نادمة جداً

زاد الاردن الاخباري -

انا فتاة عمري 25 سنة، قبل حوالي سنة أجا موظف جديد عنا عالشغل، الكل كان معجب فيه لأخلاقه واتزانه ، وانا صراحة كنت وحدة منهم، لحتى بيوم من الأيام صارحني انه بده يتقدملي ويخطبني ، انا فرحت كثير وخصوصا انه كثير بنات بالشغل كان حاطين عينهم عليه، قبل الخطوبة صارحني انه عنده مشكلة بالخلفة، بس هي بسيطة وبتتعالج بالأدوية، وقال انا ما كنت بدي خبرك، بس واجبي أحكيلك ، وأكد على أنه الموضوع ما يطلع لأي حد لأنه كرجل ما بحب حدا يعرف خصوصياته على حد قوله، المهم انا صراحة ترددت وخفت كثير وصرت شك انه يا ترى ممكن يكون كلامه مش صحيح، طيب لو ما معه شي ليش حكالي، ومن هالأفكار، وفي النهاية حكيت لصاحبيتي بالشغل وحلفتها ما تحكي لحد، وقالت انه شي طبيعي وبجوز عنده مشكلة بسيطة مثل ما حكا ولا تخافي وترددي، بعدها بيومين أجا عندي على المكتب وكثير كان معصب، وقال: طعنتيني بظهري ، وأنا اللي وثقت فيكي، أنسيني وما بتستحقي ارتبط فيكي، هاد الحكي قبل أسبوع، ومن يومها ما عاد حكا معي وصار يعمل حاله مش شايفني، وانا كل يوم بروح عالشغل وبصير أبكي، وسمعت انه رح يرتبط بموظفة بنك، وانا كثير ندمانة وحبيته من كل قلبي،، بس خلص لحظة ضعف وصار اللي صار ، والمشكلة انه هو عصب كثير واعتبرها إهانة ، وجد مش عارفة شو أعمل، كل ما شوفه بصير أبكي ، يا ربي جد تعبت