رجل من هذا الزمان

زاد الاردن الاخباري -

انا شاب عمري فوق الثلاثين , ترددت كثيرا قبل ان اطرح قصتي للنقاش بس بصراحة تعبت كتير ومش عارف شو اعمل
قصتي بدات بالعمل عندما جاءت فتاه جديدة للعمل معنا بالشركة ومن اول نظرة شفتها حسيت قلبي خفق الها بسرعة وحبيتها بس ماكنت اقدر احكي معها مابعرف ليش ومع انه اكتر من فرصة صحتلي احكي معها بس ماكنت اقدر الكلام يوقف ومايطلع
وقعدت هيك شي ثلاث اشهر وانا اتبع فيها بكل حركة بالشركة واشوفها بتحكي مع اكتر من شخص بالشركة وانا بس اترقب بس المهم اشوفها , لحد في يوم وصلني خبر انها خطبت وسبحان الله بعد ما عرفت قدرت احكي معها وفعلا صرت احكي معها بالشركة ,

 المشكلة انه البنت كانت كانها طلعت من جو مكبوت في بيتها فكنت حسها بتحكي مع الكل وصار الكل يحكي عنها وعن انها بتحكي مع فلان وعلتان بهالشركة وانا احاول دايما ادافع عنها لحد مرة ما قدرت اتحمل هالشي , ومسكتها وقلتلها وبهدلتها بس اعطيت الحق لنفسي انه انا بس احكي معها , ممكن لانه عارف شو بداخلي تجاهها , وصرنا نحكي مع بعض وتحكيلي عن خطيبها وبالمقابل انا عمري ما حاولت ابعدها عنه , بس بالمقال كنت دايما احاول ابعدها عن جو الشباب اللي عرفتهم واحاول افهمها انه نواياهم سيئة وانهم بيحكوا عنها ,

وما سالتني ليش انا بعمل هيك معها قلتلها انه انا بحبها ومن زمان بحبها ومن اول ماشفتها حبيتها , وهي حسب ماكانت تقلي انه هي ما بتحب خطيبها وانه بس اهلها فرضوه عليها لانه قريب الهم , مع انه مافي توافق علمي بينهم نهائيا , وكانت دايما تشكيلي , وفي مرة اجا شاب كان يعرفها على الشركة وحسيت انه كان بدوا ياها يطلعوا سوا , فانا فورا حكيت معها وقلتلها انه ان طلعت معه انه انا راح احكي مع اهلها واخبرهم بهالشي , وضليت وقتها معها على التلفون لحتى وصلت البيت , وصرنا نحكي تقريبا كل يوم , وحتى ماكنت تحب تحكي مع خطيبها قد ماكانت تحكي معي , ماعرف بس كنت خاف على البنت كتير حتى لما مرضت مرة وراحت عالدكتور انا رحت معها لاطمن عليها ,


وراحت الايام ومرة منحكي سوا وبقلها انه بدي اشوفها وهي رفضت تخانقت انا وهي وعصبت عليها كتير انا . بعديها البنت فجأة اختلفت معي وبطلت تحكي معي او حتى ترد علي لا مسج ولا تلفون , واستقالت من الشركة وعرفت انه ابوها هو اللي خلاها تقدم استقالتها . وحاولت احكي معها وماكانت ترد علي نهائيا , بعديها مرة رنيت عليها من رقم مابتعرفه وردت علي وبس عرفت انه انا غلطت علي وفهمت منها انه انا حاكي مع ابوها وحاكي عنها كلام مش منيح , تاني يوم انا اتصلت بابوها من رقمي ودافعت عن نفسي وحاولت افهمه انه مش انا اللي عملت هيك او بعمل هيك , وبعديها بفترة اجت البنت زيارة عالشركة وشافتني وقالتلي مبسوط هيك هيني فسخت وهيني رميت كل اغراضه اله , وفهمت منها انه في حد حاكي مع خطيبها ومع اهلها ومخبص عليها حكي وصارت مشاكل بينهم وفسخوا , انا ماعرفت شو بدي ساوي ا احكي قلتلها انه انا بحبها وبدي ياها ومابعمل هيك ومستحيل اعمل او احكي عن بنت كلام مش منيح وانا بدي ياها , وقلتلها انه انا على استعداد احكي مع ابوها واطلبها منه وماردت علي , وفعا بعد فترة وكانت رمضان قررت احكي مع ابوها واطلب ايدها منه , وحكيت معه وطلبت ايدها منه لكنه رفض ورفض بطريقة نهائية مع انه حاولت ادافع عن نفسي وافهمه انه هيك بيظلمني , بس مارضي , بعديها بفترة ,
 رجعت حكيت مع البنت وصرنا تقريبا نحكي بشكل متقطع وحسيت انه في فرق صار باسلوبها معي , صار يعني منيح . وقلتلها انه انا شاريها وبدي ياها بس هي ما تعطي جواب , ولا حتى بعرف ان هي بتحبني او لا , ولا بدها ياني او لا , صرت مش عارف , مرة تقول بدي فكر ومرة تقول بدي وقت ومرة تقول مابدي ارتبط ولا بفكر بالارتباط , وقلتلها انه انا طلبتها مرتين من ابوها وابوها رفض , وضلينا هيك فترة , بس مش ماخد منها اي اجابة لا اه ولا لا مرة تحكي معي باسلوب حلو , ومرة تحك معي باسلوب مش حلو بالمرة كل مرة يعني بشكل بتحكي معي , لحتى فعلا صديق الي شافني كم انا تعبت , فراح حب يعمل خير فاخد رقم ابوها واتصل فيه , وكان بدوا يقابلوا , بس ابوها لما عرف انه من طرفي مارضي يسمع اي شي وطلب منه انهاء المكا

لمة , ومن يومها لليوم ما حكيت معها وحتى تخانقت مع رفيقي لانه تدايقت ليش يحكي مع ابوها , ولهلا مش عارف عنها شي , وكل ما يرن موبايلي او توصلني مسج بفكر انه هي . بفكر فيها ليل نهار مش قادر اركز باي شي , ومهما احكي ماراح اقدر اوصف شعوري تجاها ,,


بس مش عارف شو اعمل ياريت لو في نصائح منكم بكون شاكر بشكل كبير