كيف طريق العودة؟ نادم اني سرقت

زاد الاردن الاخباري -

كيف طريق العودة؟
انا رجل عمري 42 سنة، كنت من اسرة فقيرة جدا، عانيت كثير من ورا الفقر، من وأنا وصغير أسأل أبوي ليش ما نصير احنا معنا مصاري، أشوف ناس يجيو يجبوا صدقات النا، أشوف اختي الكبيرة تبكي بدها تلبس مثل زميلاتها بالمدرسة، طبعا هاي ذاكرتي رجعتني وانا طفل لما كان عمري 8 سنوات، أبوي كان بالعربي الفصيح حراث ، يحرث للناس ارضهم، وشغله مواسم، اذا ما كان في موسم بنتبهدل، المهم انا كبرت، وظل السؤال جواتي ليه احنا هيك، لما درست جامعة قبل حوالي 22 سنة، كنت اخجل بنفسي وكنت اخاف انه الناس تكتشف انه انا معدم الحال، صح كانت الدراسة ارخص ولكنها كانت صعبة على مصروف أبوي، عشان هيك اشتغلت بشركة مقاولات وقتها، مراسل، وبعد ما تخرجت اشتغلت عندهم مع العمال، وبعد 3 سنوات شغلي صاحب الشركة بشهادتي محاسب، انا استغليت وظيفتي وقمت بتزوير اوراق وبالتالي احصل على نسبة من الارباح بطريقة مستحيل تنكشف، وبعد 10 سنوات فتحت شركة مقاولات خاصة فيي، وزادت اموالي، وحاليا صرت غني مثل ما كنت احلم، أمي وأبوي متوفيين، وابني يلي وفرتله كل ايشي أفسدته بدلالي ، كله لانه كنت بدي اصير غني، والآن ضميري صحي، بس بعد فوات الآوان، كيف بدي رجع اللي اخذته او سرقته من لما كنت محاسب صغير، وكل شركتي اساسها اموال مسروقة، جد متعب.