وضع محير جدا

زاد الاردن الاخباري -

السلام عليكم ورحمة الله وبركاته

 

قررت عرض مشكلتي عليكم بعد ما شفت كم كبير من الاراء السديدة لحل المشاكل السابقة لذلك ومن دون مقدمات انا مشكلتي او بمعنى اصح هي مش مشكلة بقدر ما هو وضع محير جدا :

 

 

انا بنت كملت دراستي الماجستير قبل فترة قصيرة من جامعة العلوم والتكنلوجيا الأردنية وابلغ من العمر 25 عاما  وكنت قد قدمت طلب منحة للدكتوراة ومن فترة قريبة حكولي انه رح يعملو معي مقابلة شخصية وبناء عليها بقررو اعطائي المنحة او لا

 

المهم انه انا الان في حيرة شديدة من أمري يعني هل اروح اقابل واذا طلعتلي المنحة اسافر عشان اكمل دكتوراة ؟؟؟؟ لكن انا مثل ما حكيت عمري 25 سنة وبدي حوالي اربع خمس سنين دكتوراة يعني هيك رح ارجع وعمري مش اقل من 29 او 30 سنة وبكون كبرت كتير بالعمر بالنسبة للارتباط لانه انا مش مرتبطة  واذا رحت يجوز اعنس وانا ادرس مع العلم انه انا والحمد لله بنت محترمة وجميلة وسمعتي زي المسك وتقدملي الكثير اثناء دراستي بس انا كنت ارفض لاني كنت حابة اركز بدراستي وبس

 

وكمان محتارة هل اني اشيل فكرة الدكتوراة من راسي واضل هون ادور على شغل حالي حال كل الطلاب المكملين ودايرين بدورو على وظايف وارتبط واعيش حياتي زي بقية البنات لكن بخاف بنفس الوقت اندم بعدين اني ما كملت دكتوراة وضيعت الفرصة وكمان صعب علي اروح عالمقابلة وانا مش حاسمة امري لانه بلكي وافقو علي هيك بكون اصعب علي ارفض المنحة

 

اخوتي واخواتي الكرام انا عنجد محتارة والوضع محير جدا بالنسبة إلي يعني هل اشيل فكرة الدكتوراة من بالي واضل هون واتوظف اذا صحلي وبعدين لما ييجي حدا مناسب ارتبط وخلص ولا اروح اقابل واذا وافقو علي اطلع اكمل دكتوراة وبرجع عمري 29 او 30 سنة  !!!!!

 

انا طبعا رح استخير ان شاء الله بس حبيت تشاركوني باراءكم وتنصحوني

 

ارجو من ادراة موقع زاد المحترمين نشر مشكلتي بأسرع وقت لانه موعد المقابلة اقترب

 

افيدوني بارائكم وجزاكم الله كل خير وبعتذر على الإطالة