طبيب أردني : أنت مصدق كورونا؟

طبيب أردني : أنت مصدق كورونا؟

زاد الاردن الاخباري -

كتب الدكتور د. ثمين دربي في "فضفضة" عامية إلى جميع الأشخاص الذين يعتقدون بأن فيروس كورونا وهم:

أخي من جماعة "إنت مصدق انه في كورونا؟" نحن بحاجة ماسة اليك في مستشفياتنا هذه الايام. شبابنا و شاباتنا من الممرضين و الاطباء و الصيادلة و المهن الصحية المساندة و وعمال النظافة و التغذية وصلوا الى اقصى طاقتهم في العمل و نحن بحاجة الى متطوعين.

اولاً "كونك مش مؤمن بالمرض"، او بتفكر انه شغلة تافهة، او مؤامرة،. بدل ما تضيع وقتك في نشر افكارك على السوشيال ميديا و ابواب المخابز و المقاهي، تعال لراس النبع. الى المستشفى. فرصة انك تنورنا و تنور المرضى بنظرياتك عن كون المرض مؤامرة و مبالغ فيه. اتوقع مرضى العناية على اجهزة التنفس رح يكونوا اكثر ناس مهتمين لسماع وجهة نظرك العبقرية"

ثانيا، انت رح تكون المتطوع المثالي. كونك سوبرمان و ما في بعالمك كورونا و الموضوع عندك عادي و بتختلط مع الناس عادي و بتسلم و بتبوس و بتعمل تجمعات و حفلات، فوجودك معنا رح يفيدنا كثير، ممكن تقعد مع مرضى العناية الوحيدين المفصولين عن اهلهم، تواسيهم، تحكي معهم، تحضنهم، تبوسهم، تطبطب عليهم.

ثالثا كونك لا بتلبس ماسك و لا بتعقم ايديك، فانت متطوع مجدي اقتصادياً، انت ما رح تكلفنا ماسكات و لا كفوف و لا لبس خاص و لا تعقيم و لا فحوصات دورية. بتوفر علينا كثير مصاريف. رح تتحرك في المستشفى بحرية، انت الكورونا ما بتصيبك و لا حاسبلها حساب. تمام التمام. رح تنزل بمجهودك بس، و هذا اللي بدنا اياه.

بعدين يا اخي، المؤمن بفكرة لازم يطبقها على ارض الواقع و ينزل عالميدان، و هذا هو الميدان يا حميدان. هذا يومك،

المستشفى مليان ناس من المضحوك عليهم بفكرة انه في كورونا و قاعدين يا حرام بشتغلو ا ليل نهار على الفاضي. و في ناس كثير في المستشفى عم بمرضوا و بدخلوا العناية المركزة و مصدقين انه مرضهم من الكورونا. و في كثير اهالي بنتظروا امام ثلاجة الموتى ليشوفوا اهلهم من بعيد و هم مفكرين انهم ماتوا من الكورونا. آن الاوان ان تتحرك يا صديقي و تفهِّم هدول الناس كلهم غلطهم و توعيهم.

احنا اسفين. كنا غلطانين. إحنا بحاجة الك يا "إنت مصدق؟". انزل على المستشفى و الطواريء و العناية المركزة و تطوع مع الكوادر و اثبت وجهة نظرك. ممكن تكون انت الصح و احنا الغلطانين.

---