يوميات مواطن غلبان ..

زاد الاردن الاخباري -

ليلة الامس زارني صديقي المتشائم كثير الحكي ليلاً لقضاء (التعليلة ) عندي مع بعض الاصدقاء ، وبطبيعة الحال كانت افتتاحية التعليلة صب القهوة السادة للضيوف وبعد ذلك بدأ الحضور بتجاذب اطراف الحديث .
ولكون موضوع الساعة هذه الايام هو دعم المحروقات ... بادرني صديقي المتشائم بالسؤال : ها يا الاخو ... انت قدّمت طلب دعم المحروقات والاّ راحت عليك ؟ قلت : والله يا الاخو ... احنا على نية انه الولد قدمنا طلب صرف الدعم على الانترنت وهاظ احنا يا خوك ننتظر فرج الله ... عسانا عن قريب نقبض دعم المحروقات ... قلت : وانت يا خوك ... ويش صار معك ؟ عساك ما نسيت تقدم الطلب .... تنهد صديقي وقال ... والله يا خوك احنا ما نعرف لا انترنت ولا فيس بوك ولا غيره ... حنا يا خوك غلابا على باب الله ... والله ما تذكرت موضوع الدعم غير اخر يوم ... ولو تدري ويش صار معي يا خوك اخر يوم ! قلت : خير ان شاالله عساك رحت وقدمت الطلب ؟... عساها ما راحت عليك ؟ قال : آآه يا خوك لا... رحت بس آآآه ... يا ليتني ما رحت ولا جيت ! ... انا يا خوك صار بي مثل (قصّاص الكلاب ) ... يقصّ( بشلن) ويغسل بدينار ..! ، قلت : يا ستار.. خير ان شاالله ويش صار معك ؟... قال بعد ان عدل جلسته واخذ وضعية من يقدم محاضرة : خيّوه .. لد علي جاي .. الي ما اله حظ لا يتعب ولا يشقى ... آخر يوم شلت دفتر هالعائلة وحملت حالي بوجهي على مكتب البريد ... وصلت ونها يا خوك (طعّــــة وقايمة ) ! ... طابور من هان لبلعما ... المهم صفّيت بالطابور يجي له ساعتين ثلاثة لما وصلت للموظف ... واسحبلك دفتر العائلة من جيبتي واصلخه على الطاولة قدام الموظف وصوت (مطعة ) الدفتر على الطاولة تقول قزوزت بكم ديزل مخزوق ... لد علي الموظف بطرف عينه وقال : وين هويتك ؟ ... يوم سمعت السؤال تقول انك كاب علي ميّه ! تذكرت اني نسيت الهوية بالبكم والبكم ركبها ولدي مهاوش وقوطر يم الحلال شرقي المفرق وانا بالزرقا ما معي سيارة! ومهاوش ما معه تلفون ! والدنيا تشتي ... كبّ من الرب يا خوك ... لديت على الموظف وقلت له : يا ابن الحلال الهوية مهي معي الحين ... واليوم آخر يوم دبّرها من عندك الله يرحم والديك ... قال لي : لا خيّووه ما ينفع لازم رقم الهوية ... يا رجل وحد الله ... قول وغيّر ... حط رجله بالحيط ! ... (عبّوود والليالي السود ) ما يمشي الطلب غير بالهوية ! ويوم شفتها متنحة يا خووك حملت حالي وطلعت على الشارع ووقفت سيارة وخذيتها طلب للمفرق ... روحة رجعة يا خووك ... المهم لقيت مهاوش شرقي المفرق وخذيت الهوية من جيبة الفروة اللي بالبكم وقوطرت راجع على الزرقا ... قاطعته قائلا : يا رجال كان رحت على بريد المفرق اسرع الك ! قال : يا خووك مهو من رداة حظي انعمى ظوّي ...وبعد اتذكرت اني لاجل الحظ نسيت دفتر العائلة بمكتب بريد الزرقا ... شفت ردات حظ اكثر من هيك ؟ ! ... المهم ... وصلت الزرقا وبوجهي على البريد وصفّيت بالطابور ... سألت عن دفتر العائلة ما لقيته ... بلوى ... تلبسنا مشاوير وتبليغ وغرامات ... وصلت للموظف وقلت له هاذي الهوية ياخوك ودي اقدم للدعم ... قال : يلزم رقم فاتورة الكهربه وفاتورة الميّه ... فنطلت عيوني بيه وقلت : ولويش خيّوه ويش دخل فواتير الكهربه والمية بالدعم ... قال هاظ اللي جاك ... لازم الفواتير ولا ما يمشي طلبك ... استعنت على الشقا بالله وحملت حالي بسيارة على الدار رايح راجع – مشان الحق حالي – بعد تدوير وتلطيش لقيت الفواتير المطلوبة .. وبوجهي على مكتب البريد ... وصلت مع آخر الدوام ... وسلمت الطلب ... والله يا خوك لو اني ما طلعت سبع من الرجّال كان ما قبلوا مني الطلب نهاية الدوام !
بادرته : ودفتر العائلة ... ما لقيته ...قال : ما لقيته يا خوك .. ما لقيته ... ثاني من يوم ( زمّيت حالي ) وبوجهي على المركز الامني ... بلّغت عن الدفتر وبعدين على الاحوال المدنية ... دفعت غرامة ثلاثين نيرة يا خوك ... هاظا غير حق الصور والطوابع واجار كاتب الاستدعايات يا خوك ! ... قلت : وعساها موفيّة معك هالسولافة يا بو مهاوش ؟! قدّيش يطلع الك دعم بالك ؟! قال والله ما ادري هو يطلع الي دعم والا ما يطلع .... الله يستر ما يروح تعبي بووش ! قلت له : لا طمّن بالك اذا ما طلعلك دعم هاليومين... فيه مرحلة اعتراض ... قال: وين الاعتراض ؟ قلت / بعمأن ... فطّ ابو مهاوش على حيله وصاح : لا يا خووك ما ارووح ... ما ودّي الدعم ... سقا الله ايام الحطب وحمل القرب وركوب الخيل والبعارين ... ما ودّي دعم محروقات خيوووه... ما ودّي ايّاه !!

صالح ابراهيم القلاب