يوميات ابو ديبو .. الحلقة التاسعة عشر

يوميات ابو ديبو .. الحلقة التاسعة عشر

زاد الاردن الاخباري -

يوميات ابو ديبو .. الحلقة التاسعة عشر .. للكاتب سرهاب البسطامي
عنوان الحلقة : خيانة زوجية

** ابو ديبو في غرفته .. والباب مغلق عليه .. وام ديبو تذهب الى زيارة اهلها ..
** ام ديبو تنسى هدية اهلها وتعود الى المنزل وتسمع زوجها ابو ديبو يتكلم من غرفته وتتفاجئ من حديثه .. وتتنصت على زوجها من وراء الباب :

ابو ديبو : والله انكم غاليين على قلبي ومن كثر حبي فيكم مش حابب تفارقوني بترجاكم ما تروحوا والله اني بحبكم ومش قادر استغني عنكم .. هيك بالسهولة هاي بدكم تروحوا .. والله لو بقدر اخليكم عندي هون والله لاحطكم بعيوني .


ام ديبو : شووووو ابو ديبو جايب نسوان عالدار ومش وحدة كمان يا ابو ديبو .. هاظ جايب شلة نسوان معاه والله لاورجيك يا ابو ديبو بتحب علي وجايبهن على الدار . وبغرفة نومي . يا خاين .

ابو ديبو : طيب اسمعوا شو رايكم تظلوا معي لاخر الشهر بترجاكم والله ما بقدر على فراقكم انتوا غاليين علي .

ام ديبو : تغضب كثيرا ... وكمان لاخر الشهر انجن الزلمة وبقلي روحي عند اهلك واذا بتحبي تنامي عندهم نامي هاظ امنيح اللي نسيت اوخذ هدية اهلي وارجع اشوف المصايب . والخيانة .

ابو ديبو : طيب اذا بدكم تروحوا اعطوني بوسة ع الداير خلص بدي اودعكم اذا هاظ قراراكم .

ام ديبو : شوووو .. كمان بدو يبوس انجن الزلمة انجن .. بدي اعد لثلاث وافتح مباشرة الباب عليه .. 1.2.3 وتفتح الغرفة ولكن الباب مغلق .. وتدق ام ديبو الباب افتح يا خاين افتح يا جبان والله غير اطلقني انا ما بعيش مع خاين وبتقولي روحي عند اهلك على شان تلعب بذيلك افتح انا بقوووووول .

ابو ديبو : شو مالك يا حرمة هسه بفتح اهدي شوي .. انتي شكلك فاهمة الموضوع كله غلط .. وبعدين انتي شو اللي رجعك ..

ام ديبو : اه فاهمة غلط ومش وحدة كمان شلة نسوان جايب وفي داري وغرفة نومي يا خاين ابعد غاد بقولك بلاش اعمل مصيبة واقتل حالي ..

** تفتح الباب ام ديبو وتدخل وترى نقود على سريرها .

ام ديبو : كمان بدك توزع عليهم مصاري يا خاين .. اي احنا معناش نوكل يا زلمة .. وينهم بقولك بقتل حالي هسه ..

ابو ديبو : يا حرمة انتي فاهمة غلط انا ما عندي نسوان انا كنت بحكي مع الراتب قبل ما يطير وبترجى يضل معي لاخر الشهر .

انتهت الحلقة التاسعة عشر ..