عندكم حل ؟؟؟

زاد الاردن الاخباري -

بسم الله الرحمن الرحيم

الى رواد زاد الافاضل تحية طيبة مليئة بارقى وازكى الاحترام لكم جميعا ,,,, لن اطيل عليكم بالكلام وبدي احكي مشكلتي علني اجد لديكم حل مناسب لها ...

انا فتاة عمري 25 سنة متزوجة من 5 سنوات تقريبا وعندي طفل مشكلتي زوجي وطبيعة تفكيره ,,,,

لكل منامحاسن ومساوىء هذه طبية الانسان وسأذكر لكم احدى صفات زوجي السيئة وهي (( لا يؤتمن على سر )) يعني باختصار (( ما بتنبل فوله بتمه )) كل شي بيحكي ما بيخبي شي وانا كتير تعبت من هاي المشكلة ما في بيني وبينه موضوع واحد ما حدا بيعرفه حتى ابسط الامور العادية الخفيفة بيحكيها للناس واحيانا بكون خطط لشي بالمستقبل القريب لحتى اعمله بكتشف كل الناس معها خبر وانا بتكون مجرد فكرة او تخطيط لموضوع يعني بعدي مو عامليته,,,,

وبكون احكيله ما بيسير هيك لا تخبر كل شي للناس خلي شوية خصوصية النا ما بيرد ع الفاضي واحيانا بيجي يحكيلي موضوع وبيوصيني لا تخبري حدا (( وطبعا انا انسانة كتير كتومة وما بحكي اي شي لاي حدا حتى لو الشخص ما وصاني طبيعتي بحفظ السر من وانا صغيرة )) المهم بيكون موصيني ما اخبر حدا وبتفاجىء انه الكل بيعرف ولدرجة احيانا بطلع كذابة قدام الناس بسببه والله تعبت منه بهاي الشغلة حاولت كتير انصحه بس ما بيتقبل حكيتله قال الرسول عليه افضل الصلاة والسلام : ((أتمو اعمالكم بالسر والكتمان )) مو متلك بالمجاهرة والاعلان,,,

بس ع الفاضي ما بيستوعب علي تعبت منه والطبع بيغلب التطبع وهي عشرة عمر وهو شريك حياتي مو فترة مؤقته وبتنتهي لا هاي العمر كله.... جدانا مخنوق كتير من طبعه وحاولت غيره بكتير طرق ع الفاضي هو ما بيفرق بين الحبيب والصاحب والصديق والقريب والغريب والعدو كله عنده واحد وبيحكي كل شي لاي حدا وبيحكيلي عادي مو مشكلة خليهم يعرفو شو بنفكر وبنخطط وين المشكلة؟؟؟
وفوق كل هدا مابيثبت ع قرار كلمة بتجيبه وكلمة بتوديه يعني شو ما يحكيلي الشخص بيقتنع بيرد ع الناس حتى لو ع حساب راحتي واللي انا بدي اياه يعني مثلا بكون احكيله كتير حابة اني اشتغل وابني كبير وبشتغل بشهادتي بيحكيلي انا ما عندي نسوان يشتغله وبعصب وبنكد فأنا بختصر وبسكت تاني يوم بيحكي لحدا من اصحابه عن الشغل بيحكولو عادي وين المشكلة خليها تشتغل بيروح ع البيت بيحكيلي خلص شوفي شغل مناسب واشتغلي انا بنقهر ليش بيحكي للناس وليه بيسمع من غيري لو ضل رافض اهون علي من اني امشي حياتي برأي الناس ومتل هيك امثلة كتير بحياتي بمواضيع مختلفة... شو اعمل والله والله تعبت ....
 
و بعتذر ع الاطالة بس هدا من قهري ومو عارفة شو أعمل بدي حل ؟؟؟
مع تحياتي لكم