امام وزارة التربية والتعليم

امام وزارة التربية والتعليم

زاد الاردن الاخباري -

حطت على مكاتب "زاد الاردن" الرسالة التالية ننقلها الى الجهات المعنية كما وصلتنا ، آملين اخذها بعين الاعتبار واجراء اللازم .

تاليا نص الرسالة :

انا معلم في مدرسة انور نسيبة في الزرقاء الاولى
انا ارسلتلكم وانا اول مرة ارسل لكن انا شفتكوا نشرتو كثير من المواضيع والشكاوي من المواطنين وانا او احنا من هالمواطنين
اللي بدي احكيه بيشتكي منه كل معلمين المدرسة عنا لكن بيخافو من التربية او من مدير المدرسة او من اولياء الامور

احنا بنعاني من هجوم اولياء الامور على المدرسة وبكل معنى الكلمة حتى صارت لكل من هب ودب
وخصوصا ولي امر معروف ب أبو فلان وهو معروف بطول لسانة وبقضيها رايح جاي على المدرسة ومرات بيجي ايده فاضية ومرات معه قنوة وبتهجم علينا وعلى كل المدرسة الا اللي بسمع مسبته بذانه وطنش

و اي معلم يعاقب او يمنع ولاده من ضرب اي طالب وهم دايما بضربوا الولاد الثانيبن الطلبة يعني على الطلبة
شو بساوي الولد برن على ابوه ويجي ابوه فورا بسب وممكن يضرب معلم وولي الامر هذا من المنطقة شو بدنا نساوي معه
وباقي المعلمين والمدير والمساعدين بس بطلعو وبتفرجو

لا ومرات مدير المدرسة بيقول انه بدنا نتحمله ونحاول نمتص غضبه ونطيب خاطره ومن هالحكي ومرات يضطر المعلم يعتذر لهالزلمة وهو الغلطان

عشان هيك ما حدا يسترجي يحكي مع ولاد هذا الزلمة او ولاد قرايبه ولا بيطالبوهم مثل باقي الطلاب بالزي المدرسي ولا حدا بقرب من خلوياتهم وهم في الصف السابع والسادس والخامس
وبالع مرات المعلمين بزيدو لاولاده علامات وولاده مش نافعين حتى يتكافو شره
وناس ثانيين من برة المدرسة بعضهم طلاب من مدارس الكبار اللي حوالينا وبعضهم من شكلهم زعران يدخلو المدرسة ويطلعو وماحدا يسألهم وين رايحين وممكن يضربوا الطلاب او يتزانخو عليهم
ومرة دخل واحد سكران وطلعوه المعلمين
والمشكلة حكينا للتربية مليون مرة وماحدا مطلع علينا ولا راد علينا