خطوبتي دمرتني،،،،

زاد الاردن الاخباري -

اعزائي اطرح المشكلة وانا في غاية الملل من هذه الحياة
 
 
مشكلتي كالتالي
 
انا فتاة ابلغ من العمر 30 عاما متعلمة وجميلة  المشكلة كانت انه ارتبطت اول مرة يعني خطوبة وكتب كتاب وكان عمري 18 مباشرة بعد التوجيهي
 
خطيبي كان كتير يحبني بس صارت اختلافات كتير بينا ادت الى فسخ الخطوبة اهم الاختلافات انه انا شخصيتي قوية وهو عكسي تماما شو ما بحكيله اعمل بيعمل
 
حسيت انه انا مابدي زوج بهاي الطريقة يكون بدي زوج يتخذ القرار معي يكون قوي الشخصية وهيك المهم انتهت خطوبتي،،،،ضليت بدون اي ارتباط لحد ما صار عمري 21
 
في هاد الوقت اجا اتقدم لخطبتي شخص اخر عكس الاول تماما سالنا عنه والجميع اشاد به بس رجاء ما حد يضحك هون
 
باختصار لانه هاد طلع عكس الاول تماما يعني مو بس شخصية قوية لاء اهله كلهم بيحسبوله حساب،،، كلمته ما بتصير تنتين،،،خواته بيموتوا خوف منه بس معي بالاول كان عادي
 
بس بعد هيك صار يستفزني بطريقة مقرفة وما بتتحمل وصلت لمرحلة خلص مش قادرة حسيت انه ربي بينتقم مني مشان خطيبي الاول بالموووووت لما اهلي رضيو يخلوني افسخ للمرة التانية
 
طبعا انا كمان ما كنت مبسوطة كنت كتير مدايقة من حظي ومن اختياراتي الغلط ومن الي بيصير الي ،،، بعد الفسخ قررت اكمل دراساتي العليا
 
وكملت ونجحت بجدارة والحمد الله بس هلا شو عم بيصير الكل عم بيدايقني لانه لهلا ما ارتبطت طبعا من اهلي من الناس ،،، يعني ما بشوف حدا ما خطبتي ما تجوزتي
 
المشكلة الي صايرة بس يجيني عريس بتتخربط كل الامور وبتخرب كيف ليش ما بعرف اهلي بيحكولي يمكن خطيبي الاول عاملي اشي لحتى ما اتجوز يعني انتقام للعلم خطيبي الاول اتجوز ورجع طلبني بعد ما اتجوز وبيضل يحكي ل ماما نفسي ببنتك...صار الي نفس خلص عشان اخلص اتجوز مين ماكان  ،،،،بعرف اني متعلمة وهيك بس فرصي بحسها ما عم تيجي متل ما انا بدي
 
يعني بيجيني الاقل وانا بحس انه لازم اخد حد على الاقل مخلص دراسة جامعة  كوني انا دراسات عليا،،، بس الي بيصير العكس حتى دبلوم ما معهم الي عم بيتقدمو الي هلا،،، شو اعمل اوافق عمين ما كان،،، ولا شو اعمل والله زهقت من الي بيصير الي بس للعلم انا من النوعية الي ما ببين يعني بضحك وبمزح ومش محسسة حدن اني مدايقة شو اعمل ارضى بمين ما كان بس مشكلتي اني طموحة وبدي دايما الاحسن وخايف يجي وقت ما الاقي في حدا.دلوني على الحل