المغالاة فـي المهور فـي ازدياد رغم مخالفتها للشريعة

  موضوع المغالاة في المهور طرح للنقاش، ولكـن ..

معظم ردود المعلقين إن لم تكن جميعها رح تكون ضد المغالاة اللي بترهق شباب اليوم وبتنفره من الإرتباط ..

سنتكلم عن المثاليات ولكن من يطبق ذلك على أرض الواقع، وبالذات أهل الفتاة المعنيين بالموضوع ..


جـد صارت البنت سلعة تباع للشخص الأقدر ماليا، وياما أهالي وقفوا بطريق بناتهم وكانوا هم السبب بعنوستهم ..
صار الشاب وأهله بفكروا مليون مرة قبل ما يطلبوا أي بنت، خوفا من الإحراج ..



ما بعرف ..
هو الواحـد بده لبنته زلمة يشتريه بأخلاقه أو زلمة يشتري بنته بمصاريه ..



برأيـي ..
الموضوع لا يخلو من المباهاة الإجتماعية وتكلف لا يوجد ما يستدعيه ..
وما ينسوا الأهل اللي بعسروا وبغالوا بمهر بناتهم، إنه عندهم شباب ويمكن ينحطوا بموقف محرج ..


القول الفصل ..
قول النبي عليه الصلاة والسلام "أيسرهنّ مهرا أكثرهنّ بركة" ..

ولكن يبقى الواقع مغايرا ..

  طمع الاهل هو السبب في غلاء المهور. الاهل اصبحو يستغلو بناتهم بكافة الطرق, و هذا سبب ارتفاع نسبة العنوسة و العلاقات الغير شرعية, و لما البنت تغلط ما حدى بيرحمها و بينسو انها بشر الها مشاعر و احاسيس و احتياجات و ممكن تغلط أو تضعف.

اتقو الله في بناتكم يا جماعة.

  المشكلة فش حدا بيسمع ... هي بنته من لحمه ودمه بده يشبهها بسلعة وعامل ليها مزاد الل بيدفع أكثر بياخذها !!! والله اشي غريب !

  10 مقدم و 30 مأخر؟؟؟؟؟؟؟
..........................اتركها اخي و جيبلك اجنبية ببنطلنون جينز بتتزجها و اشترى بالباقي هوندا سيفيك احسنلك

  أنا عندي بيت و محلات تجاريه و شهاده جامعيه عليا و سياره و مالي قادر أتزوج، لأني مالي قادر على سعر البضاعه و بعضها الأخر منتهي الصلاحيه!!! هو الي الله لا يرحمهم الأهل لما اتزوجوا كم كان معهم، يسروا الزواج و الله يطرح البركه... طلعوا بموضة حفلة الخطبه بصاله و حفله وداع أو حفله لصاحباتها و حفلة عرس + الكوافير و البوفيه و ...الخ الله لا يوفقهم
بيتباهوا أهل البنت بتخريب بيت العريس!!!

  الى متى ظاهره الاتجار بالفتيات؟؟؟
بالنسبه للشب العاشق الي مستعد ياخد قرض عشان يدفع مهر البنت الي بيحبها هاد اسمو تخلف عقلي حاد, مفكر حالو راح يثبتلها انو عاشق و مستعد يعمل اي شيه عشانها, طيب ما هو راح يعيشها بالجوع طول عمرها لأنو البدايه كانت غلط اصلا, يا شباب لا تدفعو هيك مبالغ عشان تتزوجو من الي بتحبوهم, لو حتى تهرب معها و تزوجو خطيفه بس لا تخضعو, ازا كل واحد غلى مهر بنتو هربت مع حبيبها راح يفكر الاب كتير أبل ما يرفع سعر بنتو عشان ما تفضحو و تهرب, مش هم بيخافو من العيب معناتو حاربو النار بالنار...

و بالنسبه للصبايا لا تحطو الحزن بالجره و تضيعو شبابكم بالبكى و الحسره , كملي دراستك و اشتغلي و طوري حالك , المعنى انو تشوفي مستقبلك متل الشب تماما, و بعدين استقلي عن اهلك, ليش لحتى يوصل عمرك 30 و انتي لساتك تحت رحمه اهلك؟ ازا هم غلط انتي لا تسكتي عن الغلط, ابني لنفسك طريق العبور من سجن الاب المجحف , و لا تخلي هاجس العنوسه يسيطر على تفكيرك, ازا الاهل خايفين من العيب داووهم بالعيب ...

  أنت بدك تكيف بإنحلال الشعب و كل بنت تدور على كيفها، فالأصل لا البنت و لا الشب حر فهنالك قيم و أخلاق للمجتمع + دين إذا كنت ناسي, و بعدين لما أو إذا البنت إشتغلت و صارت مسترجله ميين حيأخذها و هي كبيره... حلاوة البنت بأنوثتها و نعومتها لذلك يتهافت الرجال على ذلك بإختيار الأصغر سناً بينما بمجتمعات أخرى تبقى للمرأه الأنوثه و الجاذبيه و النعومه لفتره طويله من الزمن و لا بتكون تتهاوش بصباحه إذا قال لها صباح الخير و هي متنكده!

  ياجماعه حرااااااااااام غلا المهور والله انا ماني قادر اخذ اللي احبها من المبلغ اللي طالبينه اهلها .. ياجماعه ما بقي غير نرجع للخطف وبس

  أنت بدك تكيف بإنحلال الشعب و كل بنت تدور على كيفها، فالأصل لا البنت و لا الشب حر فهنالك قيم و أخلاق للمجتمع + الدين إذا كنت ناسي، و بعدين لما أو إذا البنت إشتغلت و صارت مسترجله ميين حيأخذها و هي كبيره... حلاوة البنت بأنوثتها و نعومتها لذلك يتهافت الرجال على ذلك بإختيار الأصغر سناً بينما بمجتمعات أخرى تبقى للمرأه الأنوثه و الجاذبيه و النعومه لفتره طويله من الزمن و لا بتكون تتهاوش بصباحه إذا قال لها صباح الخير و هي متنكده...

  ليش ما بتنشروا تعليقي!!! و إلا التي بدكون إياه هو رايكم فقط يظهر...

  فعلا موضوع مهم وهو سبب قله زواج الشباب هالايام,,
الحمدلله ابي انسان قنوع
ولما انخطبت طلب مهر من زوجي دينار دهب فقط
لانه بشتري رجال وماهمه المهر,,
الاخلاق والدين والمعامله الحسنه اهم شي,,,
االله يصلح حال الناس هالايام
اتجار بالبنات فعلااا

  اهم شي الاخلاق والدين وكل الفلوس رايحة بس بضل الاخلاق وازا الاب ولام كانوا خايفين على بنتهم من الزوج ما يجوزوها اياه وخليها عندهم

اقلهن مهورا اكثرهن بركه.....

  بارك الله فيكِ.

  يا جماعة هذا موضوع جميل
اسمعوني
ترا في اهل مش فاهم كيف بفكرو يعني بتلاقي الواحد منهم مفكر بنتو بنك بدو يظل يوخذ من راتبها تا يموت
وفي اهل بفكرو فش بنات غير بناتهم يعني بتلاقي مفكرها شقفة من القمر ولا من الشمس مش يحمد ربو انو في حدا اطلع في زقمو واجا دق علي بيتهم
فبصير يطلب ويتشرط وبدي ومش بدي واخر اشي بتتخلل البنت عندو يعني في اهل معقدين بساعدو على العنوسة
بنجي للصبايا
بتكون الوحدة منهم شافت عرس جارة ست خالة عمها انو كان في فندق خمس نجوم بتصير شرطها الاساسي فندق 8 نجوم عشان ما تطلع انقص من هذيك البنت
وبتكون بنت خالها حكتلها انو فستان عرسها كان ب 3000 ليرة فبتصدقها وبصير بدها فستان عرس ب 5000 ليرة وما بتكون عارفة انو فستان بنت خالتها ايجار ومن جبل الحسين

وبتكون صاحبتها الي في الشغل معنسة ونفسها تتجوز الشب المتجوز الي اقبالها ومه هيك بتروح تحكيلها اجاني عريس فصاحبتها المعنسة بتطلعلها كل وسائل التعقيد عشان تضحك عليها وتخلي الشب يطفش

وامها للعروس المصونة بكون بدها تطلع عقدها النفسية الي مطللعلها اياها ابو العروس في العريس
يعني بتكون حاقدة على كل الرجال وبتطلع جنونها بالشب المسكين الي اكيد ندم انو فكر يتجوز بس شاف حماة المتسقبل الي شايفة حالها ومش مصدقة وبتكون قاعدة بتبحلق بالواحد زي كانو جاجة بدها تسلخو سلخ
اشي بدها شقة بعبدون واشي بدها مهر البنت خمسات
خمسة ذهب وخمسة مصاري وخمستين عفش وخمس جهاز
يعني اشي من الاخر
والمشكلة بكونو هذول الجماعة عمرهم بحياتهم ما شافو خمسة دنانير ماسكة الا يوم العيد وصارو يحكو بالالاف
وبنرجع للعروس بتصير تعرف كل صالونات عمان الغالية ونفسك تقولها يرحم مرة كنتي تغسللك امك انتي وخواتك بجلن الكاز عشان القمل
ويرحم يوم ما كنتو تفكرو الحومرة والبودرة شغل نوريات
الشب الي بكون قاعد وهمي الاهل بحكو وبمهدو وبعطو من الحكي الفاضي احنا بنشتري زلام وسعرها مثل سعر غيرها والبنت بنتكم وبدناش اشي الا السترة
بس يقلب الموضوع جد بصيرو بدهم يملينو من ورا الشب
يلا يكفي بدنا نروح بنشوكم بكرة

  قبل حوالي 20 سنة بالثمانينيات يعني كان الشب الي عمرو 24 سنة عانس والبنت كانت تتزوج على 17 او اقل لانه كانت متطلبات الحياه والزواج اقل اخوي اتزوج وما كان عنده الى غرفة النوم وبس ودفع مهر 600 دينار ولما راح ابوي يدفع المهر ابو العروس رجعلو 100 ليرة كمان كام هدا في سنة 90 وهلا اخوي عندة بيت وسيارة ووضعو ممتاز جدا
اما احنا علشان يقدر يجوز لازم يكون محوش 50 الف وفي مفارقة غريبة جدا

اذا ماكان متعلم ما بترضى في ولابنت مع انها ما بتكون متعلمة وبكون جوز خالتو احلى منها على ايش ما بعرف
واذا بدو يتعلم من الطبيعي يضل لعمر 22 في اقل تقدير وبعدين بتخرج وبكون على الحميد المجيد لسة بدو يدرب ببلاش وبعدين اول راتب يوخذه 100 ليرة ما بكفنو مواصلات وعلى بين ما يصير يوخذ راتب كويس بدو سنتين هي 24
بعدين ببدا يحوش 100 ليرة بالشهر ( هذا اذا كان ابوزيد خاله ) يعني 1200 بالسنة يعني علشان يكون معو المهر بس بدو اربع سنوات ولاثاث وتكاليف العرس كمان اربع سنوات يعني 8 سنوات يعني بكون عمره 32
بروح يخطب ما برضو يعطوه ...... كبير بالعمر
طيب شو يعمل بحاله
انا شب وعمري 27 وبشتغل بشركة برمجة وراتبي مليح معي هسة 1500 دين ... طيب الي متلي متى ممكن يتزوج
او احكيلكم انا بدي اتزوج القضية ... اي قضية ما بعرف بس بسمعهم هيك بحكو

 
هادي صارت مشكلة بتواجه الشباب بسبب غلاء المعيشة لا ومش مكفي هيك اهل العروس ما شاء الله بس يجيهم عريس كانهم لقيو كنز وببلشو طلبات طلبات من هالمسكين وابو العروس مو مصدق حالو مفكر بنتو ملكة جمال العالم والله حرام بعدين همة بدهم يشترو زلام وللا مصاري على قولة ستي (( يا اخد القرد على مالو بكرة بروح المال وبضل القرد عحالو ))
نحنا باخر وقت الوحدة لازم تشتري الرجولة يلي بدو يحميها المصاري بتروح وبتجي الفقير الله بعطيه وبصير غني

  يا "شاب من الأردن"
شوفلك شغلة برة البلد غير هيك عمرك ما بتتجوز واذا اتجوزت بقلب على راس هم وغم ونكد وقرف
ترا النسوان قلق وهم اذا ما معك مصاري
بتفضحك فضح اذا نقص عليها صحن زعتر وبتصير تقلك انا في دار اهلي ما كان ناقصني اشي عاد بالعكس بكون اهلها جوزها عشان يوفرو كاز

  يعني اسم الله كانو الشب ملائكة يا عبسي مش قد الزواج ما يتزوج واما داعي تبين ان الشب الهاي كلاس والبنت بئية الله جدك لما كان ياكل على الارض وتزوج جدنك من دون ما يشوفها

  والله يا صديقي عبسي معك حق بس مو حرام علشان اتزوج اضر للغربة وابعد عن اهلي وقرايبي واصحابي ليش مين بدي اتزوج مارلين مونرية لا بلاها هالكونتيسة

بنت الاردن ... فعلا اذا موقد الزواج لا يتزوج بس ممكن سؤال بدون احراج انتي كم عمرك ولا تحكيلي انا ما تزوجت علشان اشتغل واعمل كياني لانه بتوقع كيانك ما راح يفيدك لما تتزوجي اوخر العشرينات او اوائل الثلاثينات لانه وقتها الزواج عندك راح يكون من باب التغير مش اكثر
شوفي الي حواليكي من البنات كم معدل اعمارهم ولما تحكو مع بعض احكو بصراحة بدون تجمل ولا لف ودوران راح تلاقيها مشكلة بالنسبة للبنت اكتر بكتير من الشب ومتعبيتها اكثر وراح تلاقي هذا راي الكل ... على الاقل الشب اذا في يوم من الايام صار قادر راح يتزوج اما البنت راح تروح عليها او تصير خياراتها اقل بكثير وهاي حقيقة مو صف حكي

وزي ما حكتلكو انا خلصت بدي اتزوج القضية .. بكرة بدي اجيب الذبل انشاء الله ... اتفضلو كلكم معزومين

بيتنا اخر الطلعة عند العمود لا تتأخرو

  اضحكم انا ابوي طلب من العريس ليرة دهب و جد إحنا مش محتاجين و مستورة و راتبي كله إلي صارفيتو على لبس و Body shop و مع هاد زعلت اختو و حكتلي هيك ما بمشي الحال لازم نحدد قديش بدكم مهر من الدهب و الجهاز قلنا خمسة مشان الحلال و الحرام و ما شاء الله هوه دكتور بكندا و خطبنا و فسخنا و يا ريتني حتى ما شفته صار يقولي شوفيلك مكان للعرس ياخد 5 عالراس (عالراس شو بتقول) المهم حكيتلوا بلا هالعرس طيب ليش دائماً مطلوب نحنا نتنازل و يا ريته بعجب، يعني و الله و الله ما كان هاممني شو معو بس الكل بعرف إنه الجيزة مش ببلاش، عرس و جهاز و قصص، كل بنت بدها تفرح زي بنات جيلها انا صاحباتي إشي بالرويال و إشي فور سيزنز و مع هاد انا ما كانت فارقة معي و بالأخير يا حزركم ليش تركني؟؟؟ قال شو I cant afford u هاي طبعاً ما فهمتها بس شكلوا بخيل او أهلو حكولوا كاني ماني بنات عمان الله سهل عليه و إنشاء الله ربنا بسهل امري و بلاقي إبن الحلال اللي ما بهمني معوا فلوس ولا بهمه if he can afford me ههههههه

  يا ينت الاردن
يرحم جدي وجدك وجدادنا كلنا
بس يا ريت الاقي وحدة مرة هسا زي جدتي
جدتي كانت تصحى تخبز كل يوم وتحلب المعزات وتجيب البيضات من تحت الجاجات وتصحى قبل الضو تحضر الفطور وتظلها للظهر تشتغل في حاكورة الدار وشو بدك كمان لاحكيلك بس بنات اليوم شوفيهم
اذا قعدت تجلي نص ساعة بصير راسها يوجعها ورجليها وبدها بندول وبدها تروح على الدكتور
واذا غلط جوزها وعزم حدا بتقرفو ليوم الدين وبتحملو مليون جميلة وانا وانا وشو بدنا بالعزومة ولشو الغلبة وخلينا نجيب جاهز بتعمل مشكلة عشان تجيب جاهز وتريح راسها
والادهى والامر كل اسبوع عند تاعت الصالون الي بتضحك عليها بمنكير وبدي كير وهير كلير
يعني هذا اهم اشي في الحياة
وااااااااايه الله لا يوريك اذا وحدة من بنات هالايام شافت صرصور بتصير تعيط وتيصح مش انها تمسك البف باف ترشو لأ مستعدة تحكي مع جوزها يرجع بفغص الصرصور
شو رايك في زي جدتك ؟؟

  بصراحة مش دايما الغلط من اهل البنت اهل الشاب كمان عليهم الغلط وبنسبة كبيرة دايما بيدوروا مظاهر وبس من غير ما يعرفوا المضمون مثلا البنت تكون من عائلة محافظة لكن مش متمكنة ماديا ولا اقصد معدمة يرفضوها عشان هاد السبب وان كانت على مستوى من الجمال الناس صارو يدوروا فشخرة وبنات فايعة واغنيا مع غض النظر عن الدين وبيدفعولهم اغلى المهور وان كان قرض او دين المهم المظاهر بالموضوع وبس الله يعينا ويصبرنا

  في بعض الرجال لما يكون مهر العروس مش مبالغ فيه او مخفف بيسير بعد الزواج يعايرها برخصها وحتى بيصير يطالبها باللي جابه الها انا زوجي مثلا ماطلبنا منه حفلة خطبه ولا فستان الزواج ولا حتى ثمن الصالون وحفلة الزواج كانت بصاله رخيصه وبعد الزواج بشهرين طلبني ذهبي بدو يبيعوا
ولانه معاملته كانت سيئه للغايه معي ومع اهلي وكان ما بيحترم حدا ما اعطيته الذهب وحتى الاثاث اللي جابلي اياه يا مستعمل من عند اهله او من ارخص واسوا انواع الاثاث ولما اعاتبه بيحسسني انه هاد اللي انا بستاهله وحتى مؤخري دائما بيحكيلي مارح اعطيكي اياه لو طلبت الطلاق وحياتي معه جحيم بمعنى الكلمه واليوم انا ندمانه اني تساهلت في تكاليف الزواج لانه طلع ما بيستاهل ولا قدر الي اي شي

  والله معك حق وصفت الموقف بدقة

  ان مجلس العشائر الشيشاني في الاردن قد حدد قيمة
المهر للعروس بحيث لايتجاوز ال700 دينار بغض النضر عن وضع العريس المادي فالكل سواسيه
ولا يجوز لآي من كان ان يزيد اويتجاوز هذا المبلغ
انهم يطبقون الشريعة الاسلاميه والسنة النبوية الشريفة وبارك الله فيهم ولهم
ياحبذا لو يوجد احد يطبق هذه السنة الحسنة غير اخواننا الشيشان مع شديد الاحترام والتقدير

  فعلا البنت لازم تكون مستقلة الها شغلها وراتبها عشان ما حد يذلها الشغل هوة الضمان الوحيد للبنت

  الى مهندسه:
بدي اهديكي نصيحه من اكتر شخص بيعرف قيمه المرأه و غلاتها... اخلعيه و ارميه بالشارع و ازا فيه اولاد فأنا بعتقد انك ما راح يكون صعب عليكي تربيهم لحالك, بالعكس افضل الهم و لمستقبلهم, راح تحسي بالاستقرار بدون واحد رخيص متلو, تحرري منو و استقلي و عيشي لحالك خاصه ازا انتي مهندسه, انتي افضل منو و مو مجبوره تعيشي هيك لبقيه حياتك...

  ان رفع المهور عائد لكل عائلة وعليها تحمل المترتب على ذلك فإما أن تجد من يلبي مطالبها واما ستعنس بناتها علما بان الاسلام لم يضع حد اقصى للمهر فلا مخالفة عند الزيادة بدليل النص التالي من كنز العمال في سنن الأقوال والأفعال باب الصداق ( عن الشعبي قال‏:‏ خطب عمر بن الخطاب فحمد الله وأثنى عليه وقال‏:‏ ألا‏!‏ لا تغالوا في صداق النساء، وأنه لا يبلغني عن أحد ساق أكثر من شيء ساقه رسول الله صلى الله عليه وسلم أو سيق إليه إلا جعلت فضل ذلك في بيت المال - ثم نزل، فعرضت له امرأة من قريش فقالت‏:‏ يا أمير المؤمنين‏!‏ لكتاب الله أحق أن يتبع أم قولك‏؟‏ قال‏:‏ كتاب الله، فما ذاك‏؟‏ قالت‏:‏ نهيت الناس آنفا أن يتغالوا في صداق النساء، والله تعالى يقول في كتابه ‏{‏وآتيتم إحداهن قنطارا فلا تأخذوا منه شيئا‏}‏ فقال عمر‏:‏ كل أحد أفقه من عمر - مرتين أو ثلاثا‏!‏ ثم رجع إلى المنبر فقال للناس‏:‏ إني كنت نهيتكم أن تغالوا في صداق النساء، فليفعل رجل في ماله ما بدا له‏.‏


‏(‏ص، ق‏)‏‏.‏

وانا مع تخفيض المهور طبعا حتى لا يقع الشباب شبانا وشابات في المحظور من زنا او زواج عرفي او متعة

  يا عزيزي يا شاب من الاردن
والله فش مارلين مونرو ولا جدتي بس شو بدك تسوي
يعني من التعليقات في ناس بتشوف انو سهل كثير الواحد يكون معو خمسة الالاف مهر و3000 ايجار شقة و2000 بكلفلك العرس و5000 عفش هذا غير مصاريف اخرى
يعني بتحكي عن 15000 الف ليرة عشان تتجوز
يعني اذا واحد بدو يعد هالمبلغ بقعدلو سنين فكيف اذا بدو يحوشو
خللوووووووو
يا اخت

  هاي
انا بعتقد انو الانسان لما بيلاقي الحب الصحيح مالازم انو يكون قصدو المصاري يا ناس احنا بالاردن احسن من غيرنا والله كل ماكان المهر غالي بيعرف قيمتها جد اماكن اخرى مجاورة بيبيعوها بالسنة عشررررررررررين مرة وتضلها عذمتهم وفي ظاهرة الزواج العرفي والمسيار والمتعة ليش كلها تخلو منها الاشهار اهم شي انا من ناحيتي انا بدي ياه كويس وحنون والمصاري احنا بنعملها مش هي

وشكرا

  من جعفر عمايره غلاء المهور مش مهم المهم غلاء الروح والاتفاق والثقه دائمآ وبعدم خيانة أي من الزوجين رفيق روحه وحياته وان تبفى المحبه المتواصله والمتبادله دائمآ مهما غلا المهر نهايته ومرجعه للذين يعيشون بروح واحده ويد ورجل وكلمه وجسد وقلب واحد

  والله يا شباب انا شايف انه هذي حالات نادرة انا الحمد لله خطبت ب 1500 دينار بس في ناس بدهم يسترو على بناتهم
و هي كل الي حولي بنفس المستوى خطبنا

  انا رأيي من راي اخوي (عربي وافتخر)
ومش دايما الحق على اهل البنت وزي ما بيحكي المثل (كل فولة والها كيالها) والناس درجات ومش شرط اروح اخطب وحده من سكان القصور عشان احكي اني اتجوزت وحدة غنية وبعدها اقضي عمري وانا اسدد ديوني هاد اذا استمر الزواج.
وغير هيك كل عائلة الها مستواها المادي والاجتماعي واذا ما كان في تكافوء بين الزوج والزوجة في المستوى المادي والاجتماعي ما بتستمر الحياة الزوجية صح.
يعني اللي بده يتزوج يدور على وحده من نفس المستوى اللي هوه منه ومش شرط يشطح بالعلالي.
وغير هيك اغلب اللي بيطلبوا طلبات تعجيزية من عمان بتلاقي البنت بدها حفلة بفندق زفستان فرنسي وغيره واللي مثل هيك بيلاقوا ناس مثلهم مع اني اتقدمت لبنات من عمان والحمد لله كانت طلباتهم معقولة بس ما صار نصيب لفرق العادات والتقاليد.
اتقدمت لبنت من اربد وكان رصيدي بالبنك 17 دينار مع انه اهلها اغنياء والحمد لله عندي منها هلا بنتين وولد ومبسوطين بحياتنا.
في كثير عائلات بدها الستر لبناتها بس الشباب بيتدللوا مهر خواتي دينار ورق والحمد لله اتزوجن كل خواتي ومبسوطات.
وزي ما حكى بعض الاخوان البنت اللي طلبات اهلها كثير خليها تتخلل عندهم وربنا يستر عليها.

الموضوع مش موضوع غلاء مهور عالعكس موضوع اتخاذ قرار من الشب انه يتجرا ويخطب بنت وحتى لو طفران لانه ربنا بيسير الامور والاتكال على الله سيد الموقف.
الزواج بناء مجتمع وبده رجل مسؤول وبده مصاريف وعليه التزامات للاسف اغلب الشباب ما بيدركوا هاد الموضوع.
طيب انا عندي بنت اذا اتقدملها شخص غير قادر ماديا على انه يصرف عليها وعلى ابنائها بالمستقبل ليش اجوزها وخليها عندي بالبيت اصرف عليها احسن ما اصرف عليها وعلى جوزها واولاجها بالمستقبل.
الموضوع موضوع قدرة على فتح بيت مش اكثر والشخص اللي ما عنده قدرة من تامين ادنى احتياجات اسرته المعيشية ليش لحتى يتزوج ويظلم بنات الناس معه.

خلينا واقعيين الزواج بده زلم مش اشخاص مترددين وبيحلموا انهم يتزوجوا بنت ما في غيرها بالدنيا او انهم يغتنوا من زواج وحده غنية الشباب كثار والبنات المناسبات اكثر هاي اهلها بيطلبوا مصاري في غيرها اهلها بدهم الستر بس.

  والله ضحكتوني انتو الجوز هههههههههههههههه كلامكم عالجرح والله بس انا لسا عمري 22 ولسا مش مخلص جامعة بس عندي سيارة وعايش مع اهلي وبالي مرتاح والحمد لله ولما اكون حالي ويصير الي بيت ووظيفة وامكانية مادية عشان اتزوج مابتوقع اني راح اواجه صعوبة عشان هون في السعودية الوضع بختلف حسب علمي واهل البنت بكونو متغربين زينا زيهم وماحدا بشوف حاله على التاني مين ماكان يكون عشان هيك بتلاقيهم بسهلو الامور على العريس عشان بدهم الستر لبنتهم والعرسان قلال هون مافي تنافس كبير عشان احنا اقلية هون
يمكن هاي النقطة لصالحنا عشان بطلع لكل شب تقريبا عروس ومستحيل مايلاقي عشان زي ماحكيت احنا اقلية والاقليات دايما بكونو حنونين على بعض وبتذوب الفروق اللي بينهم
وتقبلوا تحياتي

  برأيي المهر مهم بالنسبة للفتاة ولكن ليس بمبالغة, وهذا يعتمد على مدى قناعتها بالشب التي ستتزوج به

  إلى التعليق رقم 25 ، الأخ ماجد .
المبلغ المتعارف بيننا كشيشان هو أقل من ذلك بكثير.
و سوف تنصعق إذا قلتلك المبلغ الحقيقي :)

  سلام يا اخوان !
رمضان أشرف على الإنتهاء و دنا العيد منا .
كل عام و أنتم بخير و الوطن و قائد الوطن بألف خير.

بصراحة ، أنا شاب عمري 25 سنة و ما زلت على مقاعد الدراسة في الجامعة و السبب ليس رسوبي في الجامعة و لا التأجيل ، بل الثانوية العامة التي أضاعت من عمري الشيء الكثير ، و الحمد لله اجتزت ذلك و ها أنا في السنة الثانية في الجامعة و تقديري بحمد الله جيد جدا ً على مشارف الإمتياز .

تعرفون بأن الطالب الجامعي مصاريفه جريمة خاصة عندما يكون في جامعة أهلية .
و في المقابل قبل أشهر قليلة خطبت فتاة آية في الجمال و الخلق و الدين ، و الأجمل من ذلك أهلها الرائعين الطيبين ، و بالأخص والديها ، كم هم رائعون .
بعد أن ذهبت والدتي لكي تخطب لي ( بتعرفوا بالأول النسوان ببلشوا بالموضوع قبل الجاهة )
وافقوا دون تردد ، و قالوا عندما تكون أموركم جاهزة تأتون لكي تأخذوا ابنتكم لبيتكم .
و لا نريد من المهر المبلغ الكبير ( لم يتجاوز ال 500 دينار )و ما زلت على مقاعد الدراسة و أهلها وافقوا و حالتنا المادية دون المتوسط ، نسكن بالإجيار و أنا أسكن مع أهلي و لي أخوات إحداهن طالبة مدرسية و الأخرى جامعية .
تخيلوا ياإخوان ، نحن اثنان في جامعات خاصة و نسكن بالإيجار و قمت بالخطبة و قالوا لنا أتموا أموركم حسبما ترون ، و نحن لسنا مستعجلون ، علما بأن عمر خطيبتي 21 و العام القادم إن شاء الله سيتم الزواج .

نصيحة لكل شاب : لا تتحسر على وضعك المادي و اسع َ ، فستتحسن أمورك بإذن الله !!
أما الفتيات : أتمنى لكن الحياة الهنيئة و الزواج السعيد .

  ممكن سؤال

اديش المهر المتعارف عليه عندكم؟

  المهر هو 260 دينار أردني .

  ياأخي ألمشكلة مش بالمهر سواء كان عشرة الاف ولا حفض سورة من ألقران, ألمشكلة في تكاليف ألمعيشة وفتح بيت ألزوجية. كل حالات ألزواج ألتي حضرتها كانت شروط ألعقد(3 الاف ذهب ومن 3 الى 5 مؤخر وتجيز ألبيت) ومن لايقدر على ذلك عمره لاتجوز.

  عندما يكون شاب قد جهّز بيته و يتملك سيارة و وظيفته جيدة ، براتب جيد 450 دينار ، و يذهب لخطبة فتاة و يطلبون كل ما هو آت ، فماذا تقول في ذلك ؟؟؟
المفدم 25 ألف دينار أردني .
الذهب 10 آلاف دينار أردني .
المؤخر 50 ألف دينار أردني .
حفلة الزفاف و قضاء ليلتين في فندي الرويال .
شهر العسل في باريس .
غير الهدايا لأهل العروس .

تخيل يرعال الله !!
أتقول عمرينه ما تزوج ؟؟

  انا شاب عمري 26 و عندي بيت و سيارة و بشتغل و راتبي قريب من 1000 دينار و بصراحة ما بدي اتزوج و حتى بطلت افكر لمجرد التفكير بالموضوع لانه للي عايش زي حالتي حرام يتزوج لاني و انا عزابي و راتبي مش مكفيني فما بالكم لما افتح بيت و يكون عندي عيلة
هدا الشهر هيك راح تكون تقسيمة الراتب:
1000 - 150 تصليح السيارة( من زمان ما صلحتها و بدها بلاوي) -100 لاهلي - 100 لاخواتي الي بالجامعة - 150 بنزين السيارة للشهر - 200 فواتير تلفون و نت و كهرباء و موبايل - 100 سهرات 4 اسابيع - 100 عشوائيات (للاهل طبعا ...جيب معك عشاء ..او عزومة من هونولا من هون ..كرتونة بيض ...خبز ..زيارات ... زي كل شهر...الخ)
صفى معي تقريبا اقل من 100 و ع الاغلب بطيرو ما بعرف كيف
اذا بتزوج بصير اشحد
والله امنية حياتي اجمع اشي من راتبي

  الى جمانه ممكن ايميلك