أختي وفرصتي بالزواج

زاد الاردن الاخباري -

مرحبا انا ما رح أطول عليكم انا رح ادخل بالموضوع على طول،

 انا مشكلتي في الدنيا اختي هي اصغر مني بسنة واحدة عمرها 27 سنة اتزوجت في سنة 2005 لكن للاسف حظها مع زوجها طلع سيء اكتير واحنا انخدعنا فيه لانو كان يضربها ويهينها في أول 4 شهور زواج زعلت ورجعت عنا وقعدت عنا تقريبا 5 شهور وصلت بينهم للمحاكم صار يروح عندها على شغلها يتراجها ترجع لانو كان ضاربها وفي تقرير بهادا الحكي المهم رجعت اله حكت يمكن يتصلح لانو الطلاق مش سهل بالنسبة للبنت ونظرة المجتمع، المهم اقعدت عنده كمان 4 شهور ورجع لنفس الشيء وزعلت عنا وللاسف حصل الطلاق في ال2007، المهم المشكلة مش هون المشكلة انو كل ما يجي يتقدملي عريس بحسها بتتضايق وبتزعل لدرجة انها بظلها تبكي ، انا بصراحة راعيت شعورها اكتير اختنا الأصغر منها اتزوجت ما اتضايقت ولا حكت اشي بس انا لما يجي حدا بتتضايق وانا بصراحة خايفة اظل اراعي شعورها لحد ما تروح فرصتي في الزواج وانا ازا اتقدملها حدا ما بزعل ابداً، هي حلوة اكتير حتى انها بتشبه الممثلة اللبنانية نور وهي جامعية ودارسة لغة عربية بس حظها سيء (محجبة).

 

انا نفسي وبدعي ربنا دايماً انو يبعتلها ابن الحلال اللي يتوجها وترتاح معو بس للاسف نظرة المجتمع للمطلقة زي كانها عاملة جريمة.