ما الحل برأيكم

زاد الاردن الاخباري -

انا رجل متزوج من سنة و نص و عمري 27 سنة و زوجتي بنفس العمر..اخدنا بعض عن حب..طبعا السنة الأولى زواج كان فيها مشاكل و شفت منها مشاكل الأزواج بعيشوها بعشرين سنة انا شفتو بسنة...يعني ما ببالغ لما احكي انو نص زواجنا نكد و مشاكل و أشياء تافهة بتتعلق بنظام محدد الها بالبيت و اشياء بتتعلق بالأهل و كثير..يعني جد اللي شفتو ما حدا بتحملو..لو غيري كان طلقها من زمان بس انا صبرت عليها و حاولت اتفاهم معها..كل ما نحاول نتفاهم طبعا تكبر المشكلة..و اذا طلعت برا البيت اختصارا برضو برجع بلاقيها عصبت أكثر..حاولت افهمها..لما نوصل لطريق مسدود..الأحسن ما نحكي و نبعد شوي بنروق و بننسى..لأ على الجهتين ماكلها...و كنت دايما اتحملها و احكيلها ما بصير اضلي هيك بتخسريني..الصبر الو حدود...طبعا كأني بحكيلها العكس..ما بتهدا الا لما توصلها للشيطان الرجيم و اجرحها بالحكي.وقتها بتيجي تعتذر..طبعا انا كنت استغرب هيك تصرف..بالمنيح ما بتحس بالغلط..لما اعصب و تكبر..بتحكي اها غلط!!.و طبعا مرة صار بينا مشكلة خلص كنا راح ننفصل بس هي رجعت طبعا لأنها هي بس بتصير تستعمل عقلها لما تكبر و بتحس بغلطها..مشكلة زوجتي طيبة و كثير من جوا بس عصبية و عنيدة..بمعنى أصح بحسها خام...طبعا بعد ما بدأت امل و ازهق من هالعيشة و مشاعري تتغير ناحيتها و جد بطل الي نفس احاول أغير شي بحياتنا..لأنو المشكلة مو انو ملل او تغيير زي مهي مفكرة..المشكلة بعقلها..احنا تمشكلنا بشهر العسل..بالبداية و الختام..و احنا طالعين على الطيارة و احنا مروحين!!!..المهم على الرغم من كل هالملل و شعوري بعدم محبتها ضليت معها و كنت اعاملها منيح..بدت تتغير للأحسن بس تغير طفيف كمان و انضل نتمشكل نفس المشاكل..انا اصلا كنت عارف حالي بعد ايام و ما بحبها و بدي اتركها اذا ضليت هيك بس حبيت اعطي حالي و الها فرصة بس كنت نفسي الاقي الحب اللي بتمنى او العيشة اللي بتمناها مع اي بنت..كنت واصل لقناعة انو مرتي مو هي المرأة اللي كنت اتمناها و متأكد من هالشي

المهم..انا بديت احكي على النت و تعرفت على بنت و حبيتها و حبتني و حسيت انو فيها كل شي بدي اياه بالمرأة..و صارحت زوجتي اني ما بحبها ما حبيت اجرحها و احكيلها اني بعرف وحدة..تمسكت أكثر فيي و لامتني ببعض أشياء قال ليش ما كنت اواجهها و احكيلها..طبعا لسة بالكبر..حكيتلها..انا حاولت معك كل شي بس على الفاضي..بعدين عرفت بقصتي و تمسكت أكثر و انو هي راح تتغير جد و خلص و كل اللي بدي اياه و انها غلطانة و انو بتحس انو ربنا بعقابها عشان اللي عملتو فيي(طبعا ما حبيت هالجملة..اي نعم عانيت منها بس ما بعرف)و قال انت علط كنت مدللني !!!..مو هي غلط ما قدرت!!!بس رجعت حكتلي انها غلط و عارفة وهلأ غقلت و صحيت..انا هلأ بحالة نفسية طبعا صعبة..شفقان على مرتي اللي حستها بغلطها بس متأخر..و مو عارف أعطيها فرصة ولا لأ علما اعطيتها بدل الوحدة الف..والله بشهد علي..و لا ارجعلها و ترجع زي اول و بصير اضيع سنين من عمري و اضيع هالبنت اللي حبيتها و حاس فيها كل شي و اكسر خاطرها..علما صرنا حاكيين مع بعض على زواج و انو انفصل..

انا بفكر بطريقة هلأ انو هل انا بحبها و بقدر ارجع اعيش مع مرتي؟؟يعني مو قصة اني بدي اترك عشان البنت الثانية و بس..بحاول اكون عقلاني..و اللي هاممني اني اذا رجعت احبها و اقتنع فيها..طبعا اذا تغيرت زي ما بتحكي..بخاف انو زي ما بحكو الطبع بغلب التطبع..و التغيير اللي بتحكي في يعني 180 درجة..و هاد صعب جدا..هي ابسط التغيرات عملتها بصعوبة..و انا قلبي مل..يعني اذا رجعت..ما الي نفس عليها اتحمل لسة عبين ما تتغير..

ف شو رأيكم