مبعوث محلي

بعد ما استنفذت أم فلاح كل مطالبها من أبو فلاح وتقريباً ما ضل شيء للدار ضروري أو غير ضروري إلا جابته من.. (غسالة توماتيك،وجلاية صحون، وجهاز تخفيف وزن ،وتجديد برادي وتغيير أثاث، وعمل جبصين وجمسن بورد وعمل حمام جكوزي، وزراعة الحاكورة نجيل اصطناعي) ..وعلى قول : أم فلان بشو أحسن مني؟ عندها جهاز ركض وتخفيف وزن .... وجارتنا فلانة بشو أفضل مننا؟ قبل سنة اشترت برادي واليوم رجعت جددت ... و أختك ايش بنفرق عنها؟ لد كيف رتبت الحمامات وعملت لكل غرفة حمام مستقل (ماستر)

وطبعاً أبو فلاح زلمة متقاعد وفاتح دكان بالحارة بسترزق منها ووضعه المادي تعبان شوي ( يعني دبساته مي)...وما خلى جمعية ولا مؤسسة قروض إلا واستدان منها مشان أم فلاح تفشّ غلها وتشابه فلانة وعلانة ....فبعد ما خلّصت مطالبها طلعت لأبو فلاح بفن وموال جديد وتحقيقاً لمقولة (وراء كل رجل عظيم امرأة) , فصارت كل ما يعملوا ندوة أو محاضرة أو اجتماع بالمنطقة تبعث أبو فلاح يحضر وعلى قول شوف عديلك فلان دايماً لابس ومشخص وبحضر كل الاجتماعات ، وجارنا أبو فلان دايماً بصله كرت دعوة لكل شيء بصير بالبلد ، وفعلاً أبو فلاح صار يحضر كل شيء (مجبراً أخاك لا بطل)

ندوة عن مكافحة ذبابة الخبيزة ، ومحاضرة عن محاربة التصحر في شمال الأطلسي ، ولقاء لاختيار ممثل لتشكيل لجنة صيادي الضباع والحصينيات ، واجتماع أولياء أمور الطلبة بالمدرسة الابتدائية (علما انه ما له أولاد بهاي المدرسة مع هيك حضر) ، وصار كل يوم يغيب عن الدكان ويسكّرها مش أقل من خمس ساعات بالنهار من وراء حضور الاجتماعات والندوات اللي ما له فيها لا ناقة ولا جمل ، وتراكمت عليه الديون لأنه أهمل الدكان (باب رزقه) ، المهم أصحاب المصاري والتجار والموزعين قدموا الشيكات بأبو فلاح ودخل السجن ...وبأول زيارة لأم فلاح لزوجها بالسجن قالت له : جهز حالك لما تطلع من السجن مشان تنزل عضو للمخترة أو عضو للمجلس القروي فلان بشو أحسن منك ؟ ما بعرف الخمسة من الطمسة وهذا هو صار وتصور.. 

فعلاً... لاحظوا كيف أنه كثرانين اللي بحضروا الاجتماعات والندوات والمحاضرات وهم غير معنيين فيها .....معقول تكون أم فلاح هي اللي باعثيتهم؟؟؟