خطاب الأسد الرابع .. مين سمير؟؟

زاد الاردن الاخباري -

بقلم: محمد دعمس

لا ...أكيد بتمزح ...ساعة ونص يا زلمة وانت بتسولف..ساعة ونص؟؟ ما بكفينا الأمراض إلي فينا ضغط وسكري تتيجي تكمل علينا ... هو احنا مابدنا نخلص منكو؟؟ ياخي بلاش تراعي شعور الي قاعدين على النت ولاّ التلفزيون وبتفرجوا عليك بس راعي شعور هالملاطيش الي قاعدين قدامك والي من حقهم الطبيعي أنهم يروحوا الحمام حتى ومش قادرين وماسكين حالهم خوف من مخابراتك الواقفة بتجحرهم...أصلا لو سمحتلهم كان كلهم قاموا عالحمام.. ياخي كان سوريا كلها قامت عالحمام لأنه كلامك (بـ...ي) الصراحة.

ساعة ونص يا عالم وهو بعيد نفس الحكي وكالعادة، فلسفة على طب على جغرافيا على فنتازيا وبرضه مافهمنا شو بده، هو كان يحكي اكيد لانه طالع منه صوت، بس...البقية عندكم.

يعني وهو بحكي في خطابه انا قمت للحمام أربع مرات، أفطرت، أكلت أربع جزرات وتفاحتين وبرتقالة، سولفت مع الشباب وعرفت قصصهم، حكيت خمس تلفونات، قريت الجريدة، أنزلت عالدكان واشتريت بسبع ليرات، وكل ما ارجع بلاقي الزلمة واقف وبحكي..بسمعله بلاقيه بحكي نفس الحكي الي تركته يحكي فيه.

من الواضح انه بشار ممنوع من الكلام في البيت... وانه مش (رجّال) البيت.....مبين إنه أسماء حاكمته ما بدها تنين يحكو فيها..وطبعا بالعيله الكريمة ما حدا معطيه مجال ليقول كلمة وحدة مش ناقصهم وجع راس مابكفي المظاهرات كمان هو بده يوجع راسهم... ومابقدر طبعا يطلع يحكي في الشارع مع أبو دياب مثلاً لأنه أبو دياب مستينه تينتف ريشه وريش الي خلّفه، فشكله نظامه واعده يحكي هالخطاب من أربع شهور وما صدق وعملها.. وقرّفنا حالنا وكسر كل الأرقام القياسية لخطابات الاخ العقيد معمر القذافي صاحب الخطابات الشهيرة.

القذافي... يا سلام على القذافي..... هو كان فيه زيه..والله الزلمة إنه كان نهفة..بكلامه ولبسه ونظاراته وعمامته، والله لو ضل عايش وحاكموه علني كان خفف علينا من حياة النكد الي عايشينها، كان يعطينا جرعات مرح ورقص وفرح في كل خطاب لإله، صحيح برجع بوخد هالمرح والفرح لما كتائبه تقصف قدام عينينا مصراته والزنتان بس عالأقل الزلمة علمنا شوية كلمات ستتوارثها الأجيال: زنقة، من أنتم، هذه حبيَبَتي بنغازي، الجرذان، غنوا وارقصوا واستعدوا، دقت ساعة العمل.. كلمات سأحدث ابني عنها مستقبلا إن شاء الله وسنضحك سويا عليها وأقول له انه كان عنا واحد اسمه معمر القذافي وكان ابن نكتة هيك هيك، أما هذا بشار شو بدي أحكي عنه، هو أصلا بعد إلي سواه بشعبه الواحد قادر يخلف؟؟

انا شايف انه خطاب بشار كان عقاب قاسي لكل من كان يستمع له في أرجاء المعمورة كاملة، وكأن الرجل أراد تأديبنا جميعا فطبع خطابه في صفحة ثم لخبط كلمات الخطاب ببعض وعاد وفعلها عشرين مرة فتجده يتكلم نفس الكلام لكن في سياق مختلف ويعاد مرة تلو الأخرى..وخليكم مش بدكن إصلاح والله لأوديكن عالعصفورية.

من الآخر كان ممكن يطلع ويحكي هالكلمتين بس: أنا آعد هون بالحمدية، إنتو الي أَحطوا من هون...ما حدا يتدخل بثوريا هاي بابا هداني إياها الله يرحمه ويبشبش الطوبة الي تحت راسه، أنا ملقيت دكتور يشوفلي مشكلة حرف الثــين ولهلا بلفظه ثـــين وأطلب في نهاية البرنامج أغنية يا ناموثة وينك وينك .......وثلامتكم من الهث هث.

انه الحق مو على بشار، ولا على أبوه ولا حتى لا أمه، من حقهم يخلفوا ويجيبوا أولاد......الحق على الدكتور الحمار عديم الضمير الي كان بهداك المستشفى قبل 43 سنة، لما شافه لبشار مطلع راسه وقتها كان لازم يدحشه لجوى ويقوله لك إرجاع إرجاع مافي طلعة ولا بجيبلك عمك رفعت.