مصدومة بزوجي .. !!

زاد الاردن الاخباري -

قرّاء زاد الأعزاء ....
السلام عليكم ورحمة الله وبركاته...

مشكلتي بأختصار إني مصدومه بزوجي كتير بعد الزواج يعني فترة الخطوبه كان كتير شخصيه مزوئه وفهمانه ومتحدث وما شاء الله عليه...ووعدني بأشياء كتيره بخصوص حياتنا ومستقبلنا...وخلاني أبني أحلام بالهوا...

المهم...أنا كان عندي مقياس أساسي للشخص الي رح أرتبط فيه وهو الأخلاق والصلاه بشكل خاص ولما سألته بتصلي قلي آه وكان كل ما يجي يزورني أثناء الخطوبه يقوم يصلي جماعه وأي مكان نروحه كان يقوم يصلي والكل يحسدني عليه وعلى شخصيته وأسلوبه الراقي بالتعامل معي ومع الناس...هلأ تزوجنا وأكتشفت أنه كان لابس قناع مختلف عن شخصيته الحققيه يعني لا صلاة وهاد اللي مجنني...لا زوء...لا أحلام ...لا وعود وكمان كتير كتوم ما بصارحني بشي مع أني كتير بحاول أتقرب منه بس بضل يصدني...بصراحه بلشت أكش منه وخصوصاً لما أتصل معي المحامي وقلي رح نرفع ع زوجك قضيه لأنه ما بدفع أجار البيت الي طبعا أكتر من 200 دينار وأنا أنصدمت لأنه متفقين أنه راتبه لأيجار البيت والقرض وراتبي لمصروفنا ومصروف البيت ولما سألته ليه متراكم  علينا وما بتدفع ما جاوبني وقلي أنا طبيعتي صرّيف ...

بصراحه أنا بلشت أشك فيه انه بشرب أو بعمل أي شي حرام بالفلوس وخصوصاً أنهما كان يجيب براتبه شي للبيت أو شي خاص الو أو أي شي تاني ماموس يعني أستغفلني وما عمل واجبه كزوج مسؤول عن بيته أنا مستعده أعطيه كل راتبي  وأحرم حالي من كل شي عشان نكون مبسوطين بس لما عرفت أنه راتبه ما بسدد فيه ألتزاماتنا وبيآخد راتبي وصفينا بالمحاكم بنجن...

يعني بدي أعرف وين بروح براتبه؟؟؟

 عم بفكر جديه بالانفصال رغم أنه لساتني عروس وعمري 24 سنه بس أنا ما بقدر أعيش بظروف غامضه أو أحس أنه في شي حرام  بالموضوع وأضل ساكته..

 ساعدوني بمعرفتكم والله يجزيكم الخير