مقهور جداً!

زاد الاردن الاخباري -

انا شاب مغترب عمري 30 سنة، مثل اي شاب بمثل سني بفكر بالأرتباط، ولأنه مغترب وطبيعة شغلي ما بقدر أشوف بنات، قلت خليني اتزوج تقليدي، حكيت لأختي وهي بتشتغل مشرفة مختبر بأحد الجامعات أنه تشوفلي بنت مناسبة، طبعا حكيتلها أهم شروطي من حجاب، ولباس معتدل ، ومن حيث الشكل حكيتلها كيف بحب تكون البنت،

بعد مرور شهر، اختي حكتلي شي انا اصلا خايف منه، بتحكيلي لقيت طلبك، بس في مشكلة، المشكلة انه البنت مصاحبة، طبعا مش بنت وحدة شافت، شافت 4 او 5 بنات، واخر بنت قالت انه ارتحتلها كثير، واخر شي شفتها قاعدة من شاب ، كتفها على كتفه، ضحك وانبساط ونسكافيه وهوا بدخن،،

صراحة شو اللي بيصير عنا بالاردن، لا حدا يقولي انتا بتعمم ، أها بعمم لانه أغلب وخطين تحت أغلب، اغلب البنات مصاحبات، وهاد الشي جالطني، طبعا رح ترد وحدة من البنات وتقول ليه ما أنتو مش قلال ، انا بحكي عن نفسي بالنسبة لي ما حبيت وما صاحبت وما زلت اشوف هالشي سخافة.

ليه بنات بلدنا صاروا هيك، وشو السبب؟؟ انا متأكد انه نسبة 80 بالمية من طالبات الجامعة بيصاحبوا شباب وبحكو تلفونات وبقعدوا مع بعض، وانا صراحة لو أعرف انه خطيبتي كانت هيك بطلقها، لانه ما بتحمل اشعر انه كانت معطية شي لحد ثاني لا يستحقه.

شو الحل؟ وله البنات صاروا هيك، وين الأخلاق والدين، وين التريبة؟؟