أنا .. حرااااامي .. ؟!

يا ناس يا عالم يا بشر...يا هو..أنا حراااامي...يا حكومة..أنا حراااااامي....يا هيئة مكافحة الفساد..أنا حراااامي..يا مصلحة السجون...أنا حرااامي...يا معشر الكتاب..أنا حرااامي.. يا منظمة الشفافية الدولية..أنا حرااامي...مشان الله اسمعوني ...ولو مرة..؟؟!! أنا حرااامي ومرتشي كمان, ومتخصص في سرقة المال العام..وماكل المؤسسة..واللّي فيها...وبعيّن جماعتي كلهم..ومش بس هيك كمان جيراني وجيران جيراني!؟ وقرايب أمي وخالاتي, وجدتي وكل اللي بتحبهم حماتي, ما هيّه سايبة..وبصراحة مش هامني حدا عشان هيك بحكي وبفاخر إني حراااامي كبير وقد الدنيا..هون في بلدنا في أريحية ما حدا بحاسب الحرامي الكبير لأنه كبيير ومدعوم.. وداعم! ومش رايحة إلا على الحرامية السنافر, اللي حقهم مهضوم والمتخصصين في البيوت والمنازل..بس خرجهُم لازم يطلّعوا لفوق وتكون طموحاتهم أكبر.أما أنا ..فحرااامي كبير...والاحترام لي على قدر أفعالي...فعلا شئ غريب..يعني كل ما بسرق أكثر كل ما بترقى في المناصب أكثر ..يعني بصراحة, حتى تزداد سلطتي وهيبتي لازم أسرق أكثر وأكثر..؟! وحتى أظل محترم لازم أسرق..وفعليا أنا فاسد..؟ وبستغل الوظيفة العامة لتحقيق مآربي الخبيثة. ماهو أنا خبيث كثير..؟.وبلعن أبو أفطاس كل موظف أو مواطن نظيف لأنه بصراحة..بلوث المؤسسة وبخرب أطباع الموظفين اللي بحترموني وبتعلموا مني وبشجعوني كثير...
قديما, وليس بعيدا كان من يثبت عليه أخذ رشوة يعيّر وينبذ ويشار له بالبنان..فلان المرتشي..!! أما اليوم فالرشوة شطارة وفهلوة, والسرقة والسارق كلما كبر كلما زاد الاحترام والتقدير له, والمال العام سايب, وإساءة استغلال الوظيفة رجولة ومعلمة, وتعين المسؤول لأقربائه والمحسوبين عليه ولو زاد عددهم عن80 ؟! وطنية وانتماء, وتاجر المخدرات وجيه وزعيم.؟!
والغريب في الأمر أن هناك من يطبل ويزمر لهؤلاء, ويشد على أيديهم التي يجب أن تقطع, وتقطع السنة من يزيّن لهم الباطل ويقول لهم هل من مزيد...ليحظى ببعض الفتات..أو نيل ما لا يستحقه...والمصيبة الأكبر..يتم ذلك باسم الوطن وحب الوطن ..ولعيون الوطن..والوطنية..والانتماء؟!
غريب ما يحدث في بلدي, ولا غريب إلا المواطن الذي يحافظ على ما تبقى من انتماء, وقد بدأ عددهم بالتناقص..إما الهجرة لمن يستطيع, ومن لم يستطع فيختار الأعتزال, أوالابتعاد, أ والإغتراب داخل الوطن.

 

rawwad2010@yahoo.com