هل أنتظره أم أنساه؟؟؟

زاد الاردن الاخباري -

السلام عليكم ورحمة الله وبركاته:
مشكلتي وباختصار انو انا فتاة جامعية بقي على تخرجي سنة عالاكتر ومرتبطة بشب ويعلم  الله مابينا غير الوعد بالزواج لا اكتر
انا من اول ماجا يتعرف عليي طلبت انو تكون علاقتنا رسمية لبين ميصير بينا اشي رسمي وفعلا هيك صار وطلب مني وعد استناه وانا وعدته وكل اللي بينا سلامات واطمئنان عن الدراسة والاهل حاليا لا اكتر لانو عنا قناعة انو غلط عن غلط بيفرق ..طبعا انا وافقت عليه بصراحة لاني فكرت بشكل عقلاني كان الشب ضايلو فصل وبيتخرج حكيت انشالله بيتخرج وامورو بتمشي وانا لسا مطولة بالجامعة هالكلام من سنتين ونص تقريبا بس للاسف الشب ما اشتغل الا من جديد وشغلو برة الاردن وهوة حاليا مسافر صرلو تقريبا شهر والمشكلة انو الراتب تاعو قليل يعني بسنتين مابيقدر يخطبني طيب انا شو اعمل ؟انا والله لو عليي لاستناه العمر كلو بس انا الكبيرة بالبيت ومافي بنات غيري بالبيت يعني الكل بستنا فيي واهلي كل ميجيني واحد بفتحو معي موضوع الزواج وما بعرف شو احكيلهم الرفض الغير مبرر صار يشككهم انا معكم انو مافي شي بصير بالغصب بس انا بموقف او بلحظة ضعف مابعرف شو بتصرف وخصوصا اني رفضت كتتير طبعا مش بدي ابين حالي لا سمح الله بس حكيتلكم مافي بنات بالبيت غيري
انا من جهتي والله حابيتو للشب والله بعلم فيي
بس وضعو مابيسمح يجي يخطبني عالاقل بدو سنتين والمشكلة مش راضي يفتحلي مجال انساه او ابعد عنو ؟
كل ماجي ابعد عنو بخاف بكرة ما انساه وادمر حياة الشخص التاني اللي يمكن يكون زوجي ؟
طيب شو اعمل انا بوضع ما بقدر استناه ولا بقدر انساه لانو الكل بيحكولي مش حتنسي  وحتدمري حياتك ادا بتبعدي عنو طيب شو اعمل؟يشهد ربي اني فترة متخرج صرت انا ادورلو عشغل عشان يشتغل بسرعة وييجيتي بس للاسف ماصار نصيب هون يشتغل؟ويشهد ربي اني بدي اياه بس شو طالع بيدي؟
يمكن البعض يحكيلي لو بتحبي المفروض تستني طيب شو اعمل باهلي والله صارو يشكو ومن ناحية عقلانية متى حيتقدملي بعد اكم سنة؟
ويمكن البعض بحكي انو يمكن بضحك عليكي لا معلش والله بعرف انو بدو ياني بس برضو بعرف انو قصر وعليه تقصير ؟؟؟طيب شو اعمل؟؟؟؟؟؟؟

انا اسفة طولت عليكم كتير يعلم ربي اني من اول متخرج لليوم وراسي مش مريحني 24ساعة بفكر مش عارفة شو اساوي يمكن لانا كنا متوقعيت شي والواقع كان شي تاني واستسهلنا الامور والامور طلعت صعبة مابعرف ...
بالله عليكم انصحوني نصيحة اخوان بعيدا عن التجريح يمكن ماتكون مشكلة بحد عينها مابعرف كيف راي القراء ويمكن تكون مكررة معلش بتاسف منكم علاطالة