صديقتي والكذب

زاد الاردن الاخباري -

بسم الله الرحمن الرحيم
السلام عليكم ورحمة الله وبركاته يا قراء زاد العزيزين :
أنا بنت عمري 14 سنة وأنا مشكلتي إنو عندي صاحبة كنت شايفة صحبتها أحسن صحبة لأنها البنت بصراحة كتيييييير أمورة وكل صفات الكمالية وصفات الصديق الصالح فيها
تعرفت عليها عن طريق المدرسة كانت قاعدة جنبي أنا وصحبيتي التانية ( ميس )ولاحظنا إنو في شغلات كتير مشتركة بينا إحنا التلات وهي كانت من النوع الهادئ جدا على عكسي أن الشعنونة لدرجة إني كنت أنا وميس نضل نحكي وهي ساكتة ولما أطلع عليها أحس حالي بدي أنخنق من سكوتها وشوي شوي صرنا صحبات وهي ذكية وإلها كتير مواهب يعني رسماتها ولا رسمات ليوناردو دافنشي وعندها أفكار ومعلومات روووووووعة وقويت علاقتنا كتير وخليتها تختلط ببنات الصف وقويت علاقاتها الإجتماعية مع اللي حوليها بفضلي والحمد لله ، فصارت تحكيلنا أنا وميس عن حياتها وإنو خوالها وعمامها متزوجين من أجنبيات وإنها دايما بتنزل على السوق مع ولاد عمها الأجانب وقالتلي إنو أسمائهم سيري وساموين وقالت إنهم بساعدوها في الدراسة وإنهم ....إلخ يعني بكلشي بتجيب سيرتهم وقالت إنها بدها تسافر على الهند بالعطلة وإنها عاشت زمان في أمريكا وإنها بتروح على لندن مع عمامها وأولادهم الأجانب و....كتيييييير شغلات ، بآخر السنة وقبل العطلة الصفية بيومين رحت سألت أختها متى رح يسافروا على الهند فاكتشفت إنهم ما رح يسافروا على الهند إلا إزا سافروا على الهند ببساط علاء الدين السحري ( دلالة على استحالة السفر ) فسألت أختها إزا عندها ولاد عم أجانب اللي دايما جايبة صحبيتي سيرتهم وآخر إشي اكتشفت إنهم من نسج الخيال مو أكتر وإنهم طلعوا كزبة وخوالها وعمامها مو متزوجين من أجنبيات أصلا وإنهم ما عاشوا لا بأمريكا ولا غيرو ولا بحياتهم طلعوا من الأردن أصلا أنا انصدمت بشدة وصرت أفكر شو اللي بخليها تكزب علينا أنا وميس مع العلم إنو صحبتنا معها مو صحبة مصلحة وإحنا منحبها قبل ما نعرف إنو ولاد عمها حلوين وأجانب وإنها عاشت في أمريكا وراحت على لندن و...إلخ ، أنا وصحبيتي ميس استشرنا اللي حولينا شو نسوي بخصوص صحبيتنا الكزابة فاشاروا علينا بمصارحتها ونشوف ايش اللي بخليها تكزب علينا مع العلم إنو أهلها من النوع اللي ما بنحب وما بنعاش معهم وضغوطهم عليها واصلة للسما ، أنا بحزن عليها لأنها كتير موهوبة بس ما حد بقدرها وأهلها كل ما يمروا بمشكلة بقولولها إنو هي السبب حتى لو ما دخلها وبصيروا يحكولها إنو من يوم ما خلفناكي والمصايب نازلة علينا ، مع إنو البنت كتير حبابة وأمورة وأنا لاحظت إنو أغلب رسوماتها حزينة وشريرة مع إنها حلوة يعني بترسم ناس حاملة جماجم وناس مقتولة و....إلخ ، أنا ما بحب حد يكزب علي بس في نفس الوقت أنا ما بدي أخسرها لأنها عن جد صديقة مثالية لولا مشكلة الكزب اللي عندها أنا حابة أساعدها وأخلصها من مشكلتها بس مو عارفة كيف خصوصا إنو القدر حكم عليها إنها تعيش مع أهلها اللي أنا حاساهم إنهم أساس مشكلتها يعني براءتها حتمت عليها إنها تخلق بخيالها ناس جداد وشغلات مو حقيقية وما صارت ولا عمرها رح تصير .
أنا بحبها كتير وهي بتحبني أكتر وشغلة إني أترك صحبتها مو داخلة براسي لأنها إنسانة رائعة ، وأنا قاعدة بكتب المشكلة وحاسة حالي دي أعيط لأني عن جد حزنانة على وضعها ومقهورة من أهلها .
فشو أسوي عشان أخلصها من مشكلتها وأساعدها مع العلم إني ما بدي أجرح مشاعرها ؟؟؟

محرر طلع المشكلة مشان الله لأني عن جد بدي حل وآسفة كتييييييييير لأني طولت عليكم بس بتمنى أسمع جواب شافي يفيدني ولكم جزيل الشكر