اهمال, عين, خطيبتي أم ماذا ؟

زاد الاردن الاخباري -

ارجو مِن من يستطيع النصح والمساعدة أن يساعدني في مشكلتي,,,

أنا طالب في احدى افضل الجامعات في الاردن ولله الحمد ,كان من اهم طموحاتي اثناء الثانوية العامة هي دراسة الطب ولكن للأسف معدلي نقص عُشراً واحداً عن اقل معدل قُبل في الطب
طبعاً كانت صدمة لي , ولكنني عقدت العزم على اعادة التوجيهي للحصول على معدل أعلى فنصحني احد الدكاترة ان ادخل دكتور صيدلة لأن موادها أول سنة مشتركة مع الطب وبنفس الوقت أُعيد التوجيهي ,,,, طبعاً كانت فكرة مجنونة ,,, بس كل شي كرمال التخصص اللي بتحبه بهون
فقررت اعملها مع انو بدها هز كتاف و شدة حيل كبيرة ،،، وقررت اخليها سر بين اهلي بس حتى ما اسمع أي كلام مثبط لأنو بدها دعم و رفع معنويات
حتى اقرب اصدقائي ما كان يعرف من مبدأ ( استعينوا على قضاء حوائجكم بالكتمان )
فعملتها ,,, وكنت اداوم بالجامعة , وبس اخلص فوراً ارجع البيت ادرس المواد اللي اخدتها , وبعدين ادرس للتوجيهي , مع العلم انو تغيرت مواد التوجيهي الجدد عن مواد سنتي القديمة

والحمدلله مشيت , وجبت معدل عالي بالتوجيهي , و بنفس الوقت جبت معدل عالي و من اعلى المعدلات بالصيدلة ,,, توفيق من رب العالمين
و دخلت طب وكل شي تمام ,,,, بس عرفت الناس , كلها صارت تحكي عن العملته و تمدح فيّه ,,, بس كأنو هون انضربت عين ,,, بهل وقت تعرفت عبنت حلال و عجبتني بدينها و اخلاقها ,,, وقررت اخطبها لما اخلص السنة الثالثة طب ,,,حكيت لأهلي ووافقوا و حكيت مع اهلها و ما كان في مانع
والبنت كانت موافقة برضو ,,,, البنت كانت تعرف وضعي , وانه ما راح أقدر اتزوج لحتى أكمل دراسة , وكانت تحكيلي موافقة تستناني
و للأسف الشديد وقعت بحبها , وكنت جداً مخلص إلها , وما بحكي أو حتى بتطلع على أي بنت بالجامعة إخلاصاً إلها , مع إنو هي بتدرس بجامعة ثانية وما رح تعرف اذا حكيت مع بنات أو لأ ,,, بس اخلاص داخلي ,,, لهون كل شي منيح , وأول سنة مرت عخير , من كل النواحي الدراسية والعاطفية
اجت نقطة التحول بحياتي
سألتني مرة عن حياتي بالمدرسة , انو هل عمرك حبيت أيام المدرسة حكيتلها انو حبيت وحدة بس ما صارحتها , لأنو بالأخر عرفت إنو هاي بنت مش منيحة, يعني اعجاب من طرف واحد مش حب ,,,,من يومها تغيرت البنت معي
صارت تحكيلي انت أكيد بعدك بتحبها , وزعلت مع انو حلفتلها بالله ١٠٠ مرة انو بطلت أحبها من زمان ,,, و تركتني و صارت تحكيلي أنا شو جابرني أستناك لحتّى تخلّص وانا كل شهر بيجيني كذا عريس

تركنا,او بالأحرى تركت,,,ضلّيتني مصدوم من عملتها, من يومها انقلبت حياتي , رسبت بالسنة , كنت محافظ على صلواتي الخمس من لما كنت طفل و النوافل , بس تركت الصلاة , وللأسف كمان ادمنت المواقع السيئة على النت , راح شغفي للدراسة, بطلت أدرس ,صرت اعق الوالدين , رجعت احكي مع بنات , تراجع ديني , علمي, اجتماعي , اخلاقي ,,,فعلاً مصدوم , البنت المتدينة الخلوقة عملت فيي هيك ,,,البنت كنت متيّم فيها , وما كنّا نطلع مع بعض عشان الحلال والحرام , وكل حكينا تحت علم اهلها
 ,,, مش عارف شو صار ,,, هل هي حسد او عين ,,, هل هو تقصير,شو السبب الحقيقي انو تركتني ؟ ,,,هل الغلط اني قررت أخطب و اتزوج و أنستر ,,,هل الحل أدور عبنت اخطبها عشان تنسّيني الصدمة اللي انا فيها,,,
 ,,, كان طموحي اكون من افضل الأطباء بتخصصي بكل العالم, و أفيد أمتي ووطني  ,,, بس للأسف اذا استمر وضعي هيك رح أطلع دكتور فاشل
 شو أعمل احترت , حتى والدي الرجل بكى عوضعي ,,,  وين طموحي , وين همتي , وين عقلي 
يا حسرتاه على ما فرّطت في حق ربّي و اهلي و نفسي
حسبي الله و نعم الوكيل