يا ريت تساعدوني

زاد الاردن الاخباري -

السلام عليكم و رمضان كريم على الجميع

مشكلتي باختصار انا فتاه مطلقه عمري 29 سنه زوج اختي تعرف على رجل عراقي الجنسيه عن طريق الفيس بوك عمره 32 عاما و اعزب و يعمل بالعراق و مقيم في بغداد و ووالدة العراقي جائت زيارة الى عمان هي وابنها كون اختها مقيمة هنا و ووالدة العراقي اعجبت باختي المتزوجه و احبتها طبعا اجت زيارة على بيت اختي و زوج اختي سافر معو على العقبه تغير جو و قالت لها هل لديك اخوات قالت لها نعم عندي اخت مطلقه و بعد يومين حكتلها بدي اختك لابني و ما بدي اشوفها لاني حبيتك و اكيد هي متلك و بجمالك و حكتلها انا لازم اسافرالعراق مع ابني و بحكي مع اختك على السكايب و بشوفها طبعا ازا وافقت و انا بصراحه رحبت بدايتها بالفكرة كونو زوج اختي شكر فيه كتير للشب و حكى انو محترم جدا و ماشالله عنو المهم شفنا بعض على السكايب واعجب جدا بي و تعلق فيي و حبني و قرر انو يخطبني و امو حبتني كتير حكتلي ماشالله عنك مش نائصك شي متعلمة و متدينه و حلوة و ابني حبك و دخلتي قلبو و بدو اياكي و انا للامانه ارتحتلو و حسيت انو طيب و زوج اختي كتير حكى عنو انو منيح لكن اليوم صدمني زوج اختي و حكالي بدي احكيلك شغله عنو انو اعترفلي زمان انو كان ينام مع بنات و كان يشرب و يسكر و بتصور لازم احكيلك لانها عاده كانت فيه و انا انصدمت حكتلو ليش ماحكتلي من اول حكالي والله الحكي هدا من زمان حكاه الي وانا راحت عن بالي و نصحني افكر كتير بالموضوع و حكالي توقعي انو بعد مايتجوزك يرجع على عادتو و ينام مع غيرك او يشرب و بصراحه انا كتير محتارة للعلم هو الشب حاليا بصللي بصوم و مابئطع فرض غير انو انا رح اسكن بالعراق و هلا بجد متردد و محتارة كتير اوفق و للا لا لعدة اسباب

اولها انو كان يشرب و ينام مع بنات
و تانيا انو رح اسكن في بغداد و الكل بعرف انو بغداد وضعها مش مستقر ابدا
و تالتا رح اسكن مع حماتي لانو عندهم فيلا كبيرة و رح يكون الي جناح خاص فيي

الشب حاليا حكالي رح اجي اخطبك و اجيب الدهب و التلبسيه شهر 12 لانو بشتغل و رح يحاول ياخد اجازة ليخطب و كل يوم بحكي معي على السكايب و ووالدتو بتحكي معي و كتير متعلقين فيي و بحكيلي كتير خايف اخسرك انتي غيرتي شي بحياتي و انا بحبك و متمسك فيكي وانا هلا كتير محتارة دايما بحكيلو الله يجيب اللي فيه خير

يا ريت تساعدوني للعلم انا بستخير كل يوم بس والله محتارة خايفه يتعلق فيي بزياده و بعدين اتركو و يحكلي كنتي بتضحكي علي و بنفس الوقت انا خايفه اتسرع و اتركو لاني بجد ارتحتلو كتير و يمكن حبيتو ما بعرف

و مامابتحكيلي القرار قرارك انتي كبيرة وواعيه و بدك تتحملي نتيجة قرارك انا ما بجبرك على شي و اخواني كمان نفس الشي تركو الحمل علي و حاسه تفكيري انشل مش ادرة اخد قرار

يا ريت تساعدوني و بعتذر على الاطاله