(عقول مستعمله للبيع .. ساخر )

لكاتب : برهان جازيه


قرأت خبر عابر ان هناك بالمستقبل يوجد أمكانيه تركيب راس بني ادم على راس بني ادم ثاني ... اي الاعضاء الاخرى غير الراس ستكون مجرد اداه لأله العقل .. هو يفكر ويستنبط ويتخذ القرارات .. وباقي الجسد سيتبعه وينفذ .. من أنت ؟
أنت ؟ ... حقيقة من أنت ؟ .. صاحب الراس هو أنت ؟ .. أم انت صاحب الجسد هو أنت ؟ ...
من يتذوق ؟ ... او يشم ؟ ... او يرى ؟ ...او يحس ؟ ... او يخطط ؟ ....انت ام صاحب الرأس؟ .... الاستحمام ... من يشعر بنشوة النظافه .. العقل ام الجسد .. ام كلاهما معا ... اذا تعارضت رغبات جسدك مع رغبات الرأس الجديد ... من يطاوع من ؟ .. من يتنازل لمن ؟ ... ام سيدخلون بصراع اقليمي او طائفي او عرقي ( اذا كان الرأس عربي طبعا) ؟... اذا ظهر هناك تمرد من الجسد وظهر عناد من الرأس ( العقل ) هل الرأس سيغمض عينيه لكي يجعل الجسد أعمى ؟ ... ام هل الجسد سيسمر اقدامه رافضا اوامر العقل ( الرأس) بالحركه ؟ ....
كيف سيعيش هذا الأنسان ؟ ... بوسيط او بوجود طرف ثالث ؟ ....اذا دعيناهم لمائدهة الحوار .. ووافق العقل ورفض الجسد هل من الممكن ان يدخل الرأس رأسه الى قاعة الاجتماعات والجسد يبقى (معصلج ) على الباب رافضا الدخول .... او العكس .... اذا جاع الجسد ورفض الرأس ان يعطي اوامره للأكل ... ايهما له قدره على التحمل ؟ ... في حين ان ( المعده ) تابعه للجسد ... قضيه شائكه ... المسأله ليست تركيب الرأس على الجسد .. القضيه هو ما مدى التوافق واستجابة كل منهما للأخر .... ولا يوجد بالكون شخص يشبه الاخر .. مستحيل ... اذا المسأله تحتاج الى اطباء ماهرين ( جراحيين ونفسييين ) .
هذا الأنسان الجديد .. ما علاقته بالمحيط الذي حوله ؟ ... ما هي اليه التعامل ؟ .... ما مقدار الاستجابه ؟ ... اذا كان الجسد تعود على ان يتحرك ( بتطرف ) ... والرأس يحمل افكارا بها ( اعتدال ) هل من الممكن ان يتخذ الرأس او العقل قرار بقطع رأسه ليتخلص من الجسد ؟ .... واذا العكس هل يطعن الجسد نفسه لينتحر أخذا معه الرأس الى القبر ؟ ...
من أنت ؟ .......
صدقا من تكون أنت ؟ .... هو اختراع او اكتشاف او محاوله فاشله بلا شك ... لا يمكن ان يتحقق مهما تقدم العلم وبلغ اقصى درجاته ... هي مجرد محاولات ... هي تحدي المستحيل .... كيف خطر على بال العلماء ان يفكروا بمثل هذا الأمر ؟ .... نعرف نحن زراعة الكبد او القلب او اي عضو اخر غير الرأس ... أما الرأس فهذا شيء عجيب ...
لنفترض انهم نجحوا ... هل من المعقول او الممكن ان يصبح الانسان قادرا على الذهاب الى محل لشراء رأس مثلا ؟ ..
لنتخيل هذا السيناريو ..........
- السلام عليكم .
- وعليكم السلام .
- حجي لو سمحت بدور على راس خفيف نظيف .. وسعرو طري .
- موجود .. مستعمل ولا جديد وكاله ؟ .
- انشوف الاثنين .
- يا سيدنا عندي هذا الراس مستعمل ومكفول لسنه .
- ومين صاحبوا الأصلي .
- واحد والله اجا لعندي قبل يومين بدل راسو بواحد جديد .. بقولي تعبوا راسو .. بظلوا يفكر بالسياسه والزلمه بدو يرتاح .. بدو راس جديد نظيف يعودو على بساطه الحياه بعيد عن التعقيد .
- وطيب شو في عندك كمان ؟
- عندي روس جديده وكاله .. خذ هذا مثلا ( صيني ) .. نظيف وافكارو صناعيه خالصه.. وعندو قناعة انو ما يخلف الا ولد واحد .. يؤمن بالتوزيع العادل للثروات .
- وغيرو .
- عندي هاذ .. صناعة اتحاد اوروبي ... بحب شمات الهوا ... بس عندوا افكار استعماريه ... وبحب الاكل المكسيكي.
- والله حيرتني يا زلمه .. طيب وشو هاذ ؟
- هذا راس امريكي ... ديمقراطي .. مزاجو متقلب .. بفكر كثير ... بريحك على المدى البعيد بس بدك تتعب معاه اشوي .. وبحكي انجليزي اكويس .
- وهاذ ؟
- هذا راس عربي ... مكفول ست اشهر .. افكارو متضاربه .... كل ساعه برأي .. بس هذا بكلفك بطاقات خلوي كثير .. بأرجل .. مرات بشطح هيك لبعيد وبيجي منو اشياء اكويسه بس بدك تصبر عليه كثير .
- طيب وهاذ؟
- هذا ما بناسبك .. راس شغل كييف .. لحق عليه مصاري .. انت حر .. اذا بدك اياه عادي.
- وهاذ ليش كبير ؟
- هاذ دبل كربوريتر .. يعني عربي انجليزي ... بحكي عربي وانجليزي وبشتغل اذا بدك اتبرمجوا على 200 نظام بنربط مع الاقمار الصناعيه .. بس هذا غالي سيبك منو . ما الك قدره عليه .
- واسعارك كيف ؟
- بنراعيك لا تهكل هم ... ما راح نختلف .
- والفك والتركيب والصيانه ؟
- علينا كلو علينا .. وبنوخذ منك راسك كمان وبنخصم من السعر .. ولا يهمك .
- طيب شو هو معياركم انو بتناسب مع جسمي ؟
- بنجربلك اياه لمده اسبوع وبنشوف مدى التوافق .. اذا تم التوافق خلص .. واذ لم يتم بنرجعلك راسك وبنوخذ اجرة الأيد بس ... او بنجربلك واحد ثاني زي ما بدك .. احنا جاهزين.
- طيب هي كرتك معي وخليني اخذ من عندك ( كاتولوكات ) اراجعهم بالبيت واستشير وبردلك خبر . شكرا الك.
- شرفتنا .. اهلا وسهلا .
لو حصل هذا الأمر .. اي بدون حلف يمين .. أنو نص العرب لو (بدلوا ) كل روس العالم وركبوهم بدل روسهم أي بقص أيدي اذا بيجي راس على قياسهم يتناسب مع اجسامهم ومع غيرهم ..لأنو ما بعجبهم العجب .. لأنو ما بتركب بدل راسهم راس .. لا راسوا مريحوا ولا مريح راس غيروا ..
أي الأجنبي لو حطيتلوا راس ( بسه ) بدل راسو .. اي بدون حلف يمين ألا تلاقي ثاني يوم مخترعلوا شغله اتفيد البشريه ... واتلاقيه متماشي مع كل البشر .. بوخذ معهم وبيعطي .. بتناسب مع جسموا ومع غيرو .. الا احنا ( معظمنا) .. سبحان الله ... مش طايقين لبعضنا كلمه .... اذا على صحن ( طبيخ ) بنتهاوش وبنختلف .. انسى .. انا مني وعلي راح اكتفي بعمل ( دراي كلين ) لراسي احسن من اللفه هاي كلها .. ما انا عارف حالي ... انا شخصيا لو ركبت راس ( اديسون ) مخترع المصباح الكهربائي بدل راسي الله وكيلكم كان كل العالم لليوم عايش بظلام دامس... لأني شغل (شكوى وتذمر ) وبس.
ملاحظه :.. مع احترامي لكل عقول العرب ... مع التأكيد ان هناك نسبه عاليه منها يشهد لها التاريخ بالعلم والحكمه والذكاء والمقدره والابداع والاتزان وخدمة البشريه ولا زالت تعطي وهؤلاء هم الاجدر ان يبقوا مستمرين بحمل شعلة التقدم والازدهار .
والسلام عليكم