هل سأكون وحيدة

زاد الاردن الاخباري -

السلام عليكم و رحمة الله وبركاته,,, انا فتاة عزباء عمري 25 سنة وبشهر 2 من السنة الجاي بصير 26 سنة الموضوع انه من وانا عمري 13 سنة وانا بنخطب و اهلي كانو يرفضو وانا كنت ارفض و السبب اني صغيرة بالعمر وكنت من الأوائل بمدرستي وانا توجيهي جبت بالفصل الأول 94 والفصل التاني جبت 68 طبعا الفرق واضح جدا و السبب اني مرضت وصار معي فقر دم المهم هاده ما منعني أكمل دراستي بالجامعة بتخصص أدب إنجليزي طبعا الدكاترة حطو حطاطي لأني ما كنت أرد وئت بيتحركشو وخلو معدلاتي بالأرض وحكيت ولا الضالين آمين وتخرجت واشتغلت وتوفئت بشغلي بس مدير الشركة برضه تحركش فيه ومع هيك صديته واستمريت بالشغل وتفوقت وكانت النتيجة إرتقاء بالمسمى الوظيفي وراتب سيء جدا واستقلت ولئيت شغل تاني أحسن براتب أحسن برضه ما استمريت مديري تحركش فية واستقلت وبديت شغل منيح بشركة مدير الشركة أنثى و الحمدلله الوضع منيح بس الغيرة موجودة بس انا مختصرة لأبعد الحدود موضوعي الأساسي اني من كتر ما رفضت اللي بتئدمولي طلعت علي سمعة بأني ما بدي أتزوج وانا والله كان هدفي بس اني أحسن و أطور من نفسي وبصراحة أكتر ما كنت متصورة بأني بئدر أفتح بيت و يصير عندي ولاد وهلأ حاسة بنضج كتير كبير ومقارنة مع صاحباتي انا متفوقة من جميع النواحي أما من الناحية الجمالية فأنا بنت كتير حلوة زي ما بحكو وفيه شبه من كل الفنانات إلا انا.وهلأ أهلي بحملوني مسؤولية الرفض و عيلتي كتير بجرحو بالحكي بأنها من أحلى صبايا العيلة ولهلأ ما خطبت و كأنه الحياة بس جمال ما حدى مهتم بمشاعري والله اني ببكي مرات علما انه ما بئدر أحكي عن حالي معنسة لأنه لهلأ بيجيني خطاب لكن.... شي بكون بده يجرب حضه وشي بعمل حاله بده يخطب و همه يتسلى وشي كزاب وانا تعبت فهل رفضي للإنسان الغير مناسب حيخليني أكون وحيدة.و أنا نفسي يكون عندي زوج أهتم فيه ويكون عندي أطفال .

ملاحظة : حركشت المدرا فيني مو لعيب بأخلاقي انا بنت متعلمة و مثقفة و متدينة وهادية كتير بطبعي لكن الحركشة بتكون نوع من الغزل بجمالي والله على ما أقول شهيد