مظلومة

زاد الاردن الاخباري -

السلام عليكم ورحمة الله وبركاته ، أنا عندي مشكلة وحابة أعرضها عليكم لأني مش لاقيالها حل ، أنا أنا امرأة عمري 27 سنة متجوزة من سنتين تقريبا وعندي بنت، مشكلتي إنو جوزي بيتهمني بالسرقة كل ما يفقد مصاري يعني من سنة تقريبا فقد مبلغ كان مخبيه بالبيت وأنا ماكنت بعرف انو مخبي مصاري بالبيت ولا وين مخبيهم ، فبعد من إنسرقوا أو هوا فقدهم صار يتهم في بالسرقة وصارت مشكلة وراح جاب أخوه وحكالو عن موضوع المصاري وإنو مافي حدا غيري سرقهم وكان بدو يروح يبلغ الشرطة لتحقق بالموضوع لأنو حسب كلامو ما في حدا بالبيت إلا أنا وهوا فأكيد أنا إلى سرقتهم وأنا ماكان عندي فكرة بالمرة عنهم وحاولت إني أقنعوا مش أنا إلى سرقت لكن هو ما اقتنع وأصر على رأيه وصار كل يوم يزكرني بالموضوع ويجيبلي المصحف لأحلف عليه إني بحكي الصح وأنا حلفت على المصحف رغم هيك ما اقتنع كمان وعشت بحالة نفسية سيئة وقعدت أكم يوم ما باكل ولا بنام ودايما أبكي ، يعني صعب الواحد يعيش مع شخص ما بيثق فيه واضطريت أبيع جزء من ذهبي لأسدد المبلغ المسروق على الرغم مش أنا إلى أخدتو، المهم أنا ما بدي مشاكل ووجع راس وأعطيتو المبلغ ، فهون السؤال إلي بدي أعرف إجابتو هو ما سأل حالو ولامرة إني مش ممكن أعمل هيك لأني أنا موظفة وبحط كل راتبي مصروف للبيت وما بآخد مني إلا بس المواصلات ومن أول اسبوع تجوزنا فيه طلب مني 1000 دينار لحتى يسدد جزء من ديونه وأنا أعطيته المبلغ عن طيب خاطر مني وكان في إني ما أعطيه وأرفض لكن ما عملت هيك وكمان ساعدته بتجهيز البيت هدا كلو بعد ماتجوزنا وكنت أعمل جميات لحتى أشتري أغراض ناقصة بالبيت ، يعني كل هدا ما بيشفعلي عندو ويبرئني من الظلم الي صار بحقي ، وبعد ما صار هالموضوع وانتهي صار يحط كل مصاريه بمحفظة دايما يحطها بجيبة البنطلون وطول اليوم معاه وعند النوم يحطها تحت المخدة ، وصار بعد موضوع هالسرقة يفقد مبالغ صغيرة ويضل يتهم في بالسرقة رغم إنو مصاريه معاه وأنا أضل ساكته ما بدي مشاكل ولو حكيت ما راح يصدقني وكنت بكل صلاة أدعي الله إنو يظهر الحق وأطلع من الموضوع لأني حاسة حالي عايشة بكابوس ومسببلي تعب نفسي مالو نهاية، مبارح يوم الأربعا3/11/2010 كنت مروحة من الشغل فما شفتو إلا وهو مكشر وأجى يحكي معي ويحكلي بدي أسألك سؤال وردي عليه بصراحة فأنا حكيتلو خير شو في فحكالي إنتي ماخده مصاري من محفظتي فحكيتلو أنا كنت بالشغل وهلا وصلت كيف بدي آخد ، حكالي مش هلا مبارح بالليل ، حكيتلو لأ ما أخدت أي شي وانتهي الموضوع عند هدا الحد لكن الموضوع عندي ما إنتهى ، أنا نفسيتي مدمرة لأني عمري ما سرقت أو مديت إيدي على اشي مش إلي وأهلي مع إنهم فقرا بس عمرها ما كانت السرقة بقاموس حياتهم وأهلي ربونا أنا وكل اخوتي وخواتي على الأخلاق الفاضلة والقيم ، أعزائي قراء زاد الأفاضل والله العظيم أنا مش حاطة مشكلتي بهادي الزاوية لأني بدي أتسلى وعندي وقت فراغ ولا بدي أشكي من جوزي بس بدي أفهم شو إلي بيصير معي وبدي نصايحكم وحلولكم إلى تساعدني إني أطلع من إلي أنا فيه لأني ماعدت قادرة إني أحل هالمشكلة ومش عارفة شو أعمل ، دايما بفكر بهالموضوع ومشغولة فيه ومرات كتير بصير أبكي لأني مظلومة وكتير صعب الواحد منا يتهم بشي هو مش عامله وتنتزع منو الثقة وهو مخلص بكل شي بيعملو،،

بالنهاية بدعي الله العلي العظيم إنو يظهر الحق ، وإلكم مني كل الشكر والتقدير، دمتم بخيي ،،