"قهوة زاد الأردن" .. أبو عواد يتردد

زاد الاردن الاخباري -

يعني لو كل واحد عندو زي ام وليد بعوف حالو ،، بس ابو وليد متحملها ،، عيب بعد هالعمر يتخلى عنها، وصلنا لما طلب منها عشا مرتب مع أنو مش جوعان ، بس بدو يتابع المسلسل التركي ، بس يا سلام عليها ام وليد عارفة سواليف جوزها ، وطلبت منو يعمل رجيم ،، قراء "زاد الأردن" خليكم معنا ،، نعرف الأحداث اليوم
أبو وليد : يعني ما بدك تعمليلي عشا .
أم وليد : فكني عاد ،، قرفانة حالي .
أبو وليد: مالك زعلانة بعد ما سمعتي خبر حمل سلمى .
أم وليد: حر انا يا زلمة الك عندي ...
أبو وليد: ام وليد مليون مرة فهمتك انك تحكي بأسلوب أحسن من هيك ،، مش ناقصني مشاكل ،، ما بدك تعملي عشا حرة بس لا توجعي راسي ..
أبووليد : مقهور من تصرف مرتو بس مش قادر يمون عليها ، مش لإشي بس خوف صوتها في البيت والفظايح قدام الجيران...
دار ابو عواد من زمان ما اعرفنا شو وينهم ، خلينا في دار أبو عواد لتهدا الأوضاع في دار ابو وليد:
أبو عواد : آه يا أم عواد ان شا الله اترتحتي هسا ..
أم عواد : والله يا ابو عواد متت مية موتة لما شكيت انك متجوز عليه .
أبو عواد: بس الله يخليكي يا ام عواد هدي عليه شوية وغيرتك بلاش منها ، بعد هالعمر بدك اياني اتجوز .. حرام .
أم عواد : طيب يا ابو عواد شو رأيك بكرة نعمل غدا ونروح عند المرة ,,,,
أبو عواد اتردد وصفن وحكى : بلاش انروح عندها خلص ,,
أم عواد : شايف يا ابو عواد كيف ابتتهرب غصب عني بدي اشك .
أبو عواد: طيب خلص .. هدي واعمليلنا كاسة شاي والحقينا ع غرفة القعدة ..
برأيكم أبو عواد برد ع ام عواد وبوخذ ام عواد عند المرة الفقيرة .. بكرة بنكمل مع "قهوة زاد الأردن" وصبحكم بالخير