مللت من حياتي

زاد الاردن الاخباري -

الأخوة والأخوات قراء زاد المحترمين,حابب اطرح مشكلتي عليكم عل وعسى الاقي حل مناسب عن طريق ارائكم
انا شاب عمري 28 سنه,متزوج من 4 سنوات وعندي طفلة عمرها تقريباً 3 سنوات,الحمدلله متعلم ومن عائلة محترمة,مشكلتي تكمن في بداية زواجي كانت زيها زي اي قصة شب ببدى عمره,قرض للعرس,التزامات ما بعلم فيها الا رب العالمين,الحمدلله جميع تكاليف عرسي وبيتي انا قمت فيها مما أضطرني اتحمل شوية ديون بأولها,زوجتي اجنبية من اصول عربية ومسلمة,اتحملت معاي بداية المشوار الي طال 9 شهور فقط لحد ما خلصت التزاماتي وديوني,لما لسا بلشت اوقف عاجري طلبت مرتي تسافر عند اهلها في اوروبا عشان تولد هناك,بداية الامر انا رفضت لكن بعدين قررت ابعتها عشان رغبتها بانه تكون امها لحظة الولادة,اجتنا المولودة وكل شي تمام ورفضت بعدها ترجع عندي عالاردن علماً انه رب العالمين فتحها علي من اوسع ابوابه,سافرت لعندها اكثر من مرة اقنعها ترجع معاي لكن بلا فائدة علماً اني روحي متعلقة ببنتي,انا من الناس الي بموتوا عالاطفال فكيف اذا كان طفلي!خلاصة الكلام وما بدي اطول عليكم اضطريت انا استقر عندها باوروبا بالبلد الي هي منها وانا خلصت دراستي فيها بس عشان بنتي علماً انا وهي كل يومين والثالث مشكلة ما الها اخر بعدين بترجع تعتذر,انا بصراحة مليت من وضعي وحاسس انه ماظل عندي مشاعر الها نهائياً ومش عارف شو اعمل,ما بدي ارجع عالاردن واترك طفلة وراي ما الها ذنب بشي...والله لا اذكر اخر مرة ضحكت فيها من قلبي وفقدت معنى السعادة في حياتي,في لوقت الحالي انا بشتغل شغلة منيحه هون لكن راتبي مو طايق على شي ,وبقولها نرجع للاردن بكون وضعنا احسن وبنربي بنتنا احسن ترباي وباحسن مجتمع وظروفنا بتكون احسن كون اني بقدر ارجع لشغلي السابق بالاردن باي وقت,بتصير تتذكرلي الاوقات الصعبة الي مرينا فيها والظروف السيئة,يعني بتتذكر الوقت الصعب لما كانت موجودة هناك وبتنسى انه الامور تحسنت بعد هيك. انا ما عندي ناس احكي معاه بهذا الموضوع لذلك قررت الجأ لقراء زاد على الله الاقي حل من طرفكم, وشكراً مقدماً للجميع