ارجو مساعدتكم .. !!

زاد الاردن الاخباري -

بسم الله الرحمن الرحيم

تحية إلكم جميعاً يا معلقي وقراء زاد

بطرح مشكلتي عليكم وكلي أمل أنكم تتفهموني وما تفهموني غلط

أنا شب عمري 23 سنة أنهيت دراستي بنجاح والحمدلله الآن موظف وأموري فوق الريح الحمدلله بشتغل بكل طاقتي لحتى أكون نفسي وأجمع راس مال كافي لحتى اقدر أبدأ مشروعي الخاص.

 أنا من يوم يومي ما عندي استعداد أحب أي بنت نهائياً لأني حبيت قبل هيك وخسرت يلي بحبها بسبب رفضها للزواج مني لأني مش من بلدهم وبالإضافة لأني لسة بكون بحالي وهذا الحكي وأنا سنة أولى جامعة وكنت أيامها لسة مش مدرك الدنيا وكان تفكيري يا دوب على قدي ومن يومها قررت ما أحب نهائيا أو أفتح قلبي لأي بنت وبالنسبة إلي الحمدلله أنا مظهري جميل ومهندم باللبس ومؤدب كثير ولبق بالكلام وبنات كثير بيحبو صحبتي ورفقتي واتعرفت على بنات كثير بأيام الجامعة وكنا زملاء وأصدقاء كثير نطلع ونروح ونيجي وننبسط ونضحك ودائما مبسوطين لكن معرفتنا كلها صداقة قوية مش أكثر لا فيها حب ولا وجع راسع وما عمري غلطت أو قليت الأدب مع أي وحدة فيهم وهذا مستحيل نهائياً لكن في بنت منهم بدأت تتعلق في كثير وتساعدني كثير وتهتم في لأبعد الحدود وأنا شعرت بهذا الأشي وعلى الفور صارحتها وحكيت معها أنو انا شاعر بـأنك بتحبيني ومتعلقة في وحذرتها من هذا الأشي لأني مجرد صديق ومستحيل احب أي انسانة في الوقت الحالي وما بفكر بالحب وشايلو من راسي وقالتلي لأ وما بحبك وعادي واحنا اصدقاء ولا تفهمني غلط المهم بتمر الايام وبتيجي ايام والبنت رجعت مثل اول وزيادة صارت في كل مكان بأي مكان بتطلعلي على  التلفون ومن وراها صرت 24 ساعة اعملو صامت وعلى الفيس بوك وعلى المسنجر وفي الطلعات بتلزق بأهلي لدرجة انها عملتلي كابوس صرت لما أشوفها أشوف العمى لكن بتحمل وما بدي اكسر بخاطرها وبعمل انو عادي وما في اشي وبتصرف على طبيعتي حتى لا اجرح شعورها وبنات كثير حكولي انها قايلتلهم انها بتحبني وتعبانة كثير لأني تقريبا ابعدت عنهم كلهم لحتى اتجنبها وبنفس الوقت ما بدي اجرح مشاعرها لكن مش ذنبي لأني عمري ما قلتها كلمة بحبك أو حكي رومنسي أو غزل لا معها ولا مع اي بنت ومن فترة بتحكيلي انت ليش هيك بتعاملني وصاير تتهرب مني وما عدنا شفناك من زمان. أنا هسة بدي أي حل أني اقلها اني ما بحبها أو بالأحرى أصبحت مثل الكابوس علي لكن بنفس الوقت ما بدي أزعلها أو اجرح مشاعرها وأظهر بنظرها أنو أنا شرير او حقير لأني عمري ما كذبت أو قلتلها اشي عن الحب أو عاملتها برومنسية
 
رجاء خاص أنا بدي مساعدتكم لحتى اخلي البنت تنساني نهائياً وما تفكر في وكمان ما بدي اجرح البنت وبنفس الوقت ما اكون بنظرها حقير او مثل باقي الشباب الغدارين وبرجع وبكرر اني ما عمري عاملتها او قلتلها بحبها او من هالحكي وكل تعاملي مع جميع البنات كصديق فقط لا غير
 
شكرا الكم وطولت عليكم