قرّاء زاد الأعزاء ...

السلام عليكم ورحمة الله وبركاته ... 

أنا فتاه عمري 25 سنة وتزوجت قبل شهرين تقريباَ...موظفه والحمدلله ... مشكلتي يا جماعه أني  بعد الزواج ما ارتحت نفسياً بالمره دايماً خايفه ...متوتره ...مخنوقه...بالليل بصير أبكي وأنا نايمه وأتذكر أهلي وبتمنى لو أني أرجع أعيش عندهم...أنا يا جماعه بعرف أنه الزواج مو لعبه ومسؤوليه وكان حلمي أتزوج وأصير أم زي كل البنات والحمدلله تزوجت من شخص مقتنعه فيه وأختياري يعني ما حد جبرني عليه...بس هلأ وأنا بالدوام بس أتذكر أني بدي أرجع ع بيتي بنخنق ما بحبه وما برتاح فيه ونفسيتي بتدمر حتى إني صرت أكره الأجازات...مو حاسه بالأمان والأستقرار فيه...مع أنه زوجي منيح معي...حتى أحياناً صرت أحس أنه مشاعري أتجاه زوجي تغيّرت...يعني بره البيت بكون رايقه ومرتاحه وجوا البيت محطمه حتى الطبخ ما عم يزبط معي...حتى كل شي بالبيت جديد بس عم بخرب معي من أول أستخدام...ما بعرف ليه هيك عم يصير معي...ما توقعت أني أدمر وأدايق بهالشكل...حتى الصلاه عم بسرح وبخربط فيها...بس لما أكون بره البيت بكون رايقه وكل أموري تمام.

هلأ أنا ما بنكر أنه صار خلافات بالبدايه مع حماتي وصار عندي ردة فعل من الزواج كله...وفي صفات بزوجي تفاجئت فيها متل الأنطوائيه مو عني طبعاً عن المجتمع الخارجي ما بحب يروح ويجي وما بحب العلاقات الاجتماعيه حتى ع أهلي زيارته خفيفه...كنت أعاني قبل الزواج من فراغ عاطفي وتوقعت إني أتنقل لمرحله جديده كلها حب وأمان وأستقرار بس للأسف ما عم بحس بهالشي نهائياً ما بحس إلاّ بالخوف وما بنكر إني عم بحس بالندم لأني تزوجت... بحسد خواتي  البنات لأنه الوحده فيهم ما بترتاح غير ببيتها وأنا ما عندي هالأحساس بالعكس بكره بيتي كتير... بروح عند أمي وبصير أبكي بتقلي توكلي ع الله كل البنات بالبدايه بصير معهم هيك... بس أنا عنجد تعبانه تعبانه يا جماعه وبتمنى تساعدوني وتحسوا معي قديش بشع الأحساس بالخوف يمكن تحكوا أني سخيفه ومو قد المسؤوليه بس والله والله الي بصير مو بيدي... خاااااااااايفه ومخنوقه ..

شكراً لزاد وشكرا لكل من يقدم نصيحه بسيطه ..