قهوة "زاد الأردن " .. أم وليد وسلمى " مشاهد ساخنة "

زاد الاردن الاخباري -

بعد ما ترك وليد زوجته في الغرفة وذهب ليفطر مع ابوه وامه ، في هاي الاثناء أم عواد رايحة جاي بالبيت بتفكر بزوجها وين نام ، وليش ما أجى وليش أم وليد اتهربت من اسالتها وصار "الفار يلعب بعبها".
أجى ببالها تروح ع دار ابو وليد بدها تجس النبض بطريقتها ، لانها مش صابرة ، وراحت ع دار ابو وليد بحجة أنها جايبة الهم خبز شراك، ودقت الباب ، ورد عليها وليد وطبعا اللقمة لسا بثمو مش صابر يبلعها وصار الحوار التالي:
وليد: أهلا خالتي ام عواد اتفضلي .
ام عواد : الله يزيد فظلك يا وليد ، ازعجتكم يمكن ابنفطروا.
وليد : مش مشكلة انبفطر والله ، اتفظلي اتفظلي .
أم وليد من المطبخ: تعالي فوتي يا أم عواد .
أم عواد وماشية اجر قدام واجر لورا وحكت: انسيت اعطيكي خبز الشراك وليد اجى مستعجل .
أو وليد : ولا يهمك ، يسلمو ايديكي ، افطرتي ؟!
أم عواد: الحمد الله – طبعا لا افطرت ولا اشي من سمة بدنها - .
أو وليد : كنت بدي اجي عندك بعد الغدا والله ، حاسيتك مش ع بعضك يا ام عواد.
أم عواد ,, ابتضحك ضحكة صفراوية : لا شو بدو يكون فيه يعني يا ام وليد ,, يمكن كثر الوقفة خلاني اتعب .
أم وليد: هسا بعملك شاي بنعنع لتروقي ، هيني جاية .
في هاي الاثناء ابو وليد بروح ع التلفزيون وعامل سندويشة ع شان يلحق المسلسل التركي ,, ومستغل الفرصة بانو أم وليد مش موجودة وتركتو ,, وليد ما شاء الله اكل الاكل ومش باقي غير الصحون .
أم وليد لما دخلت المطبخ : غريبة نفسي اعرف شو فيه ,, طبعا اتذكرت انو ابو وليد راح ع التلفزيون ,,, ولما راحت ع غرفة القعدة سمع صوتها وهي جاية لعندو وغير القناة ع " الاخبار" ، ولما شافتو حكتلو : شو ابتحظر ولويش ماسك السندويشة هيك ،،كان كملت في المطبخ .
ابو وليد : بدي الحق الاخبار ,, اسمعي الدنيا صبح ففكي عني –طبعا العصبية مبينة ع وجهو .
وراحت ع المطبخ تعمل الشاي ، وكملتو وراحت ع ام عواد وحكت : وهاي احلى كاسة شاي الك .
أم عواد : صحيح وين كنتك ؟!
أو وليد: كنتي ، لا تسمي بدني جيت من عندك وكانت عاملة الدار شوربة الله وكيلك.
ام عواد : شو بنات هاليوم هذول والله بهدو الحيل .
ام وليد : فكينا منها : انت شو اخبارك ما لحقت احكي معك لما جيت عندك .
أم عواد وهي بتفكر بالمدخل لتسأل عن جوزها وحكت : شو عمل ابو وليد مع ابو عواد بالمدينة ، انبسطوا ؟
ام وليد: ليه هو ما حكالك ابو عواد ؟!
ام عواد : انشغلت انا وما حكالي اشي ..
او وليد: ام عواد يا خيتي انا اختك وبدي اياكي تصارحيني شو فيه ؟!..
أم عواد حابة اتنفس اشوية لام وليد ..بس خايفة أم وليد تحكي لجاراتها واتصير سيرة ع كل لسان ،، فسكتت وحكت : يا او وليد ما في شي كل القصة انو ابو عواد مشغول عني اكثير ودايما مع ابو وليد.
فحكت ام وليد بنفسها : بقص ايدي اذا هيك السولافة ..وحكت : طيب الله يهديكي يا ام عواد
أم عواد : ما حكتيلي انبسطوا بالمدينة وأكلوا كنافة ؟
أم وليد : الحمد الله انبسطوا واتعشوا هناك .
أم عواد ابتحكي بنفسها : اتعشوا ،، مهو ابو عواد ما بوكل من مطاعم بخاف ع صحتو أكيد راحو ع بيت حدا ، معقول راح ع بيت مرتو الثانية ،،وطبعا راحت من بالها انو بنت حماها ام سلطان بعمان ,, يعني الشيطان هسا بنفس ام عواد.
وفجأة ابتطلع عليها ام وليد : وابتحكيلها : أم عواد وين رحتي وبشو بتفكري ,,
ام عواد : ولا اشي بس بقول شو رايك اليوم نروح انغير جو عند ام عنان .
ام وليد بدها تحكي وفجأة سمعت صوت كنتها سلمى وهي نازلة عن الدرج وابتحكي مع حالها : شو هالدار هاي كلها عليه ،، من الصبح وانا شغالة بالقرف ،، طبعا سلمى مش عارفة مين عندهم وكل فكرها انو حماتها بالمطبخ ومش سامعتها .
ام وليد وعيونها بقدحن شرارة : ولك سلمى شو ابتحكي بتفكري مش سامعتك يا محترمة ،، سلمى بتصير اتكذب ام وليد بس ام عواد شو بترد ..
مش مشكلة القهوة الجاي ابتعرف عن الطوشة ... وشو صار بسلمى حردت ولا لأ ولا ادخل ابو وليد .. وليد وين كان.. اتحملونا