية المحترمة أتحفتنا على مدار أسبوع كامل بإنذارات كاذبة، فالمذيعة المحترمة فلانة الي بتتدلع ولا دلع جيسي كرم بزمانها بتئول: يعني ازا اتلجت كيف بدي آجي عالاستديو واحكي معكون ما بأدر ابعد عنكن...ياي علي أنا وصدقناها.

قالتلنا الحكومة ديرو بالكو ها...تدففّوا منيح تراها حتثلج...والشعب الأردني تحول لدبب قطبية قد ما لبس من أواعي اليوم

قالو لنا شيكو على سياراتكم... ترى الشوارع حتقلب زحاليق و تفحيط وقصص ولا شوارع موسكو....قلنا خلينا بالبيت أحسن وأريح.. ويارب يعلنوها عطلة.

قالوا زخات ثلجية متراكمة ترى ما تقولوا ماحكينالكو....جهزنا الكاميرات والكاستنا وعبينا كازاتنا بالصوبة وقعدنا عالتلفزيون وفتحنا على القناة الأولى الأردنية تنتفرج على حديقة التلفزيون الأردني مثل كل سنة.

قالوا الوضع حيكون مزري و درجات الحرارة متدنية..فتحنا على قناة روسيا اليوم تنعرف كيف بتعاملوا مع هيك حالات لأنه هيك تجييش خلانا بصراحة تخاف على الوضع العام في البلد.

حضرونا تنستقبل الزائر الأبيض....جهزنا الكستنا و فتحنا ستاير الدار من أول أمبارح عشان الأولاد يتفرجوا.

طول الليل وإحنا نحلم بصباح أردني جميل تكسو فيه حبات الثلج الأبيض الأرض وتغرد فيروز تلج تلج..لقينا الشمس سطحت وجوهنا من صباحية ربنا ولا فيه نقطة مطر حتى.

عالعموم كان لازم نعرف من الأول...أنها مش المرة الأولى.. الي بتحكيلنا الحكومة انها (حتثلج) ونستنى ونستنى وتتشكل لجنة ورا لجنة تتهم دائرة الأرصاد والدائرة حتتهم الحكومة والحكومة تتهم وسائل الإعلام واتت يا مواطن تضل تلف راسك هون وهون مش عارف على مين الحق لحد.......ما ييجي الصيف وتنسى القصة..

ونكتشف انه الحق مش عليهم.. علينا إحنا إلي صدقناهم

الحكومة أثبتت انه تقدر تحكي ألي بدها إياها... والشعب اثبت انه لا يملك إلا تصديقها فليس لديه خيار آخر

لا حبيبي لا يا عمري...فيه خيار آخر....فيه يوم جمعة...فيها صلاة الجمعة...وفيها كرتونه بيضا مكتوب عليها الشعب يريد إسقاط الثلج

لكن قد تستطيع الحكومة تدارك الوضع واليوم دون تأخير.. تحجز لنا على الملكية كلنا..تحجز للشعب الأردني كله...برحلة لجبال لبنان حيث الثلج الأبيض الجميل والأجواء الرائعة...لأنه انا زي غيري وعدت الأولاد يشوفوا الثلج ويمسكوه بأيديهم ويعملوا رجل ثلج يلعبوا فيه وما بقدر كأردني شريف أنه ما أنفذ الي قلته.

بس ما يودوا معنا إلي وعدونا بالثلج الكاذب..خليهم هم يتفرجوا علينا عالإل بي سي... خصوصا المذيعة المحترمة خليها (تنإهر)

انا هسه بدي اعرف ليش ما أثلجت...