زاد الاردن الاخباري -
يوميات ابو ديبو .. الحلقة الحادية والعشرون .. للكاتب سرهاب البسطامي
عنوان الحلقة : شو اسرع شي
** ابو ديبو يجلس مع اصدقاؤه في المقهى .. وابو حاتم يسأل اصدقاؤه سؤال من احدى المسابقات التلفزيونية :
ابو حاتم : يا جماعة امبارح كانوا جايبين سؤال على التلفزيون في برنامج المسابقات وما عرفنا شو الحل والسؤال بصراحة عجزنا
ابو ديبو : شو هالسؤال يا ابو حاتم اللي معجزكم لهالدرجة .
ابو حاتم : قال بحكيلك يا سيدي شو هو اسرع شي في العالم .
صديق ابو ديبو : يا رجل هاظ سؤال سهل .
ابو حاتم : هات يا فهيم خلينا نشوف ابداعاتك شو هو اسرع شي في العالم .
صديق ابو ديبو : اسرع شي في العالم النمر .
ابو حاتم : لا يا زلمة جوابك غلط لانه في ناس جاوبو هالسؤال وكانت الاجابة غلط .
صديق ابو ديبو الثاني : والله انا بحكي انوا الطيارة هي اسرع اشي .
ابو حاتم : يا رجل شو الطيارة انت الثاني غلط لانه امبارح في المسابقة واحد جاوب هالسؤال وحكولوا غلط يا حبيبي .
شو رايك اخوي ابو ديبو عندك حل لهاللغز اللي حيرني .
ابو ديبو : يا رجل هاظ السؤال اجابته سهله واله اكثر من اجابه كمان .
ابو حاتم : بتحكي جد يا ابو ديبو هات احكيلنا شو هو اسرع شي في العالم .
ابو ديبو : معروفة يا رجل اسرع شي في العالم الراتب والعطلة وبطارية التلفون وكمان يا سيدي وحده بدها تطلع على السوق وما بدها توخذ اولادها ..
انتهت الحلقة الحادية والعشرون ..