حيا الله بجنود أبو حسين ………نشامى الوطن

كل العالم بضرب مثل بجندك يا سيدنا ، ولما الرايات ترفرف بالعالي جباه جنودك تبقى بالشعار تلالي ، وياما لفينا ودرنا مثل جنودك ما بنلاقي سيدي أبو حسين بهنيك والوطن بجنودك سياج ودرع حامي والله يحمي هاي بلادي ..
أبو حمدان اليوم بلحظات يحسد عليها وخاصة أن لديه الكثير ليحدثنا به ...
حمدان : ما أنا مسدق وأنا أخلص قرايه مشان أفوت عالجيش
أبو حمدان : والله يا بنيي هاية ساعة الحظ بالنسبة إلي وإلك .
أم حمدان :يمه يا حبيبي مشانك وحيدي ما رايحين يجندوك .
أبو حمدان : شو هالحكي هاظا زمان كان هسا زي حمدان أبس يخلص ويوخذ شهادته إذا قدم القانون ما بمنعه بما إنه هوه بده .
حميدة : وأنا كمان بس أتخرج بدي أدخل الجيش لأنه كثير صاحبات إلي بعد شهاداتهم الجامعية راحوا وفاتوا عالجيش وما بعتقد إني رح أتوسم بوسام شرف أحسن من هيك ، وبعدين لا تنسوا إنه القانون عنا بالأردن بفتح باب التجنيد للشباب والصبايا المتعلمين زينا .(زي النشميات اللي على دوار الداخليه مثلا ، يا ما احلاهم بالزي العسكري وروح اتفرج كيف بمشوا السير ) .
أم حمدان : هاية أكبر نعمة من الله والملك عبد الله إنه يكون للبنات نصيب من الالتحاق بالعسكرية .
أبو حمدان : ما عيني شافت أحن وأحسن من الجندي الأردني والله إنه مفخرة بكل مكان والله يعينهم ؛ وعيونهم سهرانه وهمه اللي بحموا البلد وبسهروا على راحة المواطنين أنا أشهد إنه جيشنا جيش الأبطال وين ما راحوا العلم رافعينه ورافعين روسنا ، وبكل مكان بنلاقيهم بالبحر وبالجو وبالبر ؛ بالليل وبالنهار وبكل الفصول والأزمات ، ما بمر يوم إلا وبتركوا أكبر البصمات اللي بتمثل أخلاق الأردنيين والله إني أفخر وأعتز يابه يا حميدة بكل عسكري جند نفسه ورهن روحه فداء لتراب الوطن وهاظا الإشي مش غريب عجنود سيدنا عبدالله الله يحمي الملك والوطن ، وأنا من جهتي ما إلي أي اعتراض عليكوا أبس تخلصو القرايه وتتسلحوا بالعلم وتتخرجوا من الجامعات أنا ما إلي أي اعتراض على العكس أنا كنت بدي أفتح معكوا هاظا الموضوع إحنا كلنا فدوى للوطن وعيون أبو حسين لأنه هوه معلمنا والواحد على وطنه ما بده نخوة كلنا للوطن وأرواحنا ترخص وتهون لأجل الوطن ؟
أم حمدان : لو بدنا نظل نعد ونحصي قديش هظولا النشامى إلهم فضل ما بنقدر نوفيهم حقهم لأنهم عيوننا بتنام وبتلاقيهم دايما بكل مكان وكل واحد عارف شو مهمته شوه الإشي المطلوب منه وصية جنودك عبدالله واصلة الفلك ما شاء الله بالأردن وخارجها
أبو حمدان : هظولا نشامى محفوظين برعاية الله لأنهم بمدرسة أبو حسين تعلموا بيها وهايه تحية من كل أردني لكل نشمي من نشامى أبو حسين والله يحييهم ويحمي أردننا ويطول عمر ملكنا سيدي عبدالله وألف تحية للنشامى بكل مكان وكل التقدير للهامات العالية .
حمدان : يابه الجيش مصنع الرجال وأنا أفخر بهاظا الإشي وعلى الله ألبس البوريه ..... يمه إدعيلي .......... حميدة: وأنا كمان لا تنسيني.....
أبو حمدان : حماة الديار عليهم سلام .. .
إلى اللقاء مع موضوع آخر من يوميات........... وجلسات أبو حمدان ...
Hikmat_B@yahoo.com