لست بخيلا ..

زاد الاردن الاخباري -

مشكلتي يمكن  للبعض ان لا تكون لمشكلة، بس فعلا أنها كثير مضايقيتني ، أنا شاب عمري 27  سنة بشتغل بأحد البنوك، وراتبي كثير منيح. من حوالي 6 أشهر حصلت على ترقية بالشغل وزيادة بالراتب ومن يومها صارت علي حرب من زملائي بالقسم، أكثر شي جلطني أنه طلعوا علي إشاعة لكل البنك أنه أنا بخيل، في البداية كانت مزحة بعدين صارت جد وصارلها القصة 6 شهور.

المشكلة كمان أنه أنا اكثر واحد بصرف فيهم ، يعني الساعة اللي لابسها ثمنها 200 دينار ، العطر اللي بستخدمه حقه 120 دينار غير البدلات واللبس والسيارة ومع هيك نجحوا بحركتهم الحقيرة.

اللي جلطني أكثر تقدمت لخطبة بنت، وأجا أبوها سأل عني ، والمشكلة سأل بالقسم اللي أنا فيه ، وشكلهم حكوله أنه أنا بخيل ، أنا كثير معصب يعني لو كان الوصف صحيح ما بزعل وما بتفرق معي بس المشكلة أنه كذب ونفاق بس سبحان الله  الناس بتحب الحكي والحسد.

جد مش عارف كيف أتخلص من الكذبة الحقيرة مع العلم أنه بدأت بمزحة بعدين بإشاعة وبعدين استلموني بهاي الصفة وأنا بعيد كل البعد عنها وهما عارفين هالشي بس حتى يتعمدوا مضايقتي، أما توصل الحقارة أنهم يحكوا لأهل اللي بدي أخطبها، جد مقهور ومش عارف كيف أحل هالمشكلة.