هذه قصتي

زاد الاردن الاخباري -

انا بنت عمري 29 سنة، الحمد لله ملتزمة وعلى قدر من الجمال، ما أجا نصيبي لسا ، كان كل مرة يجي العاريس وأمه وأهله يقعدوا معنا ، ينبسطوا ونتعرف عليهم ويروحوا وما يرجعوا، كان نفسي اعرف السبب، بس وكلت أمري لله، قبل اكم يوم، تقدملي عاريس جديد، هاد العاريس كويس ومحترم ، وأهله كويسين، بس في مشكلة رئيسية: المشكلة انه ما معه الجنسية الاردنية، هوا وأهله معهم الجنسية الفلسطينية، وساكنين بالسعودية، يعني اذا بدي ارتبط فيه لازم اسكن معه بالسعودية طول عمري، وأولادي ما رح يقدروا يعيشوا بالاردن، ورح ارجع على بلدي ضيفة، وانا من لما عرفت انه ما معه جنسية اردنية احترت ، وما ارتحت لكل القصة، ومشكلتي كمان بأبوي جنني ، وبده يخلص شو ما كان، والله تعبت، وقلبي مش مرتاح، وكمان عرفت انه الام لا تمنح الجنسية لأولادها، يعني اولادي رح يعيشوا بالسعودية طول عمرهم ورح أظل طول عمري هناك وانا ممكن اتحمل غربة سنة أو خمس سنوات، أم طول العمر خلص اترك أهلي والأردن؟؟ مش عارفة شو أعمل؟؟