( انا دكتور)

في كل سنه تقريبا بستدعي ( طريش ) للبيت لعمل صيانه خفيفه للبيت لازاله الرطوبه وبعض ( شخابيط ) لولاد على الحيطان .. شرف اخونا ومعاه العده وبلش يطرش ويكر كر بهالرول .. وبعد مضي ساعه تقريبا شفت الزلمه حط ايدو على خدو وقعد ..
- يعطيك العافيه .. خير انشا الله .
- طاحونتي بتضرب علي والله ما اني عارف اشتغل منها ... بلاقي عندك حبة ( مسكن ) .
- في .. موجود .
روحت على هالصيدليه الموجوده عندي بهالبيت وبعبشت بهالادويه طلع معي شريط .. اي والله هذا هو .. هذا تبع الاسنان .. انا هيك خابر .. فش غيرو .. ورجعنا على هالزلمه ..
- خذ وادعيلي .. هذا مسكن قوي . راح ترتاح عليه .
- الله يجزيك الخير .. كاسه مي اذا في مجال .
- حاضر ... اتفضل
بلع حبتين على نفس واحد .. وفش خمس دقايق قام الزلمه زي الحصان وهات يا شغل ..
- بتعرف يا برهان هذا الدوا عجبني .. اتقول هواي بهواي .. ابدا .. بتعرف صرلي يومين بعاني من وجع هالطاحونه واللثه كمان .. والله ارتحت على هالدوا .. شو اسمو هاذ .
- والله ما بعرف .. مكتوب احرف بالانجليزي واشي 500 mg المهم ارتحت عليه .
- والهه اذا في مجال تعطيني منو كمان حبتين هيك اذا ضربت علي مره ثانيه بخذلي حبتين .. واذا في مجال وانزلت على الصيدليه بطريقك جبلي منو شريط او شريطين والله عجبني هذا الدوا .
- حاضر يا سيدي وهي حبتين .. ولما انزل على الصيدليه خلص بجبلك اشريط منو او شريطين او حتى علبه انت تأمر أمر .. بس هيك شدلنا حيلك بهالطراشه وبدنا نخلص .
- حاضر .. توكلنا على الله .. ورجع يطرش .
انزلت على الصيدليه وقلت لتبع الصيدليه بدي ( اشريط ) من هذا الدوا ..
- موجود .
- كم حقو .
- نص ليره بس .
- بدي اسألك .. امنيح هاذ لوجع الاسنان ولا في اقوى منو .
- نعم يا خوي .. مين قلك انو هاذ لوجع الاسنان .
- عفوا .. ولأيش هاذ الدوا ..
- هذا للمغص يا استاز .
- مغص !! .. والزلمه اللي عندي معطلوا حبتين منو وارتاح عليه .. اسنانو كانو يجعوا وقلي ارتاح عليه .
- زلمتك يا اما صار معاه حاله نفسيه ويا أما كان بطنو بجعوا بس ما عرف يعبرلك صح .. وهذا هو دوا وجع الاسنان شايف بختلف عن اللي معاك .. بتحب توخذو .
- لا انسى خلص .. بقولوا ما لقيت .
طيب شو بدنا انقول للزلمه والله فضيحه واشي مخجل ومحرج .. ارجع اقولو خربطت بالدوا وانو اللي اخذتو للمغص مش للسنان .. والا اخلي هالمركبه سايره وانسى وخلي يبلبع منو ما دام ارتاح عليه .. يعني هيك على الاقل بضمن يصير معاه مناعه من المغص ..
- اه يا برهان .. جبت الدوا .
- ما في منو .. مقطوع .. اسمع خذ هي باقي الشريط حلال عليك ... وكيف طاحونتك .
- تمام .. يخلف عليك .
وثاني يوم وثالث يوم والزلمه ابدا يشكر في على هالدوا .. ولادهى والامر اعطى مرتو منو .. لما خلص الشريط .. وقلي ..
- والله بدي احفظ اسمو بدي اجيب منو عجبني .
- انسى يا زلمه .. ما دام طبت انسى .. في اقوى واحسن منو ... وقتها فرج .
انا ما بدي يروح يكتشف الحقيقه .. فضيحه بلاش يقولك هذا باقي يتخوث علي وخاصه انو الزلمه بصراحه ( جهم ) يعني والله ما اللي حيل على امباطحتو والله بمعجني وبطرشني ستين كف قبل ما تنشف مية وجهي عني .
اقتنع والحمد لله .
بعد اسبوعين زارني قريب اللي .. بعاني من روماتيزم ..
- بلاقي عندك حبه مسكن .. والله مفاصلي بضربو علي .
- في .. موجود .
يا اخي بعرفش اقول لأ .. مش عارف .. على السريع .. في .. موجود .. سحبت حالي ورحنا على هالصيدليه .. يا باي شو فيها ادويه وعلب واشرطه حتى ميزان حراره فيها .. دور وبعبش .. وبديش اقع بمطب ( الطريش ) لازم هاي المره اكزن حذر .. لقيت شريط لون الحبوب ( خمري ) قلت هذا هو .. هذا مسكن قوي للعظام .. ايوه بتذكرو .. يوم ما صابتني لفحه هوا اخذت منو ..هذا ممتاز ومسكن عام .. بفيد الزلمه .. ارجعنا على هالزلمه وطسينا حبتين كمان ... فش عشر دقايق الزلمه ما قدر يتحمل وطلب الاذن يروح على الحمام .. سمحنالو .. وعلى عالموال كل عشر دقايق يطلب الاذن على الحمام .. وسمحنالو .. شو صار مع الزلمه .. اكيد ( اسهال ) مفاجئ.. طيب شو السبب ؟ ..
- يا اخي شو اللي اعطيتني اياه انت بالظبط .
- هذا مسكن .. مجرب .
- طيب ليش دب في الاسهال .
- والله ما بعرف .. يمكن اعراضو الجانبيه .. هات الشريط اشوفو ... ( الاخ كان ضابو بجيبتو .. ما انا قلتلو خذو حلال زلال عليك ) .
- تفضل .
يلعن عرض هالشغله .. هذا اتذكرتو .. ايوه .. ايوه .. هذا فيتامين ( حديد ) .. كنت جايبو اللي للتقويه .. ومن اعراضو بسوي اسهال .. طيب شو بدنا انقول للزلمه هسه .. والله فضيحه .
- اسمع ابو عصمت .
- اتفضل .
- هذا الدوا ما راح يناسبك .
- ليش ؟ .
- يا زلمه هذا مسكن قوي بس من اعراضو بسوي اسهال .. وهسه انتبهت .. سيبك منو .. هسه بعطيك واحد انظف واقوى ... طبعا بعد ما اشوفلك اشي ( يمسكك ) عشان تعرف اتروح .
- يا زلمه سيبنا منك .. دمرتني انت .. شو اسهال وامساك .. ركبي سابو مني من الاسهال فوق ما هي سايبه خلقه .. سيبنا منك .. خذلي طريق بدي اروح قبل ما تيجي الهبه الجاي من الاسهال .. يستر بيتك .. خلصني .. الحق مش عليك الحق على طاوعك وشكالك .
- اسف يا سيدي .. اتفضل .. روح روح .
-
زياره عائليه ...
اهلا وسهلا .. اهلا وسهلا .. شرفتونا .. وين هالغيبه ... اتفضلوا .. كيفكم .. كيف حالكم ... دي دي رو ري دي دو وا اي او وي او .. قعدنا .

- شو يا سيدنا ا صار معك اشي .. شو قلك الدكتور اخر مره .
- والله صرلي سنه انا والمدام بنراجعو .. وقال استبشرو خير .. عمللنا الفحوصات وقال في امل .. يعني بأذن الله .. بأذن الله يمكن هيك حركة شهرين ممكن يصير ( حمل ) .
- الله يطعمكم يا سيدنا .. والله انتو صبرتو كثير .. يعني بتحكي عن 7 سنوات زواج بدون خلفه والله صعبه .. بس ربنا كبير وكريم .. وانشا الله هيك تظبط الفحوصات وبأذن الله الله يطعمكم صبي ولا بنوته هيك تربى بعزكو انشا الله .
- انشا الله .. دعواتك بس .
- انشا الله يا رب .
- بدي اسألك .
- اتفضل .
- يا خوي .. من هالصبح ومعدتي ( هفتانه ) علي فيها نغزه .. ابصر شو ماكل امبارح .. بلاقي عندك هيك حبة ملين او( فوميدار ) .
- في ... موجود ... ( بعرفش اقول .. لأ ) .
ونفس الموال ونفس الحركات .. بقوم عن الكرسي وبتوجه مباشره الى صيدليه البيت وبقعد ابعبش وادور بين هالادويه . والمشكله كل الادويه والاشرطه مكتوبه باللغه الانجليزيه وفيها رموز وارقام وابصر شو .. مما يجعلني عرضه للنسيان والخربطه .. هاذ .. لأ .. مش هاذ .. هاذ .. لأ مش هاذ .. ايوه .. هذا هو .. انا مجربو .. هذا للمعده هواي بهواي .. ابدا .. ورجعنا عند صاحبنا ..
- اتفضل يا سيدي .. بالشفا انشا الله .
- في مي لو سمحت .
- جيبولو مي بسرعه .
بسم الله .. لطع حبه ثم ثناها بالثانيه ..
- خذ الشريط والله ما برجع .. بجيب غيرو .. سلامة خيرك .
- تشكر .. تشكر .. ما اتشوف شر .. بتعرف اني هيك بلشت ارتاح .
- ولسه .. بقولك هذا هوايه بهواي .. ابدا .
- بدكم تسمحولنا بدنا انروح .. زورونا .
- انشا الله .. مش بدري يا جماعه .
- بدري من عمرك .. بنجيكم .. بنجيكم .
ابتعد صوت سيارتو اشوي اشوي.. سكرنا الباب .. وقعدنا انا وعيلتو نمتدح باخلاق هذي العيله وخفة دمها وندعيلهم الله يفرحهم ويطعمهم خلفه .
عيلتي .. يا زلمه سيبك من سولافة الدوا هاي .. كل اشوي بتوزع دوا على الناس مش بخل بس انت بتخربط كثير يا زلمه بهالادويه وبتحرجنا وبتحرج حالك .. وهاي شغله خطيره .. يعني لو واحد معاه ضغط او سكري او مرض قلب واخذ حبة دوا بالغلط .. يا وزلمه بتجني عليه .. ممكن يموت .. وين اصفي انا ولولاد من هبلك .
- معاكي حق .. بس بعرفش اقول .. لأ .
- انا من يوم طالع ما راح ارضى بهالحكي ..ما في دوا يعني ما في دوا .. بتتذكر لما اعطيتني حبة التهابات ( لوز ) وانا اصلا شايله اللوز .. ولولاد اعطيتهم ( يرفين ) ضد الحساسيه وهم اصلا كانو يعانو من كحه .. يا زلمه سيبنا منك .. منشان الله .. لتضيعنا .. وعلى يد الله ويدك الدوا اللي ما الو لازمه بهالصيدليه كلو بدي اكبو بالزباله .. بنجيب دوا اول بأول لما نمرض .
- خلص ..معاكي حق .. انا توبه .. خلص .. الشغله ما فيها مزحه .
- تعال جاي .. شو اعطيت هذا الزلمه .
- اعطيتو ملين للمعده .. شو فيها .. يعني بدك اتشككيني بحالي .. مهو مبين .. الغلط بعرفوش .
- تعال فرجيني من انو اعطيتو .
- من اأنو .. من أنو .. لحظه .. هذا هو ..
- هذا للمعده .. يا كشلي بس .
- ليش شو في .
- روح الحق الزلمه .. ولا .. ما راح تلحقوا ما انت اعطيتو شريط منو .. الله اعلم يمكن لطعو كلوا هسه اذا ما اعطى مرتو منو كمان .. يا حبيبي .. قضيت على الزلمه وعلى مرتو ..
- ليش شو في .. خوفتيني يا شيخه .. دوا شو هاذ ..مش هاذ للمعده ..
- هذا للمعده .. حسبي الله ونعم الوكيل عليك بس .. هذا حبوب ( منع الحمل ) يا رجل .. يا رجل اتقي الله ..
- يا وردي .. قضينا على الزلمه .. عمرو ما راح يشوف خلفه .. والله الظاهر انو الله كتبلوا عمرو ما يشوف خلفه .
- صرلوا 7 سنين بتعالج هو ومرتو ولما بشرهم الدكتور بالخير وقربت النتائج والعلاجات اتجيب نتيجه .. روحت ضيعتهم حضرتك بشربة مي .
- انا مليش خص .. بديش اشوف حدا .. بالأخص هذا الزلمه ومرتو .. قضينا على الزلمه ... كلو منك .
وانا بسقي االزريعه ...
- مرحبا يا جار ...
- هلا والله .. هلا بيك ..
- بلاقي عندك حبه اتنزل الضغط .
- في .. موجود .

ملاحظه : اش معنى الناس هيها بتعطيني ادويه واشرطه من صيدلية بيتها وما بتخربطش .. هيني ما شاالله عني .. ما صار معي اشي .. من شو بشكي .. سيبك من الاعراض الجانبيه الهبل والتخلف والفقر وطولة اللسان والمعاطسه والحساسيه المفرطه اللي دابه في .. كلها بتروح لما اموت .. وين المشكله .
والسلام عليكم