خطيبي

زاد الاردن الاخباري -

انا فتاه عمري 28 سنة مخطوبة لشاب من ثلاث شهور عمره 29 سنة، لقد تمت الخطوبة بعد علاقه حب استمرت سنتان عشت معه اجمل ايام حياتي فهو انسان حنون وطيب ومثقف من عائلة محترمه،احببت فيه الكثير من الصفات فنحن متفقين ومتفاهمين لابعد الحدود،علاقتنا مبينية على الاحترام والثقه المتبادله..

المشكله هي انه في اول فتره اتعرفت فيها عليه حكالي شوية اشياء عنه قبل مايعرفني ومن بينها انه جرب يدخن حشيشه اكمن مره مع اصحابه من باب الفضول بصراحه انا اتضايقت بس مو كتير اخدت بالموضوع، لانه حكيت هاد شي صار بفتره مراهقة وخلص ومارجعنا فتحنا الموضوع المهم بعد ما خطبنا كنت انا واياه قاعدين بنحكي على رواق وفجاة!!!!

حكالي انه لهلا بيدخن حشيش وبده يتركه علشاني (آل قرر يصارحني) انا انصدمت وما بعرف كيف هبيت فيه متل الزلزال من الصدمة،عصبت كتير وحكيتله ليش هلا جاي تحكيلي ليش ما حكيتلي من الاول،كان جوابه انه انا ما بدخن كتير زي ما انت مفكره بس من فتره لفتره وما حبيت احكيلك لانه كل مره بقرر اتركو وبرجع بعد فتره بدخن مع حدا من اصحابي، طبعا زعلت او بالاحرى حردت لانه كان لازم اعيد حساباتي بعد هيك ، ماخبرت اي حدا من اهلي ولاجبتلهم سيره لهلا وهاد الحكي اله اسبوعين، المهم ما عرفت كيف المفروض اتصرف بهيك شي فقررت احكي لاخوه حكيت احسن شي انه احكي لاخوه لانه شاب زيه وفعلا حكيت لاخوه وحكالي انا بحكي معه.

 

انا كتير بحبه والاهم من بحبه اني مقتنعه فيه ومو حابه اتركه انا هلا ما بحكي معه مع انه عم بحاول يحكيني بس انا بدي حل للموضوع وحابه اساعده لانه الي بيقرا قصتي هلا ممكن يحكيلي اتركيه مابدك اياه ويتخيل انه انسان مدمن وسيء ومن هالحكي، مع انه العكس هو شخص كتير متزن انسان واعي وناجح بشغله وبعلاقاته مع الناس،والاهم انه بخاف الله وبصلي بس فعلا ما في حدا كامل، انصحوني كيف ممكن اساعده يبطل نهائي؟ لانه عنجد انا ما عندي خبره بهيك شي ولا عندي فكره لاي درجه مضر الحشيش لانه مرات بسمع من بعض الناس انه عادي مو مضر ومن هالحكي، وهل الي بتعود صعب يبطل وانا غلطانه اني بفكر اساعده القرار الصح انه اتركه؟

(على فكره انا كاتيه كتابي)