شكران عن حادثة نانسي: كل شغلة بينسب كل السوريين

شكران عن حادثة نانسي: كل شغلة بينسب كل السوريين

زاد الاردن الاخباري -

أعلنت الممثلة شكران مرتجى عبر حسابها على تويتر موقفها الواضح من حادثة تعرّض منزل نانسي عجرم للسرقة بالقول: “أنا ضد الجريمة، أكيد ضد التعدّي عالآخرين، وبتمنى السلامة للنجمة نانسي عجرم وعائلتها الكريمة، وانا بحب لبنان ورفقاتي أغلبهم لبنانيين غاليين ودايماً فاتحين قلوبهم مو بس بيوتهم وبحبهم كلهن كلهن”.
إلا أن شكران استنكرت بعض ردود أفعال الذين هاجموا أصحاب الجنسيّة السوريّة وقالت: “مو كل شغلة بينسبوا كل السوريين متل ما كان قبلهم الفلسطينيين . عزيزي وعزيزتي اللي عم تشتمي بأبشع الكلمات، وخليهم ينقلعوا من عنا، والله رح ينقلعوا والله هانت، بس بتعرف وبتعرفي إنه في مليارات الدولارات للسوريين بالبنوك اللبنانية العزيزة محجوز عليها، وانه الدولار بسوريا صار بشهرين قد ما صار بعشر سنين حرب”.

وتابعت: “ما بيكفي عنصرية عند البعض، ما في حدا من جد جد جدك سوري والعكس، لك كل شي بيصير بسوريا بينعكس ع لبنان والعكس كمان، مو كل ما صار شي السوري بلبنان بدّو يتخبّا، مو حرام بيكون عنده علاج او سفر او شغل بيخاف يطلع بسيارته لتتكسر؟ ايمتى بدنا نطفي النار ما نشعلها؟ ايمتى بدنا نرحم بعض ليرحمنا الله؟ ايمتى بدنا نبطل تشفّي بوجع وجثث بعض؟”. وأضافت: “انا مع العدالة ومع الحق بس مو مع التعميم. كم سنة عم نسمع ونقرا مسبات واهانات وتحقير ماحاج والله حاج والله حاج. في بسوريا فنانين ورسامين ونجوم ومصممي أزياء وكتاب وشعراء. لك نحنا بلد زنوبيا ونزار قباني وصباح فخري وميادة حناوي وأدونيس وفاتح المدرس ودريد لحام ونهاد قلعي وسهيل عرفة وعبد الفتاح سكر منى واصف غادة السمان وألفت إدلبي كوليت خوري وملايين العظماء”.

وختمت بالقول: “أكيد كمان أنا ما عم عمّم، عم أحكي ع اللي عم يحكوا، واذا غلطانة سامحوني بس تعبت شوف مسبات، اذا غلي كيلو الكوسا بينسب السوري، وأكيد ما بقبل بهالبوست وغيره ينشتم حدا من لبنان او اي بلد عربي، بس تعوا نحنا الفنانين المثقفين الواعيين المواقع الفنية الصحافة مو مشان سكوب نحط عنوان بيجرح ملايين لك ما بعرف اللي بيحب الله حاج نسب بعض”.

وأكدت شكران أنها: “ضد السرقة والقتل والاغتصاب وكل انواع الجريمة واللي عم يعملها بيمثل حاله مو شعب وكل السوريين مقهورين وبيزعلوا من هيك شي وانا مالي علاقة في محاكم وأمن وجهات مختصه مالي عم برئ حدا، همنا واحد وجعنا واحد، أدين اللص والقاتل ولا أدين جنسيته”.