أول وكالة اخبارية خاصة انطلقت في الأردن

تواصل بلا حدود

أخر الأخبار
المستقلة للانتخاب: إغلاق باب الترشح لانتخابات غرف الصناعة العراق يعتزم استدعاء السفير الإيراني في بغداد للاحتجاج على قصف كردستان 4 جرحى إثر سقوط 3 صواريخ في المنطقة الخضراء في بغداد تزامنا مع جلسة برلمانية الأمانة: لا رفع لأجور المواصلات بعمان وزير التخطيط يدعو المانحين إلى توفير الدعم المطلوب لمسارات التحديث في الأردن رئيس الوزراء يترأس الاجتماع الأول لمجلس أمناء جائزة الحسين بن عبدالله الثاني للعمل التطوعي تعليق دوام مدرسة بعمان بسبب الافاعي تنفيذ طرق زراعية بـ 250 الف دينار بالمفرق جدول مباريات ربع نهائي كأس الأردن العدوان يوضح قصة (الخميس والجمعة) – فيديو فتح تحقيق بجريمة قتل 3 أطفال حرقا داخل شقة في عمان البنك الأوروبي للتنمية: نمو اقتصاد الأردن "ما زال معتدلا" ومتوقع وصوله 2.7% في 2023 ارتفاع صادرات الأردن 46.8% ومستورداته 38.9% لنهاية تموز الماضي مجلس النواب العراقي يرفض استقالة رئيسه الحلبوسي المستقلة للانتخاب: حزب ميثاق يستوفي الشروط حماية المستهلك تدعو الاردنيين للتفاوض قبل الشراء قبول تأسيس حزب جديد بالأردن استئناف دوري المحترفين الأردني لكرة القدم الخميس خبير: أرقام التضخم بالأردن لا تعكس الحقيقة القبض على تجار ومروجين للمخدرات في العقبة والرمثا
الصفحة الرئيسية تعليم وجامعات مشكلتي هي أبي وأنا لم أعد أحتمل

مشكلتي هي أبي وأنا لم أعد أحتمل

18-07-2010 03:08 PM

زاد الاردن الاخباري -

بسم الله الرحمن الرحيم
انا بشكر كل الي راح يقرأ قصتي وبشكر كل الي راح ينصحني لاني جد محتاجه نصيحه نصيحه صادقة من القلب
وشكر للمحرر الي نشر قصتي
اعذروني بس قصتي طويلة شوي وبتمنى انكن تقراوها للاخر

انا فتاه عمري 20 سنه اسكن في عمان لم اكمل تعليمي لاسباب عائلية خاصة اعمل حاليا في شركه بوظيفه مدخلة بيانات والحمدلله اموري تمام
اعذروني بس راح ابدا احكي بالعامية لحتى اقدر افهمكن مشكلتي
مشكلتي هي اهلي وخطيبي وخصوصا بابا تقدم لخطبتي قبل 5 شهور شب ماشاء الله عليه اخلاق وادب ودين وصفاته كويسه كتير شافني بالشغل وبعت اهله لعنا بصراحه انا من اول قعده مع اهله كتير ارتحتلهن ناس بنحبو بيدخلو على القلب بسرعة بسيطين كتير وحبوبين كتير يعني ما شاء الله عليهن وطلبوني من اهلي
خبروني اهلي وطلبو رايئ خبرتهم انو انا ارتحت لشب وارتحت لاهله وانا موافقه وما عندي مشكله وخبرت اهلي انهم يردو على الجماعة ويخبروهم بالموافقه بس انصدمت انه اهلي خبروهم انه البنت مو موافقه وانو ما في نصيب الهم عنا بس مع هيك الشب ما راح ونسي الموضوع لا رجع مره ومرتين وتلاته وكل مره حجه شكل انا ما بعرف ليه هيك اهلي كانو يعملو بس باخر زياره لعنا حكولهم انو اوك وانو بدنا نقرا الفاتحه بس بدنا اخوه الكبير يجئ لانو ابوه متوفي الله يرحمه حكى لبابا اوك تاني يوم اجئ اخوه الكبير وخطيبي وقعدو مع بابا ومع خواني الاتنين وقراؤ الفاتحه على نية التوفيق بعد باسبوع اجئ بابا يحكي لخطيبي انا بدي اقرا الفاتحه مره تانية لانو بدي اخواني وابوي الي هوه جدي يكونو موجودين وطلب من خطيبي انو يجيب كل اخوانه واهله لحتى نقرا الفاتحه مره تانية خطيبي رد علي وخلال يومين كانو الجماعة عنا مع اعمامي والكل وقرأو الفاتحه كمان مره بقينا على هالحاله اسبوع كان يجئ يقعد شوي ما يطول وبشكل رسمي من مبدا انو نتعرف على بعض اكتر وما كنا نقعد لحالنا كان يقعد بابا او ماما او واحد من خواني معنا وانا مو زعلانه لانه هيدا الصح وبعد فتره اجئ بابا وحكى لخطيبي انو هيدا الحكي ما بنفع وانو بده كتب كتاب بشكل رسمي وانو يجيب اخوانه واهله وبابا يجيبي اعمامي ونكتب الكتاب خطيبي حكاله حاضر يا عمي وكمان مره جمع كل اخوانه المشكله انو اخوانه بشتغلو برا عمان يعني ناس باربد وناس بالكرك وناس بمعان مفرقين وتخيلو شو صعب اتجمعهن كلهن بيوم واحد مع هيك جمعهن وجابهن لعنا خوانا وخواته وامه واجئ عمامي وكتبنا الكتاب وتم الامور على خير
كنا متوقعين انو بعد كتب الكتاب خلص بابا يهدأ شوي ويخليني نرتاح ونتعرف على بعض بدون اي حواجر بس الي صار العكس صار يحكي انو انا ما بقدر اترككم قاعدين لحالكن وانا بخاف من حكي الناس ولسا في ناس كتير ما بتعرف انو خطبتم وما بدي تيجو وتروح سوا انا ما بدي حد يحكي علي على شان هيك بدي نعمل حفله ونعزم عليها كل الناس وكل القرايب وكل المعارف ومن هالحكي يعني باختصار بده نحجز بصاله لحتى نجمع كل هالناس لانو بيتنا صغير مع انو بابا بعرف انو وضع خطيبي مو هالقد بس مع هيك دبر فلوس وبلش يجهز وحجز صاله بالمبلغ الفلاني وبتعرفو نحنا بفتره صيف وبتعرفو كيف الاسعار ورحنا اشترينا الذهب وبتزكر يومها الذهب كان 25 دينار وغير هيك ما قبل بابا ببرنامج الصاله وصار يضيب كتير شغلات يعني كيك اسبشل عن النسوان وما بده عند رجال كيك راح ووصى على كنافة بالشئ الفلاني ومع هيك خطيبي سكت وما حكي اشي وعملنا الحفله وكانت بتاريخ 9/7 يوم الجمعة الي مضت كانت حفله جد بتجنن اجئ ناس خير الله عالم ما بعرف من وين اجت يعني جد الناس الي واقفه اكتر من الناس الي قاعده والحمدلله خلصت الحفله وطلعنا بعدها على جرش تعشينا هناك وحكينا الحمدلله على كل شئ هيك خلص قلبنا ارتاح وعملنا كل الي بدهم اياه اهلي
بس مع هيك بابا ما هدي لما يجئ خطيبي الي هوه هلا جوزي على سنه الله ورسوله وقدام القانون والعالم كله بس يجئ عنا ما بخلينا نقعد سوا ما بنعرف نحكي كلمتين على بعض ومن جديد ماما صارت نفس الشئ لما تشوفنا عم نحكي تقاطعنا او تبعت اخوانا يضحكو ويمزحو معنا
مشكلتي انو خطيبي بطل قادر يتحمل الوضع بحكيلي انو انتي خطيبتي يعني مرتي يعني حلالي على سنه الله ورسوله من حقي اقعد معك براحتي انا عملت كل شئ بدهم اياه اهلك وحكيت اوك على كل شئ لانو كنت متوقع انه اخر اشئ راح ارتاح واحسن بالراحه وبالامان
انا مو عارفه شو اعمل مع اهلي حاولت كتير اني افهم واني احكيلهم انه هوه هلا خطيبي وجوزي واله حقوق كتير علي وفي النا خصوصيه لحالنا لازم ما حد يدخل فيها بس على شئ فاضي وخطيبي بطل يقدر يتحمل الوضع ما بحكيلي غير كلمه وحده انو انتي مرتي ومن حقي احس بالراحه معك
ساعدوني والله مو عارفه شو بدي اعمل مو قادره ازعل اهلى ومو قادره ازعل خطيبي من شان الله انصحوني شو اسوي
وفي كمان شغله اخر مره اجئ لعنا بابا حكاله كتير شغلات بدايقة ومن وقتها حكالي انو ما رح يرجع لعنا على البيت بس انا بعرف انو قلبه حنون وبروق بس انا ما بدي يرجع ويكون الوضع نفس الشئ
ساعدوني ارجوكي

الحائره





تابعونا على صفحتنا على الفيسبوك , وكالة زاد الاردن الاخبارية

التعليقات حالياً متوقفة من الموقع