الاب والام

زاد الاردن الاخباري -

السلام عليكم ورحمة الله وبركاته بترجاكي يا زاد انك تنشري قصتي هي بس لمعرفة قيمة الام والاب بالدنيا ايش هيه ؟ 
بدي اخاطبكم بالعامية لاني للاسف ما كملت دراستي .
لما قرات تعليقاتكم على بعض المشاكل  تشجعت وكتبت قصتي وانشالله برتاح شوي اذا بتواسوني  
 
انا بنت عمري 26 سنة بس ما بعرف من الحياة اي شي , لاتستغربو لاني عشت مع امي وابوي للاول ثانوي بدولة محافظة جدا وباخر سنة توفت امي وانا عمري 16 سنة الله يرحمها والي اخ باستراليا سافر من 15 وما بنعرف عنه شي . رجعنا على الاردن انا وابوي  وعشنا عند عمتي وبعد سنة توفى ابوي بجلطة الله يرحمة انا عايشة من بيت عمتي لبيت خالي وللاسف انه بيوتهم صغيرة وعندهم شباب ولا انا ولا هم بياخدو راحتهم وصرت احس انهم بس يعرفو اني جاي يتضايقو كتير كتير كتير ببكي بس ما حدن بحس فيي ولا حتى اي انسان بسال عني  ولا ايش بدك وايش محتاجة بحس واول ما اوصل عبيت خالي دغري عالمطبخ والجلي والغسيل حاسة حالي شغالة ولا كاني انسانه الي متطلبات . انا متاكدة انكم راح تحكو اتزوجي بس انا بدي ارد عليكم واحكيلكم هاي شغلة نصيب وكل ما عرسان تقدمولي وعرفو قصتي دغري ما بيرجعو ما بعرف ليش وايش ذنبي انا . . 
اخواني, انا مابدي اتزوج او بدور على عرسان انا كل اللي بدي اياه اعيش زيي زي اي بنت بالعالم بدي بيت بدي عيله بدي حضن ام  وبدي اب يرجع من السوق شاريلي اشياء  . بدي بس يجي العيد احكي كل عام وانته بخير وابوس ايديهم ويعطيني ابوي  عيدية  بدي بس اتزوج امي تزغدلي واخوي ينقطني وابوي يباركلي بدي لما امرض حدا يطل علي ويقولي الحمد عالسلامه  بدي وبدي وبدي .... اشياء كتيرة والله بعلم بحالي عشان هيك حبيت افش غلي واكتب كل اللي بنفسي انا مو حتاجة حل لمشكلة لان هالشي ارادة رب العالمين . 
 
 
بس بدي انوه عشغلة كل اللي عايش بين امة وابوه يحمد ربة مليون مرة لان اليتم صعب وصعب كتير واعظم نعمه الام والاب  .