أرجوكم ساعدوني .. أهلي؟؟ ام من اختاره قلبي؟؟

زاد الاردن الاخباري -

السلام عليكم للجميع ومشكورة زاد الأردن على هالزاوية الي من خلالها بنقدر نشكي همومنا ونفش قلبنا

 

عندي مشكلة تعبتني كتير.. لا بعرف ادرس ولا أعمل شي منها وعهالحال صارلي قريب السنة بتمنى الكل يساعدني انا كتير تعبانة ومحتارة

وما لقيت غيركم يساعدني

 

انا فتاه عمري 21 حبيت انسان وحبني عنجد مشي معي بكل ما يرضي الله بخاف علي أكتر من كل الناس ووين ما كان بلاقيه حولي يحميني من كل الناس انا متعودة أصارح أهلي بكل شي لكن انا ما صارحتهم بحبي لهالشب لأنو الشب على حسب الي بحكوه انو الشب مش من مستواهم الإجتماعي العالي

أهلي لما عرفو بقصتنا أجبروه انو يجي عنا ليخطبني

او رح يتركني هو طبعاً خريج جديد من الجامعة... اجا منشان ما يخسرني وهو كان معاه المهر

لكن ما في بيت

خلوه اهلي يبني بيت.. وكل الفلوس راحت عالبناء وهلأ هو ما معه المهر العاااالي الي طلبوه أهلي

واهلي بدهم يخطبوني ويزوجوني واحد تاني انا كتير تعبانة ومو عارفة شو اعمل

 

 

انا متمسكة برأيي لكن اهلي صعبين وانا اصلاً اكتشفت انو اهلي خلوه يبني البيت ويضيع مصاريه منشان ما يبقى معاه مهر ويتقدم متل كل الناس

وهما من الأساس رافضينو

لأنو مش من مستواهم متل ما بحكو

انا كتير بحب أهلي وهما بحبوني لأنو انا بنتهم الوحيدة يعني ما عندهم حدا غيري وما في شي بحياتهم طلبوه مني وما نفذتو بالعكس ماشية تماماً مع الي هما بدهم ياه بس الشب واللهِ محترم بصلي وبصوم وبعرف ربنا وما عمرو أذاني بكلمة أو جرحني بحرف واحد ورغم كل البهدلة الي شافها من اهلي متمسك فيي ومش قبلان يتخلا عني وبدو ياني بالحلال..وأهلي منعوني أحكي معه بأكتر من اسلوب واكتشفو مرتين انو انا بحاكيه وهلأ المرة التالتة لو اكتشفو يمكن فعلاً يزوجوني غصب عني وانا واللهِ لا بدي مال ولا جاه بدي احترام وحنان وانسان يقدرني ويخاف ربنا فيي وأهلي مش قادرين يفهموني بهالنقطة

 

 

شو أعمل انا كتير تعبانة ومحتارة

أهلي الي بدهم المستوى العالي ؟؟ ولاّ الشب الي بدو ياني بالحلال ؟؟؟

 

 

ساااااااعدوني

واسفة اني طولت عليكم