أريد الإرتباط بإنسان يفهمني

زاد الاردن الاخباري -

بسم الله الرحمن الرحيم ترددت كثيرا بأن ابعث لكم مشكلتي ولكن اقسم بالله اني تعبت وارهقت ولم اعد احتمل .. معلش رح اكتب بالعاميه مشان اقدر اوصل الي جواتي .. انا بنت حلوه ومتعلمه وما حد بشوفني الابحبني من كتر ما بمزح ومتواضعه مع الكل وما بحب ازعل حد ومن عائله محترمه .. عمري 24 سنه .. مشكلتي انه ما الي حظ بالدنيا بأي شي بعملو لازم ينسم بدني عليه وبالنهايه يا بزبط يا اما بزبط .. بعرف رح تحكولي كلنا هيك بس والله انا زياده .. مع هاد كله انا الحمدلله صابره وما بفقد الامل بربنا وبصلي وبعمري ما اذيت انسان وطول عمري بحلم امتى التقي بانسان يفهمني ويحتويني ويحبني ربع حبي اله .. بس للاسف ما عم الاقي هالانسان .. وهلا انا بحاجة اكتر من اي وقت مضى لحد يوقف جنبي واعتمد عليه لاني تعبت كتير من الوحده رح تحكولي أهلي .. اهلي رائعين لكن ما بقدرو الاهل يغطو كل شي جواتي .. انا نفسي اعيش مع انسان وما بدي علاقات مؤقته مع مين ما كان .. بدي شي بالحلال .. رح تحكولي ما بيجيكي ناس بجاوبكم انه ما بمر اسبوع الا بيجي عريس ولما ادرس الموضوع لبعضهم واشوف انه في توافق بينا بتلاشى الموضوع ما بعرف كيف علما بأنه لما يجو بكونو طايرين في .. بحس في سد بيني وبين العالم برغم اني بكون الطرف مرن وبعرف انه ما في حد كامل وما بدقق عكل شي يعني ما بدي واحد تفصيل .. احكولي شو الحل والله تعبت .. الوحده والروتين عم يدمروني وجواتي مشاعر وحب بدي يطلعو للانسان الصح وبعلاقه صح بحاول اشغل حالي دايما ولكن ما في فايده .. استشرت دكتور وحكالي انه لازم ترتبطي لانه عندك مشاعر قويه وهالمشاعر مكبوته وصارت تأثر علي بشكل سلبي .. عنجد ما بعرف شو أعمل حتى الشباب الي معي بالشغل بحكولي انتي رائعه ونيال الي بده يرتبط فيكي .. رح تحكولي ليه ما ترتبطي بحد فيهم .. الاغلب مرتبط والي مو مرتبط ما بناسبني بشكل او بآخر .. شكرا لحسن استماعكم وارجوكم الابتعاد عن التعليقات الجارحه ..