حـيرانة !!!

زاد الاردن الاخباري -

السلام عليكم ورحمه الله وبركاته
بالبدايه بحب اشكر موقع زاد ...  وبشكرهم على المجهود الرائع ...
 
بالبدايه يا اخوان بحب اعرف عن حالي ,انا بنت عمري 21 ولسه بدرس بالجامعه .وصراحه مش عارفه من وين ابدا بالكلام لاني انا نفسي حيرانه ومش عارفه شو مشكلتي ,بس رح احاول وانشا الله اقدر اوصل اللي  حاسه فيه.

 

 مشكلتي بدأت بعد التزامي بفتره ,انا قبل ما ادخل الجامعه ماكنت ملتزمه كتير  .
وبس دخلت الجامعه وبدون تفاصيل ربنا انعم علي وهداني  وحسيت حالي كنت بغيبوبه وصحيت ,كل تصرفاتي تغيرت وكل شي فيه اتغير  واكيد ما حد رح يقدر يفهم اللي انا حسيت فيه الا انسان عاش نفس التجربه.. يعني باختصار حسيت بطعم الايمان بكل جوارحي وكانت احلى فتره بحياتي وضليت على هالحال 3او4 شهور وبعديها بدا هاد الشعور يختفي شوي شوي وكان كل همي اني اعرف شو السبب واصلحه وبدات رحلتي باني اعرف كل شي عن الدين,قرات كتب الفقه والاحاديث وسمعت محاضرات واسألت شيوخ وما خليت اشي يعتب علي لدرجه اني كنت كل يوم اقرا كتاب كامل والسبب الوحيد هوه اني مستحيل اسمح لحالي ارجع زي ما كنت قبل التزامي وكنت مستعده اتخلى عن كل شي بس ما افقد احلى شعور حسيته بحياتي لدرجه انو هاد الشي اثر على دراستي كتتتتير وكل اللي حولي كانو يحكو عني انجنيت ولكن مع ذلك كان ديني اهم شي عندي .
 
بس مشكلتي  اني مع كل اللي عملته ما ارتحت وصرت احس اي عباده ثقيله علي وبطلت احس بحلاوه الايمان وما صرت احس بقربي من ربنا زي ما كنت زمان وكنت مفكره انو بعد كل اللي عملته رح يزيد ايماني بس العكس صار ,ومن وقتها ولحد الان وانا مش عارفه شو اعمل والله اني مش حاسه انو لهالدنيا طعم والا حاسه انو في فايده من عيشتي كلها , انا فعلا نفسيتي اتدمرت ودايما حاسه بالهم والغم ومع ذلك بحاول مع حالي كتتير , والحكي هاد صرله سنتين وانا بحاول وبحاول لحد ما تعبت انا فعلا تعبت ,,سؤالي لاي شخص مر بنفس التجربه لانه يمكن يكون فاهم عن شو انا عم بحكي وحاسس فيه ,,هل هاد الاشي طبيعي ؟والا  هاد ابتلاء من رب العالمين والا انا يمكن الغلط فيه؟؟؟

 

نفسي اعرف وين المشكله لاني فعلا احترت بحالي ومش عارفه شو اعمل !!!!! 

يا ريت ما حد يبخل علي بمعلومه ممكن تساعدني  ,وبكون شاكره الكم جميعا ..